تامر حسين يهاجم زكي فطين عبد الوهاب بسبب الهضبة: "استخفاف واستهتار"

هاجم الشاعر تامر حسين، عبر حسابه الرسمي بموقع فيسبوك، الفنان زكي فطين عبدالوهاب، بعد انتقاد الأخير للفنان عمرو دياب، متسائلا عن سبب إطلاق لقب "الهضبة" على عمرو، كما كتب أن ألحانه وكلمات أغانيه تشبه بعضها منذ 20 عاما، وهذا يعني حالة من الإفلاس الفني.
وعلق "تامر": "أحياناً يبقى عندك واحد صاحبك مُهندس يجيلك دور برد يكتبلك روشتة علاج وخُد ده وهات ده، وده هيخليك زي الفُل بكرة من غير ما يفهم إن كل دوا م اللى بيقترحوا له آثار جانبية وتركيبات كيميائية، وإنه أساسا مش دكتور ولا خريج طب، الأستاذ خريج هندسة".
وتابع: "كل شُغله رسومات ومباني ولا دخل مستشفى ولا عنده خبرة إنه أساساً يدي حُقنة، بس إزاي مايقولش رأيه، أهو ده بالظبط الظاهرة المنُتشرة في مجالنا الفني وتحديداً مجال (الغناء) من غير المتخصصين في الصناعة والاستهتار والاستهانة بصناعة عناصرها شاعر وملحن وموزع ومُهندس صوت وناس خريجين معهد موسيقى وتربية موسيقية وغيرهم من التخصُصات ومطرب ورؤية فنية ومراعاة ذوق عام للجمهور ومعادلة وحسبة مُعقدة".
وأضاف: "نيجى بقى لبوست الأستاذ، قالك إفلاس آخر 20 سنة، يعني حضرتك ابتداءً من تملي معاك مثلاً اللي غير شكل الأغنية وقربنا للعالمية، ولا حضرتك قصدك مثلاً أكتر واحد بيحبك اللي خد أورد، ولا أنا عايش الأشهر والأجرأ موسيقياً في مسيرة الفنان عمرو دياب ولا ليلي نهاري اللي اترجم معظم أغانيه للُغات العالم".
واستكمل: "طب ممكن يكون قصدك وياه اللي كان في وياه أفضل أغنية في أفريقيا (اللي هي قارة) مش بكلمك ع المهندسين فقط، طب سيبك من ألبومات تانية ولا الليلة اللي خد 4 جوايز أورد، والراجل رفض يروح يستلمها واكتفى ب فيديو وهو فى بلده، ولا إيه ولا إيه".
وتابع: "طب حضرتك ماشفتش نجاح يتعلموا فقط بما إني واحد من الصُناع فأدافع عن نفسي مش هقولك ألبومات آخر 20 سنة، طب ماحدش قالك إن آخر ألبوم الراجل مغير ومواكب كل الأذواق والأجيال ومغير قاموس الكلمة يوم تلات، قدام مرايتها، عم الطبيب، مهرجان، وغيرها".
واختتم حديثه قائلا: "الحقيقة أنا عندي استياء من مُجادلة (وجهل من لا يفقه) والاستخفاف والاستهتار بصناعة كاملة بشعراء وملحنين وموزعين ومهندسين صوت بمطرب ناجح بقاله 35 سنة، ارحمونا إنت بتنصر المهرجانات من حيث الشكل الموسيقى والتنوع مثلاً اللى هو فين، إحنا عندنا أكتر من نوع موسيقي نقدمه هاوس لاتين، مقسوم، وغيره ده لو ع المزيكا أما لو بتنصر نوع الكلام و خمور وحشيش ومطوتي وغيرهم من الألفاظ والمصطلحات اللي أخجل أكتبها، دي حاجة تانيه بقى".
وكان الفنان زكي فطين عبدالوهاب، قد كتب عبر حسابه بموقع فيسبوك اليوم: "أنا عارف إن فيه ناس هتزعل من الكلام اللي هقوله، لكن بعد الهجوم الشرس على أغاني وموسيقى المهرجانات، نفسي أفهم عمرو دياب الملقب بالهضبة، بمناسبة إيه، أغانيه وألحانه وكلمات أغانيه هي هي من 20 سنة، ده إفلاس فني ما بعده إفلاس، أغاني المهرجانات فيها تجديد وابتكار وتنوع أكتر بكتير غصب عن الملحن الفذ حلمي بكر".