مرتضى منصور: كنت أقدر أتعاقد مع موسيماني وطارق حامد سليم من 3 أسابيع

أكد مرتضى منصور، رئيس نادي الزمالك أنه حزين من تصرفات جماهير الأهلي في لقاء المريخ السوداني في بطولة أفريقيا والتعدي لفظيًا على الكثير من الأشخاص.
وقال "منصور"، في مداخلة هاتفية لبرنامج "حضرة المواطن" مع الإعلامي سيد علي، المذاع عبر فضائية "الحدث اليوم"، اليوم الأحد، إن الجمهور هو أهم عنصر في كرة القدم وما يحدث من تصرفات من الجماهير غير مقبول، متابعًا: "مينفعش أي جماهير تتعدي على اللاعبين".
وأضاف: "أنا صبرت كتير حتى نهاية مباراة الوداد المغربي علشان محدش يقول مرتضى بيدمر الفريق، وكل القرارات اللي اتخذناها كانت في طريقها الصحيح".
وعن التفاوض مع الجنوب أفريقي بيتسو موسيماني، المدير الفني لفريق الأهلي، عقب قائلًا: "زوجة موسيماني اتكلمت مع أمير مرتضى منصور المشرف العام على فريق الكرة من أجل تدريب الزمالك وكانت عاوزة تزود المرتب وكنت أقدر أحصل عليه ويحصل فتنة رياضية".
واختتم "تعاقدنا مع عبد الله السعيد لما أنتهت مدة تعاقده مع الأهلي وكنت أقدر أتعاقد مع موسمياني والبلد مش ناقصة أزمات وفوضى، وأحترم جماهير الأهلي جيدا".
وعن التجديد للاعبى الزمالك، رد مرتضى منصور قائلًا: "طارق حامد قال أنه مصاب قبل ماتش الوداد وكان سليم أنه يلعب، كنت مفكر طارق حامد سافر المغرب ولكن سمعت أنه رفض، واتكلمت معاه وقالي انه بيجهز علشان ماتش الجونة ولم يلعب أي مباراة".
وأكمل: "طارق حامد سليم من 3 أسابيع والدكتور أسامة قالي أنه طارق قال أنه مش هيلعب ومش هدخل العاركة دي، ودا شغل عافية وإحنا اللي بندفع الفلوس للاعب لما بنفوز في أفريقيا، والأخ أبو جبل كل يوم يكلمنا من 10 أيام علشان يطلع مع رامز جلال وإحنا عندنا ماتش مهم".
وواصل: "حمزة المثلوثي لاعب محترم ولم يشتكي نادي الزمالك ومنتخب تونس أرسل لنا خطاب للحصول على اللعب في فترة التوقف القادمة، ونحترمه على عدم تقديم أي شكوى ضدنا بالرغم من تأخر مستحقاته المالية".
واختتم "كل لاعب لا يعرف قيمة نادي الزمالك بقوله مع السلامة وإحنا اللي مش عاوزينه وربنا يوفقهم في أي مكان تاني ومش هقبل اعتذار أي لاعب تاني نهائيا، القرار نهائي لا عودة فيه ولو كل لاعب جه وأعتذر مش هوافق علي الأسف ونادي الزمالك أكبر من الجميع وله فضل على الكل".