حسام باولو .. عندما يتحقق الحلم في سن ال 30

اختبر في الأهلي .. فشل
اختبر في الزمالك .. فشل.. لأ وكمان بيختبر معاه 4 لاعبين اتاخدوا الأربعة وهو لأ!
ساب الكرة ولعب كرة طائرة .. بس الموهبة بتفرض نفسها.. رجع تاني للكرة

راح طوخ فريق في الدرجة الثالثة كان بيفتح التلفزيون يتفرج على المهاجمين بتوع الدوري المصري والمنتخب زي عماد متعب وعمرو زكي وميدو..

كان بيقول لنفسه أنه لو خد الفرصة هيبقي الهداف..
إبراهيم يوسف مدرب غزل المحلة كان في الدوري الممتاز ساعتها قاله تعالى اعمل فترة معايشة عندنا .. وافق انه يعمل ده وراح للغزل على طول.. في نفس الوقت محمود الشامي عضو مجلس إدارة الاتحاد المصري السابق والمنتمي لنادي بلدية المحلة طلب انه يروح البلدية نادي في القسم الثاني مقابل 50 الف جنيه .. كان مبلغ كبير جدا خصوصًا ان أغلى لاعب قبله مشي من طوخ ب 4 الاف جنيه وشوية كور..

طبعا باولو كان نفسه يلعب في الممتاز فكان محتار مش عارف غزل المحلة هتخلصه ولا لأ؟ كلم الناس في غزل المحلة عشان يحددوا موقفهم سواء بضمه او انه يمشي ويروح للبلدية .. المهم إبراهيم يوسف قاله هنعملك ماتش قدام رئيس النادي وان شاء الله تعجبه ونضمك للفريق .. محمود الشامي عرف الكلام ده وزعل فقرر انه ميضمش باولو .. الغريب أن كمان محصلش نصيب في غزل المحلة..

كان بياخد ساعتها 50 جنيه.. حضرتك متخيل؟ يعني ايه 50 جنيه في الشهر.. راح لرئيس نادي طوخ قاله انا عايز إمشي؟ راح رئيس النادي قاله هات 50 الف جنيه علشان تمشي.. قاله لأ انا اقعد في البيت احسن .. وفعلا ساب الكرة وراح قعد في بيته..

الصدفة خلت هشام عبد الرسول يسأل وكيل لاعبين عن مهاجم كويس وعرض عليه حسام باولو ونزل ماتش ودي وجاب جول وراح سكر ابو قرقاص فريق في الدرجة الثانية وكان ساعتها عنده 28 سنة..

عنده 28 سنة.. ولأول مرة يلعب في الدرجة الثانية.. اوعى تقول أنك كبرت ومستحيل تحقق حلمك؟ طالما انت واثق في نفسك وفي قدراتك وفي موهبتك.. كمل طريقك ..

ملعبش اول موسم مع سكر ابو قرقاص كثير بس جاب 5 اجوال .. الموسم الثاني بقى هداف المجموعة ب 16 جول .. راح بعدها سكر الحوامدية وبعدها الشمس .. ومنها للدوري الممتاز وهو 30 سنة .. ومنها هداف للدوري موسمين.. ثم لاعبا في الزمالك ثم لاعبا في منتخب مصر ثم رحيل عن القلعة البيضاء .. حياة باولو بدأت بعد ال 30 ..

صدقني أنت لسة مكبرتش.. تقدر تنجح وتكسر الدنيا.. خليك واثق في نفسك.. باولو كان محتاج فرصة.. ولحد ما خد الفرصة دي لو كان في يوم استسلم.. كان خسر كل حاجة..