وجهت الإعلامية إيمان الحصري، تفاصيل مرضها خلال ال 8 أشهر الماضية، الشكر للأطباء في مستشفى وادي النيل، قائلة: "أنقذوا حياتي قبل حتى ما أطلع على ألمانيا"، مشيرة إلى أنه خلال مرضها كان هناك أخطاء طبية يترتب عليها أخطاء أخرى، قائلة: "المفروض لما بيحصل مضاعفات في أي خطأ طبي في عملية يتم التعامل معه بشكل صحيح والتعامل مع الخطأ الطبي في حالتي كان خاطئ، وهو ما ترتب عليه مجموعة كبيرة من العمليات". وأوضحت "الحصري" في حوارها لبرنامج "صاحبة السعادة" مع الفنانة إسعاد يونس، على فضائية "دي إم سي" اليوم الاثنين، أن الإجراءات الطبية الخاطئة التي حدثت في حالتي تسببت في تدهور الحالة الصحية لي بشكل أكبر، قائلة: "دا خلاني في دوامة عمليات وعملت 7 عمليات في 21 يوم، وفي فترة من الفترات مكنتش حاسة بحاجة وكنت بين السما والأرض". وتابعت: "في أحد مراحلي المرضية نقلت من المستشفى التي كنت بها، وحدث لي تسمم في الدم بسبب المشاكل الكثيرة والأخطاء الكثيرة في منطقة المعدة"، موضحة: "عرفت أن الأسلوب والتصرف الطبي لو كان صح مكنش حصلي كده، وعقبال ما بدأوا يعملوا تصرف صحيح كان مر أسبوعين". وأردفت: "في مرحلة من مراحل المرض فاكرة أن الطبيب قال لأخواتي خلصت كل حاجة معاها أدعولها، وهي كلمة قاسية، وهو قالهم خلصنا الطب، ولكن الصحيح أنه خلصنا الأخطاء فيها ومش هنعرف نعمل في حالتها حاجة"، مؤكدة: "أخواتي وبنتي كانوا معايا طول الوقت سابوا حياتهم وبيوتهم كانوا تحت رجلي في الشهور اللي فاتت حتى في الأوقات اللي كنت في العناية المركزة كانوا بيناموا في العربيات قدام المستشفى عشان ميسيبونيش لوحدي، وكنت شايله همهم في وسط تعبي". وأضافت "الحصري": "أنا وأخواتي ملناش غير بعض وإحساس أني هروح من الدنيا مكنتش عايزة أسيبهم، ومش عارفه هيعملوا ايه من غيري ودا كان عبئ زيادة عليا، كانوا بيسمعوا من الدكاترة هي مش هتكمل، لأنه طبيًا مفيش حاجة كانت تقول أن الشخص دا ممكن يعيش". وأشارت: "عرفت أنهم كانوا بيجيبوا حد لبنتي عشان يمهدلها إني مش هبقى موجودة نفسيًا لأن كل الأمور حدثت فجأة".
