أنا الأستاذة رباب أخصائية نفسية في إحدى المستشفيات بدولة عربية شقيقة.. وبما إني مصرية فبيتوافد عليا كتير من المصريين طمعا في دردشة أو الفضفضة أكثر منها استشارة طبية.. وطبعا لأننا جميعا مغتربين وقصصنا وشكوانا بتدور في فلك الغربة.. فأنا أسميت عيادتي عيادة المغتربين.والنهارده قصتنا استشارة نفسية أكتر منها دردشة وفضفضة
(الحي الميت والميت الحي)
- صباح الخير يا دكتورة رباب
- صباح الخير.. إزيك يا لمياء.. اتفضلي بقالك كتير مابتجيش طمنيني عليكي
- تمام الحمد لله أنا كويسة .. بس حضرتك عارفة بقى الولاد والامتحنات ما قدرش أسيبهم
- المهم إنتي عاملة إيه؟ وأخبار المطبخ ووصفات الأكل إيه؟ بتطبخي كام وصفة جديدة في الأسبوع؟
- يعني 12..14 وصفة
- ليه؟ إيه اللي حصل مش كنتي اتحسنتي وبقيتي بتعملى 5 وصفات بس.. إيه اللي جد؟
- مفيش حاجة جدت.. كل حاجة زي ما هي
- طب إيه اللي حصل؟ لسه عايزة تنزلي مصر؟
- لا عايزة أروح أي بلد تانية
- ليه إشمعنى !
- خايفة ما أعرفش أعيش هناك.. أنا اخدت على الهدوء وإني أعيش مع نفسي كده.. ماليش في الاجتماعيات الأوفر وفي الرغي الكتير
-آخر مره كلمتي حد من صديقاتك كانت إمتى؟
- من 4 شهور
- إنتي وقفتي الدوا!
- أنا مش محتاجة دوا أنا تمام جدااا.. بطبخ وبعمل رياضة وكل حاجة تمام
- وجوزك سايبك كده ماجابكيش ليه؟ أنا عايزة أفهم؟!
- يجيبني ليه ده أنا بقيت زوجة فرفوشة على الآخر وكل يوم بطبخ صنف جديد.. وبضحك وبهزر وبعمل كل حاجة أنا تمام.. بقولك تمام
-آخر مرة عيطتي إمتى؟
- مش فاكرة
- من سنة من ساعة مامتك....
- أنا أصلا بكلمها كل يوم ما أقدرش ماكلمهاش
- لمياء إنتي واعية للي بتقوليه!
- عايزه تقولي إني اتجننت.. ليييه عشان بكلمها كل يوم.. أنا بقالي 12 سنة في الغربة.. كل يوم بكلمها ومش بكلم غيرها هي أمي وصحبتي وأختي وكل حاجة.. ليه مستكترين عليا أكلمها دلوقتي.. مستغربين ليه.. باسم كمان مستغرب.. زعل قوي لما دخل عليا لقاني بكلمها.. صمم يجيبني هنا.. مش فاهمة.. مش أحسن ما أكلم نفسي.. وبعدين أنا كويسة عايزيني أنزل مصر لمين وهي مش موجودة! اتحايلت على باسم كتير ينزلني استقر في مصر ما رضيش.. عايزني أنزل دلوقتي؟
-لازم ترجعي تاخدي الدوا
-أنا مش محتاجة دوا.. الدوا مش هيخليني أشوفها ولا أكلمها
- إنتي كده مش عايشة إنتي بتحاولي تمثلي إنك عايشة
- يا دكتورة.. الموت ترف لا قادرة أطلبه ولا عارفة أروح له.. إنتي مش شايفاني.. أنا تمامأنا تمام
خلصت حكايتنا النهاردة..
انتظروني في حلقة جديدة من عيادة المغتربين