خالد بيومي يكتب | الإعلام والكورة

الحمد لله، حال الكورة المصرية اتصلح، الكباتن بتوع الاتحاد اتصالحوا مع بعض بمناسبة النصف من شعبان، الاستقرار عم على المنطقة بأسرها، تم التخطيط لخريطة الكورة المصرية، الأندية المصرية الشعبية عايشة في نعيم، الحمد لله اتحاد كورة قاعد 24 ساعة للتطوير، الشكر لله، ولا حالة واحدة من مشكلات اللاعبين مع لجنة شؤون اللاعبين، ولا الاتحاد الدولي زهق منا ولا حاجة، شوفنا لجنة مسابقات تتخذ قرارات قوية وصارمة على القوي قبل الضعيف دون تدخل، شوفنا رابطة أندية محترفة مش منحرفة، شوفنا عدالة تحكيمية قوية من لجنة حكام لا تعرف المجاملات. واضح إن الإعلام الكروي المصري أنجز ما عليه من تنوير وتثقيف رياضي كروي، بعيدا عن التعصب والهدف الخاص، تمام الحمد لله، هاني أبو ريدة طلع نظيف جدا ومش بتاع رشاوى، اللجنة الأوليمبية اتفعلت، والمجلس القومي شايف شغله تمام، وعمل شوية لوايح تفصيل لا تفيده شخصيا عندما يترك المجلس، علشان ما حدش ينافسه في مجلس الزمالك القادم على أساس إنه باق في المجلس، اللي يأتي بالرياضة المصرية إلى أسفل السافلين، الحمد لله البدلة بتاعة حازم الهواري وش السعد علينا في كل البطولات. الحمد لله زاهر جمع الجمعية وطلبوا شوية مطالب قمة في الاحتراف، عاوزين تكيت لمباريات المنتخب المصري. الحمد لله عرفنا مين هيهبط ومين صاعد. الحمد لله إن كل بتوع الرياضة حاليا تركوا الرياضة والبرامج المخصصة بالكيلومتر مش بالساعة، علشان يحشروا نفسهم في السياسة، الحكايه أعزائي القراء الناس عايشة على التسلق والتقرب من السلطة، بيتكلموا على التحرير والناس الغلابة أنهم واقفين حال البلد، مع إن ما حدش شغال إلا هما بالملايين، بيهللوا لأصحاب المناصب في البلد. زمان كان النظام هو الرسول عليه الصلاة والسلام والحاشية هما الصحابة، حاليا هما أبو لهب والكفار سبحان لله. تصوروا عند العودة من بطولة إفريقيا 2010 كان فيه مذيع جامد أوي، عمل سؤال الحلقة مين يا ولاد أكتر واحد فاز ببطولة إفريقيا، طبعا الجواب أحمد حسن، لا غلط، الرئيس السابق حسني مبارك، وضحك ضحكة عظيمة، وطبعا كل اللي في الاستوديو كانوا مهللين، ولله البلد بريئة منكم ومن إعلامكم الموجه، والكلام مش على الكل، ولكن هما عارفين نفسهم كويس، منكم لله أنتم السبب في التخبط رياضيا وكرويا. والآن وبنجاح منقطع النظير الشاشة تحولت وتوجهت إلى السياسة لتمجيد السيد رئيس الوزراء عصام شرف، والمجلس العسكري طبعا، هما أصحاب القرار باستئناف الدوري علشان الحياة تمشي، والدنيا تستقر، والبلد ترجع تاني، آه كان قرارا مدروسا، طيب الدوري خلص هنتكلم في إيه يا شطار، تعالوا ندخل السياسة علشان نحشي البرنامج، ونرضي أصحاب السلطة، أنتم عارفين مين المتضررين من انتهاء الدوري، هما الغلابة بتوع التحرير، عارفين ليه لأن بتوع الكورة فضيولهم نهارهم أسود..