السيسي للقائمين على الدراما: مش عارفين تعملوا إبداع غير لما تجيبوا راجل يضرب مراته؟

قال الرئيس عبد الفتاح السيسي، إن المرأة كانت سببًا كبيرًا للحالة اللي كنا فيها، وعايز أفكركم أد إيه المرأة كانت مسؤولة ومحركة للأحداث.
وأضاف السيسي، خلال حضوره احتفالية تكريم المرأة المصرية والأم المثالية، اليوم الأربعاء: لما جينا في البرنامج الاقتصادي، قُلنا محتاجين دعم المرأة، ومررنا بظروف صعبة بفضل دعمها ومساندتها.
وتابع رئيس الجمهورية: كان فيه حالتين انتحار لبنتين، لحَد زوَّر وفبرك لهم... على المجتمع أن ينتبه لولاده وبناته، أرواح الأبرياء في رقبتنا، لما تجيب في أي فيلم، وده مش ضد الإبداع، لما تجيب الحسن وتشاور عليه أفضل.
واستطرد الرئيس: هو انت مش عارف تعمل إبداع غير لما تجيب راجل بيضرب مراته، أو إن حد بيشتم، لازم الغالب يكون هو الطيب.
وأضاف السيسي: قُلت المفروض الراجل وهو بيكلِّم الست يحط إيده ورا ضهره، الناس ضحكت.. فيه إيه يا عم؟! خلِّي إيدك ورا ضهرك، فيه إيه يا عم؟ النبي وصانا بالصلاة والمرأة.. دي استراتيجية تطلع منها مبادئ وتقاليد تحقق هذا الأمر، مش كلمة، النبي كان بيقول ده عشان أُمَّة تحط منهج فيه احترام وأدب وتقدير وذوق وخلق مع المرأة؛ كل المرأة مش المصرية بس.
واستطرد السيسي: لما ييجي حَد يقول لي طب إحنا.. أضرب بقى، تضرب إيه؟ دا كلام يجوز؟ مايصحش حَد يؤلم سيدة ماشية في الشارع بنظرة، ده كلام عجيب، لازم المجتمع يتوقف أمام ده، يقول إزاي احنا كده، إن حد يؤلمها بنظرة، يبص عليها.
وأضاف الرئيس: مش بنتكلم على قانون بس، دراما وإعلام ومثقفين ومسجد وكنيسة، كيف يُمارس هذا الأدب؟ أدب التعامل بيننا وبين بعضنا، ومع المرأة، إزاي يعني؟ احنا كلنا مطالبين؛ اللي عمل كده ابني وابنك، يا ترى احنا شكّلنا ده وهو طفل صغير؛ إنه يخلي باله ومايعملش كده، هل ده موضوع محل... احنا مهتمين بالتعليم بس، وماله، طب هل احنا مهتمين نصيغ شخصيات أولادنا إنه مايكنش كده.
واستكمل رئيس الجمهورية: قُلت من كان شهر، يا جماعة لما الدراما تناولت الدولة كخصم الناس قامت؛ إيه اللي ممكن تعمله الدولة في إنسان مش بيشتغل في مكتبه، أو يرمي حاجة في الشارع، احنا تخلينا عن دورنا كمجتمع، الكلام ده كان محل اهتمام، وكان الأب يتقال له ابنك مؤدب ولّا معاه درجة علمية، دلوقتي بندور على أعلى الدرجات العلمية، باقول لكل حَد بيسمعني، لا تُسِئ، فيه فرق إن الحالة العامة يكون فيها تجاوز، أو بعض التجاوز، احنا عايزين بعض.