"ستحاسبوا أمام الله".. ريهام حجاج تعلق على واقعة عروس كفر الدوار

علقت الفنانة ريهام حجاج، على واقعة عروس كفر الدوار بالبحيرة، التي أثارت جدلا عبر السوشيال ميديا، خلال الساعات الماضية، التي طلبت قبل التوقيع على عقد قرانها من زوجها إلقاء شروطها.
وكتبت ريهام، عبر "ستوري" حسابها على"إنستجرام": "هو ليه الناس على السوشيال ميديا بيستبيحوا سيرة الناس ويسعوا لخراب البيوت؟ عروسة بتتكلم مع جوزها في وجود عيلتها في كتب الكتاب (سواء الأسلوب عاجبك أو مش عاجبك) أنت ليه أصلا تقول رأيك السلبي اللي ممكن يخرب بيتهم وتنشره على أنها بتهزئه وتحول فرحتهم لكابوس".
وتابعت: "ممكن يكون في احتمال نص في المية أن مش قصدها أو دي طريقتها في الكلام وأكيد هو عارف وبيتجوزها وحاببها زي ما هي، تعرف ظروفهم منين؟ مواقفهم؟ عدوا بإيه سوى في الخطوبة! إيه إللي خلاها تقول كدا أصلا! دخليات الناس ما حدش يعرفها بتشيلوا ذنوب والله دا اللي ربنا قال عليه في القرآن الكريم من يفرق بين المرء وزوجه".
وأضافت: "اتقوا الله، افهموا الفرق بين حرية الرأي والأذية، افهموا الفرق بين اللي ممكن نتكلم فيه واللي مالوش لازمة التدخل فيه من الأساس ستحاسبوا أمام الله على كل ده".
وظهرت عروس كفر الدوار بالبحيرة، خلال عقد قرانها وهي توصي زوجها بعدة وصايا جاء فيها: "أنا واثقة في ربنا وفيك إنك هتكون خير السند وخير الصاحب، مندمتش يوم في اختيارك، بل بالعكس أنت أكبر وأعظم انتصاراتي، هطلب منك طلب، زي ما هشيل أهلك في عيني، تشيل أهلي في عينك الصغير قبل الكبير، ومع احترامي للكل أمي ثم أمي ثم أمي، مش هسيب أهلي بالساهل".
وكانت ريهام حجاج، قد وجهت مؤخرا رسالة شكر لوزيرة التضامن الإجتماعي - نيفين القباج، بعد تكريمها لأبطال مسلسل "يوتيرن" الذي عُرض في دراما رمضان 2022.
مسلسل "يوتيرن" بطولة النجوم: ريهام حجاج، نورهان، توفيق عبدالحميد، عبير صبري، كريم قاسم، محمود حجازي، وصفاء الطوخي وغيرهم، للكاتب أيمن سلامة، وإخراج سامح عبدالعزيز، من إنتاج شركة "العدل جروب".