نجاح الفنانة رحمة أحمد، في تقديم شخصية "مربوحة" في سادس أجزاء مسلسل "الكبير أوي"، كان من أسباب وضعها في مقارنة مع الفنانة دنيا سمير غانم، التي قدمت شخصية "هدية" زوجة "الكبير"، في الأجزاء السابقة. الفنانة رحمة أحمد، كشفت عن رأيها في المقارنة، عبر صفحتها في موقع فيسبوك، وكتبت: "أنا مش عارفة أعبر عن احساسي بالامتنان.. الحمد لله والشكر لله أي حاجة حلوة حصلت، أو اتقالت لي ده كرم كبير أوي من ربنا يمكن أكبر من اللي استحقه.. عاوزة أقول 3 نقط". وتابعت: "الأولى، وهفضل أقول البوقين دول كل ما حد يشاور النقطة دي، إن فنانة زي دنيا سمير غانم لا تقارن بأحد، أنا مش حد خالص، أنا من فانز دنيا سمير غانم، لأن لو اتحطينا في مقارنة من المؤكد إني أنا اللي هابقى خسرانة". وأضافت: "الثانية، بعد توفيق ربنا، إن فنان زي أحمد مكي يدي مساحة لحد يقول حاجة مبتحصلش من أي فنان موجود ع الساحة.. الراجل ده عنده اللي يكفيه وزيادة إنه يسيب فنان قدامه يقول وهو سايب ايده.. مهما اتكلمت عنه مش هوفيه حقه فنيا ولا إنسانيا". وعن مخرج المسلسل، كتبت رحمة: "المبدع أحمد الجندي ميتخيرش عنه، يسيبك تقول ويعليك ويركب لك شغل، وذكي يعرف يطلع ضحك من أي شخصية ويحطها في مكانها الصح". واستكملت: "الثالثة ليك إنت يا حبيب قلبي، أخويا الكبير الداعم المستمر بكل الطرق، صادق في فرحته، أنا مهما حكيت ع اللي عملته معايا عشان أوصل إني أبقى في عمل من أهم الأعمال في رمضان مش هيكفي فيك كلام، شكرا أحمد أمين الأخ والفنان والإنسان إنك دايما جنبي" ووجهت الشكر على من ساندوها، وكتبت: "أحمد أمين، أحمد مكي، أحمد الجندي، إنتوا مكسب لأي فنان ولأي شخص وبشكر ربنا دايما إن ربنا كتبلي إني اعرفكم، وشكرا لأي حد دعمني حتى لو بكلمة كويسة وبالأخص صلاح الدالي، فنان هياخد حقه كويس جدا ويستاهل أكتر بحبك يا صلوحة، شكرا لأي حد وقف جنبي واللي اداني ضهره وربنا لأوريك". مسلسل "الكبير أوي 6" للفنان أحمد مكي، يعرض في الساعة 6:20 مساء، على أن يعاد في الساعة 1:50 بعد منتصف الليل و2:00 مساء اليوم التالي. ويخوض النجم أحمد مكي سباق مسلسلات رمضان 2022 من خلال الجزء السادس من مسلسله الشهير "الكبير أوي"، ويشارك إلى جانبه الكثير من النجوم وبينهم: رحمة أحمد وبيومي فؤاد وهشام إسماعيل ومحمد سلام، تأليف مصطفى صقر، وإخراج أحمد الجندي، وإنتاج شركة سينرجي.
