فركش

الشعب.. يدهس السوشيال ميديا

** أياً ماكان عدد الذين أدلوا بأصواتهم في الاستفتاء علي التعديلات الدستورية فإن الشعب المصري يضرب المثل يوماً بعد يوم في الوعي والنضج السياسي وهو البطل منذ ثورة 30 يونيه وإلي يوم القيامة.. فهو الشعب الذي كرمه رب العزة قي القرآن وأوصي به رسولنا الكريم سيدنا محمد -صلي الله عليه وسلم- ومنذ عام 2013 والشعب يحافظ علي مصر وحاططها في عينيه ويساند جيشه وقيادته وشرطته.. وقبل الاستفتاء الأخير تعرض الشعب العظيم لمحاولات مستميتة علي السوشيال ميديا للتلاعب بقراره في المشاركة وزعزعة الثقة في الدولة ولكن هيهات الشعب الناصح الذكي المحترم دهس حركات السوشيال هباب تحت رجليه ونزل الاستفتاء وقال رأيه بحرية وبدون ضغوط ومهما كانت النتيجة الشعب هو الفارس والبلد هي الكسبانة.. أما بالنسبة للاخوة اللي لطموا خدودهم عشان الشعب يقاطع أو يبطل صوته فأنا مندهش منهم .. يا شوية مرتزقة ما تخليكم في حالكم وتنزلوا تقولوا لاه او تبطلوا صوتكم بدال مالشعب يديلكم علي قفاكم وشكلكم يبقي لامؤاخذه خالص جاتكم القرف.. والله مصر هاتفضل في العلالي بشعبها وجيشها وقيادتها.. وتحيا مصر.
** فيه شوية ملعوب في دماغهم بيقولوا الجيش للدفاع والحماية وبس.. طبعاً أبسط رد عليهم "شفتم لما الفريق كامل الوزير مسك وزارة النقل إيه اللي حصل في شهرين بس.. السكة الحديد والمترو والطرق والكباري حالها اتغير وماشية زي الساعة والفلوس اللي كانت بتتهبش دخلت خزانة الدولة.. بذمتكم لو عندنا ستة كامل الوزير في الصحة والتعليم والسياحة والإسكان والزراعة والتنمية المحلية.. تفتكروا البلد دي حالها يبقي إيه". .والنبي تتكسفوا علي دمكم..!!
** تظل المرأة المصرية الأعظم علي وجه الأرض.. إيه الوطنية دي.. وإيه الانتماء ده.. تستاهل بجد ربع مقاعد البرلمان والشيوخ.
** صدقوني واسمعوني "ياهوووووه".. مصر عاوزة وزير إعلام..بسرعة قوي..!!
** علم "زيزو" أن بعض العاملين سيحتجون لعدم حصولهم علي حقوقهم المتأخرة واستمع لنصيحة "تيحه المعجزة" بأن يعلن أنهم يحتجون علي التعديلات الدستورية.. وينقلب السحر علي صاحبه ويتم اكتشاف الكدبة ويتعرض لأوصاف ثقيلة وصعبة علي كرامة إنسان.. فليستعد للمحاسبة علي كل مخالفاته وكدبه الذي تسبب في شئ لم نعد نراه منذ ست سنوات..!!
** تسربت الخطابات المتبادلة بين وزارة المالية والهيئة الوطنية للإعلام بخصوص علاوات العاملين في ماسبيرو.. وأطالب د.محمد معيط بعمل تصريح علني قاطع بهذا الكلام.. لأن دي فلوس ناس وأموال عامة عاوزين نعرف راحت فين.. واللي ليه حق ياخده..!!
** لو امتلكت القرار.. لأصبح اللواء خالد الدكروري رئيساً للهيئة الوطنية للإعلام لأنه تصرف بمسئولية وذكاء شديدين في أزمة ماسبيرو وحاز ثقة وحب العاملين..وفي زيارة للشريفين قال لي هشام برغوت مدير أمن المبني"اللواء الدكروري إيده بإيدينا في تطوير المنظومة بشرياً ولوجستياً".. برافو.
** محمد نوار.. مسك الإذاعة من هنا وربنا نجاه هو ومراته من حادثة موت.. يا ساتر.. الترقية دي فيها عين مدورة وحاطة كحل تقيل قوي..حمدالله علي سلامتك.. ادبحلك جوز أرانب..!!
** سمية الخشاب ماغلطتش لما قالت"الطلاق بيبقي رزق أحياناً" عشان واحد شمام يرد عليها.. روح اتعالج الأول وابقي اتكلم..!!
** فاضل للأهلي والزمالك "8 ماتشات".. يبقي الدوري بين الأهلي والزمالك.. ولسه بدري.. مش كده واللا إيه "يا حبة عين أمك"..!!
** أحمد عبيطي:مسكوها طبلة.. مين انت عشان يسلموا عليك.. أما عبيطي صحيح..!!
** كل اللي بيشتغلوا مع بلطجي الفن بينافقوه عشان خايفين علي أجورهم..تخيلوا عيل بيتحكم في أساتذته..!!
** الناس مش هاتشوف مسلسلات رمضان إلا بقنوات "أون - الحياة - dmc- mbc مصر- القاهرة والناس".. البقاء للأقوي.. وماسبيرو هايستلف مسلسلات..!!
** قالولي ماتوجعش قلبك مع التليفزيون..!!
** حقاً وصدقاً ويقيناً.. الصيام في شهر شعبان بيمنع الإنسان من ذنوب وبلاوي متلتلة.. ربنا يتقبل.. قولوا آمين.