بهاء الدين محمد عن أغنية "تنسى واحدة": حذرت عمرو دياب من تصويرها

أوضح الشاعر الغنائي بهاء الدين محمد، عن تفاصيل جديدة، تخص أغنية "تنسى واحدة"، التي قام الفنان عمرو دياب بطرحها عام 2004، مُشيرًا إلى أنه كان رافضًا لفكرة تقديمها في فيديو كليب، وذلك من خلال حسابه الشخصي على موقع التواصل الاجتماعي "فيسبوك".
وكتب بهاء الدين محمد منشورًا، قال فيه:" كل واحد مهما عاش حكايات، أو عاش حكاية مبسوط فيها وراضي بيها، برضه في خياله واحدة سابت علامة في قلبه، بيفضل طول العمر فاكرها، يا بخير يا بجَرح".
وتابع بهاء الدين محمد قائلاً:"ومهما قابل أو عمل نَفسه ناسي، بتبان عليه، وخاصة لو في حياته واحدة بتحبه، وعارفة ماضيه؛ بتبقى مشاعره مكشوفة ومتشافة، رغم المجهود اللي بيعمله علشان يبان ناسي، وكل حد بيقرأ الكلام ده دلوقت، عارف مين هي، وهي عارفة إنها هي، وعارفة مين حَبها، وسابتله حاجة يفتكرها بيها لحد آخر لحظة في حياته، شبكة اتصال جبارة وغير مرئية للعين، وعالم النَفس بحار كلها أسرار".
وأضاف بهاء الدين محمد قائلاً:" وهو ده ملخص فكرة أغنية تنسى واحدة، ولما عمرو دياب قال لي هنصورها؛ قولت له بلاش، ضحك وقال لي، أول مرة أشوف شاعر مش عايز يصور أغنيته".
واختتم بهاء الدين محمد كلامه قائلاً :" قلت له كل واحد في خياله واحدة، وكل واحدة عارفه إنها في خيال واحد، ولما تتلخص الواحدة دي في بنت موديل، مهما كانت جميلة، وكلها إحساس؛ هتقلل من حالة الأغنية، يعني نسيب الأغنية تبقى كل واحدة بتسمعها شايفه نفسها هي البطلة فيها، وبرضو كل واحد شايف حبيبته هي بطلة الأغنية، وكده نبقى حافظنا على خصوصية الفكرة، وعشان كده كل اللي بيسمعها بيعيش بيها وفيها، وبيلاقي فيها حكايته اللي مش ناسيها ولا هينساها".