حورية فرغلي تبكي على الهواء: "فقدت الثقة.. واتصدمت في اللي كانوا جنبي"

بكت الفنانة حورية فرغلي، على الهواء، بعد شعورها بالضيق مما تعرضت له خلال الفترة الماضية بسبب تغير في شكلها إثر حادث سقوطها من على الحصان الذي دهس أنفها واضطرها للدخول في عمليات تجميل فاشلة.
وقالت حورية، خلال مداخلة هاتفية مع برنامج "مساء DMC"، اليوم الإثنين: "اتصدمت لما لقيت الناس اللي كانوا معايا علطول وشغالة معاهم لمدة 10 سنوات ووقفت جنبهم، بقوا مش جنبي.. كنت فاكرهم بيحبوني".
وتابعت حورية: "فقدت الثقة في نفسي كست وممثلة، لأن محدش قدر شغلي وأعمالي، وصعبان عليا نفسي، وقررت أبعد تمامًا ومش عايزة حد يشوفني إلا لما أرجع زي الأول، لأن أنا باكبر في السن وعمري 44 سنة دلوقتي.. لكن برضه فرحانة إني عرفت الناس الكويسة والناس الوحشة، وده درس قاسي واتعلمت منه".
واستطردت حورية: "أنا كنت ملكة جمال مصر عام 2002، ومش عايزة الناس تفرق ما بين شكلي قبل كدة، ودلوقتي، وبقول حسبي الله ونعم الوكيل في كل اللي اتنمر عليا.. أنا دلوقتي بتنفس من بقى ومش بستطعم الأكل وفاقدة حاسة الشم والتذوق".
وأضافت حورية: "محدش هنأني برأس السنة غير أخويا، وحابسه نفسي في غرفة نومي، ومستنية أسافر أمريكا عشان أعمل عملية لكن جائحة فيروس كورونا عطلت السفر بعد الاتفاق مع الدكتور".