أوضحت الفنانة ياسمين غيث أنها تعرضت للتحرش في المرحلة الثانوية من أحد المدرسين، لافتة أن هذه الواقعة كانت سببًا في تركها للمدرسة،وذلك من خلال حسابها الشخصي على موقع الصور والفيديوهات "إنستجرام". نشرت الفنانة ياسمين غيث مقطع فيديو جديد لها حكت خلاله عن تفاصيل تعرضها للتحرش في المرحلة الثانوية، حيث قالت:"أنا حصلتلي حادثة وأنا في تانية ثانوي اذيتني وعشان كدة أنا فكراها لغاية دلوقتي المدرس اللي كان بيدرسلي كيمياء كان سبب إني اكره المادة والمدرسة، كان من النوع اللي بيلمس بطريقة مش مريحة و بيعمل ده مع أي بنت وكان معروف ومحدش خد معاه اي إجراء لأنه كان في منصب كبير في المدرسة ولما حاول يمسكني بطريقة مش مريحة مسكتش وهزقته". وأشارت ياسمين غيث أن عدم اتخاذ المدرسة إجراءات ضد ذلك المدرس كان سببًا قويًا في تركها للمدرسة، لافتة إلى أنه كان متزوجًا من إمرأة شديدة الجمال، فلا يوجد داعي لتبرير التحرش، حيث قالت:"كانت بالنسبالي صدمة كبيرة عشان المدرس كان أكتر حاجة ببصلها باحترام لكن رحت قولت لأمي ورحنا اشتكينا لمدير المدرسة ومفيش أي حاجة حصلت و المدرس سقطني في المادة وكانت النتيجة إني مشيت من المدرسة، وعلي فكرة المدرس ده كان متجوز واحدة زي القمر، مفيش سبب أيا كان لتبرير التحرش". وعن قضية التحرش الأخيرة التي أحدثت ضجة كبيرة على مواقع التواصل الاجتماعي، قالت:"القضية دي اتعرفت عشان ظهرت علي السوشيال ميديا لكن في كل يوم حوادث بتحصل لبنات وفي منهم اللي حياتهم بتدمر بسبب ده وفي منهم اللي بينتحر وفي اللي بيخاف يتكلم"،وطالبت الفتيات بعدم السكوت على المتحرشين وضرورة تقديم بلاغات للشرطة ضد المتحرشين لاتخاذ الإجراءات القانونية اللازمة ضدهم. وعلقت ياسمين غيث على الفيديو قائلة:"كل ست في العالم حصل لها تحرش بطريقة أو بأخرى، وما ينفعش تسكتي، قولي ماتسكتيش إتشجعي و إفضحي اللي آذاكي علشان يتأذى هو كمان، حتي لو آذاكي معنويًا فقط".
