تامر حسني يكشف تفاصيل مرض نجله: شوية سخونية كشفوا كارثة

كشف الفنان تامر حسني عن تفاصيل مرض نجله "آدم" الذي تعرض لوكعة صحية مفاجئة أدت إلى دخوله العناية المركزة مرتين.
قال "حسني"، في منشور عبر حسابه على موقع التواصل الاجتماعي "فيسبوك"، إن نجله تعرض لسخونية طبيعية، وبعد إجراء الكشف الطبي والفحوصات تبين وجود انفجار في الزائدة الدودية.
قصة مرض آدم تامر حسني
كتب "تامر" في المنشور: "هو عمل عمليتين كبار بسبب انفجار الزايدة المفاجئ، اللي كانت أعراضه سخونية عادية بس..
و بقولكم كده عشان تبقوا حريصين مع نفسكم أكتر وعلى ولادكم.. و مش كل سخونية تقولوا ده شوية برد وخلاص.. لا روحوا اكشفوا كويس و اعملوا سونار على البطن و الزايدة مرة و 2 عشان برضو ساعات مش بيبان".
واستطرد: "و لازم الدكتور يضغط بطريقة معيّنة، تقريبًا أقوى شوية عشان يعرف، لإني سمعت كتير اليومين دول إن الزايدة خادعة.. اطمنوا كذا مرة قبل لحظة انفجارها عشان بجد مشاكل بتحصل بعدها كبيرة و محزنة أوي".
ووجه الفنان في منشوره الشكر لكل من اهتم بالسؤال على نجله والدعاء له، فقال: "أنا مش عارف أشكركم إزاي على كمّ الدعوات اللي دعيتوها لربنا لشفاء آدم ابني اللي جاتلي منكم هنا و على تليفوني و تليفونات كل المحيطين بيا".
وتابع: "و حبيبي آدم عمل عمليتين صعبين أوي عليه وبدعواتكم مستنيين النتايج تكون خير يا رب و يعدي مرحلة الخطر يا رب، بحق (كن فيكون) اشفيه وعافيه، هو و كل ولادنا".
واسترسل حديثه عن نجله قائلًا: "بس هو راجل و هيتحمل وإن شاء الله ربنا يكرمه و يعافيه و يحفظه هو و إخواته و يحفظ كل ولادكم يا رب".
وأضاف موجهًا حديثه لجمهوره: "وأحب أقول تاني شكرًا من كل قلبي على دعواتكم.. أنا شايف قلب كل حد فيكم و هو بيدعي بصدق.. متشكر أوي يا جماعة شكرًا لكل اللي اهتم وسأل عن ابني و دعاله هنا أو على التليفون.. واللي طلعوله صدقات لشفائه من غير ما يعرفونا شخصيًا.. أنا مش لاقي كلام أشكركم بيه و أنا برضو بدعيلكم و بقول لكم مثلها وأضعاف أضعافها.. و ربنا يحفظكم ويحفظ أولادكم قادر يا كريم".
تم نسخ الرابط