باسم مرسي يعلن تفاصيل إلغاء إعارته لسموحة في 10 نقاط

أوضح باسم مرسي مهاجم منتخب مصر تفاصيل قرار الزمالك بالتراجع عن إعارته لنادي سموحة حتى نهاية الموسم الحالي، قائلًا أنه يدفع ثمن أزمة لم يكن طرفًا فيها.
قرر نادي الزمالك إلغاء إعارة باسم مرسي إلى سموحة، قبل أن يقوم الفريق السكندري بتسجيله في قائمته باتحاد الكرة.
ولخص باسم مرسي أزمته الأخيرة وقرار عدم انتقاله إلى سموحة وتحويله وجهته إلى متذيل جدول الترتيب (بتروجيت)، من خلال 10 تغريدات نرصدهم فيما يلي:
1- تلقيت اليوم اتصال من مسئول في نادى الزمالك يطالبنى بالرجوع ، قالى بالنص " عندى ليك مفاجأة، الزمالك عايزك ترجع وتروح نادى تانى بدل سموحة " " احنا اللي أخرنا البطاقة الدولية عشان لو كنت لعبت الماتش مكناش هنعرف نرجعك".
2- بسبب موضوع معين بقيت أنا طرف فيه بدون إرادتى، دلوقتى قدامى اختيار من اتنين الأول انى ألعب في الزمالك والمدرب مش عايزنى بألف جنيه في ست شهور.
3- الاختيار التانى انى انتقل لفريق ترتيبه الأخير في الدورى. هل أنا بعد ما لعبت أربع مواسم في الزمالك، حصلنا فيهم على 5 بطولات واحرزت 53 جول، ده يكون مصيرى من مسئولين نادى الزمالك؟!
4- قبل كدة انا مكنتش بطلع اتكلم، بس الموضوع يوصل ان يتقال ان التأخير بسببى فى موضوع البطاقة الدولية وتشويه سمعتى ان ده بسبب خلاف مادى بينى و بين النادى اليونانى في ده مش صحيح.
5- أنا عقدى اتفسخ رسمى من الاتحاد اليونانى، لو مكنش اتفسخ رسمى مكنش يحقلى انى اتمرن مع نادى سموحة.
6- أنا فى وقت اقامتى كاملة ف اليونان، حصلت على 5 ألاف يورو فقط واتنازلت عن جميع مستحقاتى للزمالك و جددت سنتين اتنازلت فيهم عن 4 مليون جنيه عشان يوافقوا على احترافى.
7- وعند انتقالى إعارة لسموحة جددت سنة كمان على بياض.
8- أنا هرجع نادى الزمالك مش لو بألف جنيه لو ببلاش لان شرف ليا انى ألعب في نادى الزمالك. مكنتش حابب انى اتكلم رغم اتصال عدة برامج بيا من وقت وصولى للقاهرة لتوضيح عدة أمور بمقابل مادى بس أنا كنت برفض
9- أنا حالياً بعد ما استقريت فى الاسكندرية ونقلت أسرتى وأغراضى واستأجرت محل سكن، تم ابلاغى انى لازم ألغى كل ده وارجع حالاً يا أقعد ست شهور ف البيت.
10- يارب الناس اللي كانت بتتهمنى انى مقصر طول الوقت وبعمل مشاكل تكون الصورة واضحة لهم، انا طول الوقت بتحط في مشاكل أنا مش سبب فيها. اسف على التطويل بس كان لازم التوضيح.