إسعاد يونس: «كنا هنتحبس أنا ويسرا وعادل إمام بسبب فيلم الأفوكاتو»

كشفت الفنانة إسعاد يونس، عن كواليس فيلم "الأفوكاتو"، خلال ندوتها بمهرجان الجونة السينمائي في دورته السابعة، والتي تديرها الفنانة يسرا.
كواليس فيلم الأفوكاتو
وقالت إسعاد يونس في ندوتها بمهرجان الجونة السينمائي في ثاني أيام فعالياته: «في بداياتي كنت عايزة أثبت إني شاطرة، وكنت كل ما أدخل عمل بحاول أقدم أكتر حاجة عندي، واشتغلت مع ناس كتير، وأهم حاجة حصلت لي في الفترة دي إني اشتغلت مع يسرا، وكواليسنا كانت في الأفوكاتو صعبة جدا عشان المخرج والمؤلف كان عظيم».
وأضافت: «وماكناش فاهمين الفيلم، الوحيد اللي كان فاهم الفيلم عادل إمام، أفتكر إننا روحنا نصور في الإسماعيلية، وكان فيه حي جديد كدا ماحدش ساكن فيه، وقعدوا يشوفوا هنعقد فين، لحد ما لاقوا حاجة كدا، نازلين أنا ويسرا في أوضة مافيهاش غير حمام وحوض بس».
موقف طريف لإسعاد يونس ويسرا
وتابعت إسعاد يونس: «وبعدين خدونا لحي مهجور، دخلنا نصور خرجنا لقينا شعب الإسماعيلية كله، وكانت الدنيا بتمطر وكنا بنجري لحد ما دخلنا في مدرسة واتحبسنا جواها، لحد ما وقعت في إيدينا نسخة من الاسكربت، وقعدنا إحنا التلاتة نخرج مشهد تخيلي، والفيلم دا انتهى بمشكلة كبيرة وكنا هنتحبس أنا ويسرا وعادل إمام، لكن الفيلم في النهاية أصبح أهم أفلام السينما المصرية».