روت إحدى السيدات للدكتور مبروك عطية، الداعية الإسلامي وعميد كلية الدراسات الإسلامية بجامعة الأزهر سابقًا، تفاصيل مشاكلها مع زوجها وزواجها من صاحبه زواجًا غير شرعيًا.
وقالت السيدة، خلال مكالمة هاتفية للدكتور مبروك في برنامج "الموعظة الحسنة" على قناة "دريم": "اتجوزت جواز صالونات من 14 سنة وعندي ولد وبنت، مقدرش أقول إن هو بشع أو هو كويس، لكن أنا مش متقبلاه، واتجوزته لأني مكنش ليا مكان أقعد فيه أو حد يصرف عليا فكان لازم أتجوز، ممكن أعدى كل أمور حياتي معاه، لكن في المعاشرة الزوجية بحس إني قاعدة جنب عفريت ومش متقبلاه رغم إنه إنسان مش وحش، وحاولت أحبه لكن مقدرتش، وهو حس دا مني، وحاولنا نتكلم كتير".
وتابعت: "وكنت أرتضيت إني أعيش كده بس فجأة من أربع سنين ظهرلي واحد صاحبه، وقالي إن هو مستكترني على جوزي، وإن هو بيحبني".
وأضافت: "واتطلقت من جوزي طلاق شرعي من غير ورق، والشخص التاني قالي أنا متجوز ومخلف ومقدرش أفتح بيت تاني، رغم أنه مقتدر ماديًا جدًا، وقالي حتى لو اتجوزنا هصرف عليكي انتي بس، وطليقك ملزم بولاده".
واستكملت: "بعد ما اتطلقت شرعي من جوزي، اتجوزت من الشخص التاني بدون ولي، وأصبح يعاملني معاملة قاسية، وغير مكتفي بيا أو بمراته الأولى، بس بحبه جدًا، وهو الوحيد اللي عرفته".
ليرد الدكتور مبروك عطية عليها قائلًا: "انتي محبتيهوش أبدًا، لكن انتي لقيتي متنفس لأنك مكتومة وتعبانة ومحتاجة الضحكة اللي من غير تمثيل".
وأردف: "والشخص دا مش صاحب جوزك لأنه لو صاحبه ميخنهوش، وميبعتش رسالة لمراته، يا إما هما الإتنين عجينة قذرة زي بعض لو كانوا فعلًا أصحاب".
وتابع: "هو لاقاكي ضعيفة واترميتي في حضنه، والزواج منه باطل لأنه بدون ولي، وكما قال الرسول: إيما امرأة تزوجت بدون ولي، نكاحها باطل".
وأكمل: "الراجل دا لازم يمشي ويبعد عنك لأنه متجوزكيش شرعي، وهو راجل ماشي ورا هواه".
ونصحها الداعية الإسلامي بأن تعود إلى زوجها أبو أولادها، ولا تدري لعل الله يحدث بعد ذلك أمرًا، لأن القلب سًمي قلبًا لتقلبه، "والبيوت لا تبنى على الحب، ولكن تُبنى على المصالح المُشتركة".
واختتم: "لا يجب أن نعالج الصح باعوجاج، خليكي مسلمة، وخدي موقف، ومفيش حاجة اسمها مقدرش أطلق، لأن مفيش حاجة اسمها اصرف عليا وانا مش هخليك تيجي جنبي، دا اسمه هبل، يا عشرة بمعروف يا فراق بأدب، ولو حصلتي على ورقة الطلاق هتقدري تتجوزي أي شخص غير صاحب طليقك لأنه لا يصلح للزواج".
DMCA
PROTECTED