آخر كلمات طلعت السادات: خلصنا من عز والشاذلي.. فرجعولنا تاني بس مركبين دقون

'إن مكانشي دكر ماتنتخبهوش..أنا جايب رجالة في قائمة حزبي، لابد من تجاوز هذه المرحلة حتى نشكل دولة تصنع مؤسسات، فللأسف مصر بتتعرى من ولادها، وخلصنا من أحمد عز، فجالنا تاني أحمد عز وكمال الشاذلي اللي مركب دقن'، كانت هذه آخر كلمات طلعت السادات المعارض البارز ونائب مجلس الشعب السابق والذي توفي صباح اليوم بأزمة قلبية مفاجئة.

جاء ذلك فى بيان صادر عن حزب مصر القومي الذي كان يرأسه السادات ، وجاء فيه أيضَا أن الحزب عقد مؤتمرًا انتخابيًا لمرشحيه ليلة أمس في حي الخليفة وحضره السادات، وأن الأهالي استقبلوا السادات بهتافات تأييد ومن جانبه قال السادات للحضور : 'إن مكانشي دكر ماتنتخبهوش' في إشارة منه لرؤيته لقوة مرشحيه وعلى رأسهم علاء السقطى ( رئيس جمعية مستثمرى بدر )، وأضاف :' أنا جايب رجالة في قائمة حزبي'.

وعن الظروف الحالية التي تشهدها مصر قال: لابد من تجاوز هذه المرحلة حتى نشكل دولة تصنع مؤسسات، فللأسف مصر بتتعرى من ولادها، وخلصنا من أحمد عز، فجالنا تاني أحمد عز وكمال الشاذلي اللي مركب دقن وهما عارفين إنهم بيعروا مصر، وهي أرض طاهرة وأن الاحتياطي النقدي حيخلص كمان أيام ومستمرين في تخريب الدولة، وهذا سببه حكومة فاشلة جاية تشرب شاي وتروح، وفيه ناس يتقبض وعاملة نفسها بتحارب الفساد، ومهانش على عصام شرف إنه يطلع ويقول أسماء الناس اللي خدت فلوس، وكل واحد دلوقتي تكلمه يقولك أنا جاى من التحرير واللي يقولك أنا جاي من العتبة، والحقيقة فيه مجموعة عايزة توصلنا إننا نخرب مصر بإيدينا'.

وحسب بيان الحزب فإن السادات أكمل قائلا: 'عصام شرف وحكومته تستدين بفائدة 14 %، رغم أننا ليس لدينا شيء أو تجيب النسبة دي كي نسددها، المصانع في 6أكتوبر أغلقت والخراب جاي جاي بسبب أن مجموعة في الميدان تتحكم في مصير شعب مصر، أمريكا فرحانة عايزة تقسم مصر لحتت، وبيساعدهم الناس اللي كانوا بيقاطعوا المياه الغازية، وأنا بقولهم بطنهم اتنفخت من الغازات، أيام زمان لما الأب كان بييجي من الشغل كان عياله بيفرحوا بيه عشان بيجيب لهم حاجات، دلوقتي بيطلع وبينزل ساكت عشان مبيجبيش أي خير معاه، وطالب السادات بتفعيل دور المرأة وقال إن عليها دورًا كبيرًا في النهوض بالمجتمع وأن تعمل لصالح بلدها'.

وداعب السادات النساء الحاضرات 'انتوا بس فالحين تتشطروا علينا في البيت، وبره البيت مش سامعين لكم صوت'.