بالصور : فيلم اروقة القصر لشبيه مبارك

بعد فترة طويلة كان بيهرب فيها من الاعلام وغلاسة امن الدولة بسبب الشبه بينه وبين الرئيس السابق حسني مبارك اخيرا قرر مدحت ابو العزم انه يظهر للنور وهو برضة بيقدم شخصية مبارك ولكن في فيلم وثائقي مدته 100 دقيقة بيتكلم عن اللي حصل في ال 18 يوم اللي قامت فيهم ثورة 25 يناير ولغاية التنحي في القصر الجمهوري عن طريق مزيج بين مشاهد الثورة ومشاهد درامية لمبارك وحاشيته جوه القصر ..بمعني تاني حيعيدوا تمثيل الاحداث بشكل توضيحي عن طريق الفيلم ده واللي سموه "اروقة القصر" وحيتعرض علي القنوات الفضائية قريب
الفيلم مبني علي بحث كبير من الصحافة والاعلام ده غير شهادة شهود العيان واللي حيكونوا ضيف شرف الفيلم منهم الدكتور حسام بدراوي.. اللي حيحكي ايه اللي كان بيحصل جوه القصر الجمهوري و د. مهدي عاكف شاهد من جوه جماعة الإهوان المسلمين المعارضة و د.أحمد شوقي العقباوي رئيس قسم الطب النفسي بجمعة الأزهر واللي حيحلل الأحداث نفسيا واجتماعيا والشاعر عبدالرحمن يوسف واللي حيكون شاهد من ميدان التحرير وحيمثل الشباب واللواء أشرف طراف ظابط الشرطة المتقاعد.. وحلل الأحداث عن طريق منظورها الأمني . وده حيكون اول ظهور للرئيس المخلوع عن طريق مدحت ابو العز ومراته سوزان ثابت واللي حتقوم بدورها نجوي النجيري ومعاهم المؤلف أحمد مبارك، والسيناريست أحمد زايد، والمخرج أحمد فتحي مخرج الأفلام الوثائقية.
واكد مخرج العمل "انهم اعتمدوا في إنتاج الفيلم على الجهود الذاتية لان مجموعة العمل شباب متطوعين بيحاولوا يقدموا عمل فني وثائقي متكامل بيسجل لحظة مهمة في تاريخ مصر".