الفنان ملوش مستقبل.. هالة صدقي تكشف عن رأيها في فكرة دخول أولادها مجال الفن

كشفت الفنانة هالة صدقي عن رأيها في فكرة دخول أولادها مجال الفن، خلال ندوة تكريمها في الدورة ال12 من مهرجان الأقصر للسينما الأفريقية، قائله: لما بيجيلي حد من أصحابي عايز يدخل المعهد بنصحة أن لأ عشان هتعمل إيه، أنا لو ولادي هقولهم لأ مش هينفع لأن أنا مليش مستقبل مليش ضمان مليش تأمين ولا معاش لو أي فنان جراله حاجة في أي لحظة اتركن وقعد، لو فنان عمل أي غلطة في حياته الناس بتقفل منه، الفنان عامل زي لاعيب الكرة لو اتخبط خبطة حياته انتهت.


هالة صدقي: بشفق على كل زملائي

وتابعت هالة صدقي: بشوف نماذج الناس الكبار القدام كلهم اتوفوا وهما معندهمش رصيد مادي وأغلبهم بندور لهم على حد يتكفل بيهم أنا بشفق على كل زملائي لأن الفنان بيبقى عنده عزة نفس وكرامة بعد ما كان نجم ازاي هيطلب مساعدة أو هيقدم دور صغير، أنا ادعي أني صديقتهم كلهم في ناس كتير زملاء تعبانين وقاعدين في البيت ومش فنانين بس في كتاب ومخرجين كبار قاعدين في البيت مبيشتغلوش، احنا المنارة الثقافية لبلدنا أنا مش ضد الشباب لكن فين الكتاب الكبار طيب هو هيصرف على نفسه وأولاده إزاي؟.


هالة صدقي تنصح الفنانين

ووجهت هالة صدقي نصيحة للفنانين أن يكون لهم مصدر رزق من خلال مشروع آخر، موضحة أنها بدأت بالفعل في مشروعها الخاص وقالت: مهم يكون للفنان مشروع خاص وأنا بعمل مطعم لأن الفن الحكاية اختلفت في صفحة اتقلبت وأنا بنصح أي فنان يعمل مشروع غير الفن.

هالة صدقي عن المسرح

كما تحدثت هالة صدقي عن سبب عدم مشاركتها في أي عروض مسرحية خلال الفترة الماضية رغم تلقيها لعروض، قائله: أنا عاشقة للمسرح وأتمنى العودة إليه والفترة الأخيرة كان في عروض مسرح كتير لكن ده مش مسرح إحنا بنروح نعمل اسكتشات.


هالة صدقي: لازم يبقى في شوية كنترول للفرق المسرحية

واختتمت هالة صدقي: حتى لو في جمهور للفن المصري والفنانين المصريين، لازم يبقى في شوية كنترول وتنظيم للفرق المسرحية اللي بتسافر تعرض في البلاد العربية لأن في الآخر اسمها فرق مصرية، مهم أوي أننا نعرف أحنا بنقدم إيه ونستغل الفرصة أن في جمهور عايزنا، لما احنا بنعمل عرض لمجرد أن يومين 3 وقرشين وخلاص دا يقطم لك السكة اللي بعد كده وبدل ما أنت بتاخد قرش هتاخد 10 بس اثبت وجودك، مش التفكير المادي هو نمرة واحد، أنت هتقدم إيه عشان تحقق ماديا بعد كده، لكن للأسف في حالة استسهال وتسيب شديد جدا.

أحدث أعمال هالة صدقي

ومن ناحية أخري، تشارك الفنانة هالة صدقي في رمضان 2023 في مسلسل "جعفر العمدة" مع الفنان محمد رمضان، زينة، إيمان العاصى.


قصة مسلسل العمدة

وتدور أحداث مسلسل "العمدة" في حي السيدة زينب، ويلعب محمد رمضان شخصية "جعفر العمدة"، المتزوج من أكثر من سيدة، ويعاني من ألم شديد بسبب اختطاف ابنه منذ 20 عاما، ونتابع رحلة بحثه عن ابنه للتأكد من وجوده على قيد الحياة، ومن جهة أخرى يقنع "جعفر العمدة" زوجته بوفاة ابنه، ويصحبها لقبر فارغ لقراءة الفاتحة على روحه.

أبطال مسلسل "جعفر العمدة"

ومسلسل "العمدة" تأليف وإخراج محمد سامى وشارك فى السيناريو والحوار مهاب طارق وإنتاج شركة ميديا هب سعدى - جوهر، وبطولة محمد رمضان، زينة، إيمان العاصى، هالة صدقى، مى كساب، أحمد داش، منة فضالى، هيدى كريم، فريدة سيف النصر، تامر عبد المنعم، طارق الدسوقى، وعدد آخر من الفنانين، وتدور الأحداث فى إطار اجتماعى شعبى.