إدوارد يكشف معاناته مع أول أيام كورونا

طمأن الفنان إدوارد، جمهوره عن حالته الصحية بعد إصابته بكورونا، وكشف عن المعاناة التي يعيشها، وذلك عبر صفحته على موقع التواصل الاجتماعي فيس بوك كواليس معاناته في أول يوم بعد إصابته بفيروس كورونا.
وقال إدوارد :"هحكيلكو علي أول ليلة مع الكورونا بما أنها أول مرة تجيلي وطلعت منها بايه، ليلة صعبة جدا تعب في الجسم ذي ما يكون حد بيعذبك وبيدوس علي كل حته في جسمك وصداع نفسك يغمي عليك عشان تخلص منه ورعشه فظيعة".
أضاف: "وطول الليل بقول يارب مش هنكر في لحظة فكرت في الموت والناس اللي ماتت من الكورونا ، صدقوني ماخوفتش من الموت خوفت علي مراتي وولادي وعيلتي ، وانهم مسئولين مني ولازم ابقي موجود عشانهم ولازم اصلي لربنا عشان يقومني اكمل وحسيت اني فقدت شغف كل متع الحياه ".
تابع :"مش عاوز حاجه عاوز اكون كويس عشانهم بس انا من النوع اللي بحب الناس وبحب الحياه وبحب الاصحاب انبسط كتير اوي لما لقيت ناس كتير سالو عليا اعرفهم وماعرفهمش وعاوزين يساعدوني في محنتي باي شكل ومنهم فنانين كبار بجد و اعلاميين كبار".
أشار:" ربنا يباركلكم في صحتكم وعيليتكم كمان اكتشقت قد ايه مراتي انا غالي عندها موش هممها كرونا ولا موش كرونا قاعده جنبي تعملي كل حاجه تريحيني قد ايه انتي ست عظيمه جالك كرونا ومقولتليش السنه اللي فاتت عشان كنت بشتغل وموش عاوزه تشغليني بيكي مكنتش عارف انها صعبه للدرجه دي بجد انتي جبل انكً استحملتي وكنتي واقفه كمان تخدمينا وتشوفي طلبتنا ".
اختتم :"انا اسف اني محستش بيكي في الوقت ده اوعدك اقوم واعوضك عن كل ده الحياه موش مستاهله غير انك تعيش مع ناس بتحبها وتحبك وتخاف عليك دي الخلاصه اني فقدت الشغف في متع الحياه عاوز اعيش مستور انا وعيلتي ويكون حواليه ناس بحبها وبتحبمي ونتمني لبعض الخير وبس في ليله واحده الدنيا علمتني كتير ربنا يبعد عنكم اي حاجه وحشه".
كشف الفنان إدوارد عن تطورات حالته الصحية بعد إصابته بفيروس كورونا من خلال منشور عبر حسابه بموقع التواصل الاجتماعى فيسبوك .
وكتب إدوارد: "أسوأ يوم عدى عليا فى حياتى .. يارب أشفى كل مريض ".
اعلن الفنان إدوارد إصابته بفيروس كورونا من خلال حسابه على موقع التواصل الاجتماعي فيسبوك وكتب:" إيجابي".
على جانب أخر كان الفنان إدوارد، قد احتفل بعيد زواجه ، ونشر صورة له مع زوجته عبر صفحته الرسمية على موقع التواصل الاجتماعي للصور والفيديوهات إنستجرام.
وعلق إدوارد ، على الصورة قائلا: " كل سنة وحنا مع بعض ربنا يخليكي لينا يا أغلي ما في حياتي".