بكلمات غاضبة، رفضت المذيعة مي حلمي التدخل في حياتها، وهاجمت في فيديو مطول بثته "لايف" عبر خاصية "القصص القصيرة" بموقع "إنستجرام"، من وصفتهم بالمتطفلين، ومن أرسلوا لها رسائل بشأن ما تردد من أنباء عن انفصالها عن الفنان محمد رشاد، رغم عدم وجود سابق معرفة بينها وبينهم. وفي السطور التالية، ننشر أبرز ما قالته مي: - " يعني وبعدين انتم ميتقالكومش غير كلمة وبعدين بكل القرف اللي في الدنيا، الواحد يتجوز، يتطلق، انتوا مالكم انتوا حاشرين نفسكم في حياتي اكتر مني يعني". - "مصر كلها تبعت اللي عمري مشوفتهم في حياتي بيكتبوا تعليقات، ويسألوا بكل تطفل، وانتم مالكم كل إشاعة وكل كلام نيلة بيتكتب بتقولوا نفس الكلام وتزودوا، واللي زاد وغطا يقولوا أصل هي بتتبرع بفستان فرحها وبوست بقاله أسبوع، عشان الذكريات تتمحي، انتم مالكم". - "انتوا حلكم إن حياتي متبانش ليكم وده القرار الصح، عشان التطفل ده وعزة جلال الله كل سكرين شوت هاخدها وأي قلة أدب بتتكتب هاخدها، فيه حاجة اسمها قضايا تشهير بشخصية عامة". - "واللي يقول أصلها مش أصيلة وموقفتش جانبه وخايفة على بيتها، وشرحنا أربعين ألف مرة ومش مضطرة أشرحه تاني، مش مضطرة أقول حاجة مش عايزة أقولها، المرة دي مش هسكت لو ليا مزاج أقول حاجة هقولها ماليش مش هقولها، لما يجيلي الوقت بمزاجي أعرف حد عني أي حاجة، انتوا مهتمين تعرفوا حياتنا اكتر مننا". - "والتعليقات بتاعة كل شوية قرفتونا بقى، طب بتسألوا ليه أنا عاملة الفيديو ده عشان انتم مهتمين تعرفوا كل التفاصيل اكتر مني أنا شخصيا. أقولكم زودوا عدد المتابعين واللايكات". - "الناس اللي بتابعني اللي عرفاهم أشكركم أنكم مبعتوش تسألوا عن حاجة، لكن الناس اللي عاملة محاميين وإني ست مش أصيلة، أمال طلعت أعيط ليه لو أنا مش أصيلة، حكمت كده ورددت الكلام زي القطيع، آخركم متفرجون ليس إلا". - "هفضل أقولها اللي عايز يتطمن عليا على عيني وعلى راسي، انا بتكلم عن اللي بيكتبوا وبيزيودوا، عبيد الشهرة، طبيعي اسأل قلة الأدب اللي بتتكتب دي بناء على إيه عايزين تركبوا تريند على أي حاجة". - "مش هتكلم عن القضية حاجة مش بتاعتي ماليش حق أتكلم فيها، وكان قراري صح إني أنا أخفي حياتي، وقرار رشاد صح، وأنا حرة مش هقول والله مش هريحكم بقول للناس العاقلة اللي بتابعني شكرا انكم مدخلتوش". - "عارفة انكم هتمسكوا الكلام اللي على مزاجكم وبتسيبوا الباقي، مش بتفرحوا غير في المصايب، مش عايزين غير أخبار الفضايح، هتاخدوا الكلام اللي عايزينه، واللي مش لاقيين حد يربيهم في البيت وتلاقيها مقهورة نفسيا وتكتب إني موقفتش جانبه في أزمته المالية، بتكلمي في أيه يا روح القلب، ده بيدل على البيت اللي انتي طالعة منه، لو أبوكي وأمك يعرفوا إن ممكن أعملك قضية تشهير مش هيمسكوكي الموبايل أصلا". وتعليقًا على نفس الأمر، كتبت رسالة عبر "القصص القصيرة"، جاء فيها "آه المرة دي خدت سكرين شوت عشان أفضح أصحابهم مدعيين المثالية والشرف، أصحاب إزاي وليه وانتي ست أصيلة ولا تقليد، موقفتيش وقعدتي ومين عمل إيه واللي عاملين فيها قضاة على البشرية وانتي منك ليها بتهبدي، عبيد لايكات ركوب الترند وانتوا آخركم تشيروا تاني منك ليها خبر متشير وتحطوا التاتش بتاعكم، وارجع واقول كلكم متفرجون ليس إلا، انا سبتكم مرة تاخدوا راحتكم مش هسيبكم التانية". كانت الساعات الماضية، شهدت انتشار أنباء عن انفصال الفنان محمد رشاد، عن زوجته المذيعة مي حلمي، فيما أكد مدير أعماله في تصريح سابق لمصراوي خبر طلاقهما، دون الخوض في أي تفاصيل. View this post on Instagram A post shared by Fanonline (@fanonline1) on Aug 13, 2020 at 9:26am PDT