عصام السقا ل"مصراوي": الشهيد محمد محمود كان ظل "المنسي" وفخور ب"الاختيار"

يشارك الفنان عصام السقا، بشخصية الشهيد محمد محمود "هرم"، ضمن الأحداث الدرامية لمسلسل "الإختيار"، الذي حقق نجاحا جماهيريا كبيرا، ويواصل تصدره لتريند "تويتر" عقب كل حلقة للعمل، الذي تولت إنتاجه شركة سينرجي للمنتج الكبير تامر مرسي.
وقال السقا، في تصريحات خاصة ل"مصراوي": "شرف لي مشاركتي في هذا العمل، تعايشت مع هرم كونها شخصية من لحم ودم، وأتمنى إننا نقدم 3 أو 4 ٪ من اللي سمعناه عن المنسي وهرم لما كانوا في البرث".
وأوضح السقا: "لو طلعت بمشهد واحد من ضهري في مسلسل الإختيار، هكون فخور بيه جدا، وأي ممثل في مصر هيبقى ليه الشرف تجسيد أي بطل من الشهداء.. فشهداء الوطن ناس ملهومش مثيل أو شبه، وهم في دار الحق، وما سمعته عن كمين البرث، خضني أوي".
وتابع: "أجسد شخصية الشهيد محمد محمود محسن هرم، الذي كان ملقب ب(ظل المنسي) لمدى علاقة الحب القوية التي تربطه به، وكان آخر بطل استشهد في كمين البرث، ولمدى حبه لمنسي لما عرف انه استشهد وهو في الدور العلوي، وكان هو موجود بالأسفل، (كان عايز يطلع مع المنسي وهما طالعين فوق، إلا أن منسي رفض وقاله خليك يا هرم وأثبت مع اخواتك).. لقى الذخيرة معاه خلصت، فألقى السلاح ومسك الحجارة وظل يضرب التكفيريين بالحجارة ليقتل أحدهم، ومكنش خايف من السلاح اللي ماسكينه، وبعدها طلعوا التكفيريين فوق وضربوه في ضهره ليستشهد".
واستكمل: "(هرم) كان شخصية طيبة وجدع مع أصحابه وكانوا بيحبوه جدا، والمنسي كان بياخده معاه في كل إجازة وكان بيرجعوا مع بعض من الإجازة.. لما قعدت مع والد (هرم) قالي (لما كان بيجي إجازة.. المنسي مكنش بيسيبه يروح مواصلات، وكان يستناه في رمسيس، وياخده معاه الكتيبة بسيارته.. (هرم) كان في المداهمات بيبقى لازق في المنسي من كتر خوفه عليه، والمنسي كان جدع معاه جدا وبيساعده في حياته الشخصية".
واستطرد حديثه: "وإحنا بنصور، كان عندنا روح وحالة عالية من الحماس، خاصة بعدما قابلنا أصحاب المنسي الحقيقيين (اللي نزلوا إجازة قبل الحادث)، وهما بيحكوا عن البرث كان عامل إزاي، وكانوا بياكلوا إزاي، ولما بينزلوا مأموريات بيبقوا نايميين 10 أيام على بطونهم في مزارع عشان يجيبوا التكفيريين، وكان أكلهم مقتصر على علب الفول والتونة اللي بياخدوها في شنطهم عشان ياكلوها لما يجوعوا، وكانوا بيخافوا على بعض ازاي".
وأضاف عصام السقا "اتخضيت وأنا بسمع منهم قصة الهجوم على البرث.. وتخيل إن 130 عربية للتكفيريين رايحين على مبنى معزول في الصحراء (يتواجد فيه المنسي ورجالته اللي كان عندهم يقين وثبات عالي)، عشان المنسي مش قادرين عليه، وكل عربية كان عليها 3 أو 4 تكفيريين برشاشات نص بوصة، لو رايحين يحاربوا دولة مش هيعملوا كدا".
وعن تحضيراته لشخصية "هرم"، قال: "تواصلت مع والده، وتحدثت معه عن شخصية نجله الشهيد البطل، وكشف عن مدى حب هرم للمنسي كان قد ايه، وكل ما ينزل إجازة كل كلامه بيكون عن المنسي.. وتعاملت مع هرم بشخصيته الحقيقية كونه شخص طيب جدا وخجول، وكان على تواصل دائم مع والدته حتى قبل استشهاده، كان يبلغها عبر الهاتف إنه نازل إجازة مع القائد المنسي، وهيجيب لها الدواء معاه لما يرجع، وكان حنين دايما على والديه".
وأضاف: "كنت بروح كل يوم قبل التصوير ب 6 ساعات، اتدرب مع ضباط الصاعقة الحقيقيين اللي كانوا موجودين معانا وبيدربونا على السلاح، وازاي نستخدمه، وايدك تبقى عاملة إزاي وانت واقف بالسلاح، وازاي وهو على كتافك ميتهزش، وامتى يبقى مفتوح ومقفول، وكنت حريص دايما إني أروح بدري عشان اذاكرها معاهم".
وعن تعاونه مع النجم أمير كرارة في "الاختيار": "أمير كرارة صاحبي جدا على المستوى الشخصي، ومن أجدع الناس، ورجولة جدا، ومتعاون أوي مع الجميع، وممكن يوقف التصوير لو شاف حاجة غلط، خد باله منها خلال التصوير، ونجم تقدر تقول عليه مدرسة وداعم دايما للي حواليه".
وعلى جانب آخر، يشارك عصام السقا، في دراما رمضان بجانب "الاختيار" للنجم أمير كرارة، في مسلسلي "الفتوة" للنجم ياسر جلال و"فرصة تانية" للفنانة ياسمين صبري.
"الاختيار" بطولة: أمير كرارة وأحمد العوضي ودينا فؤاد وإسلام جمال، وعصام السقا، وعدد من ضيوف الشرف منهم صلاح عبدالله ومحمد عادل إمام وآسر ياسين ومحمد رجب وإياد نصار، تأليف باهر دويدار وإخراج بيتر ميمي، ومن إنتاج شركة سينرجي.