د.دينا أنور تكتب: لازم ندفنها حيّة !!!!!!

في كائن مزعج كده إسمه الأُنثى،عندنا رعب من مجرد ذكر إسمه،هوا سبب كل المصايب والكوارث اللي فيها المجتمع،كائن كده بنكرهه من قبل مانشوفه،أي واحدة حامل بتفضل عايشة في حالة رعب يحسن تجيب للدنيا نسخة جديدة من الكائن ده الغير مرغوب فيه بالمرّة،كائن كده لابيشيل إسم العيلة ولا بيبقا عزوة لأهله ،كائن أول ما بينزل للدنيا أمٌه بتحس إن حيطة إتهدت عليها.
زمان كانوا عمليين أكتر مننا،كانوا بيدفنوا البنات أحياء على طول،بيخلصوا نفسهم من همها ومشاكلها اللي مابتخلصش،مش عارفة ليه دلوقتي بقا عندنا تهاون في التعامل مع الكائن الأنثوي ده،ليه بنسيبهم يفضلوا عايشين بحجة الدين والأخلاق وأحنا من جوانا بنكون زعلانين من وجودهم ومستنيين اليوم اللي هنرتاح منهم ونلاقي حد تاني يشيل مسؤوليتهم.
البنت من دول تلاقيها كده فاكرة نفسها إنسانة عادي كده،عاوزة تعيش وتلعب وتفرح زي الصبيان!!!! مش فاهمة إزاي تتجنن وتفتكر كده،مش كتر خيرنا أساساً إننا سايبينها عايشه؟؟!!تيجي تجيبي للولد عجلة تلاقيها عاوزه عجلة زيه، أخوهاييجي يلعب لعبة التسلق والراجل يقول اللعبة دي مش للبنات تلاقيها زعلت!!! حاجة غريبة جداً،معقول هيا فاكرة إنها طفلة ومن حقها تلعب وتعمل مغامرات زي الولد،هيا إزاي مش عارفه ان رجليها لازم يفضلوا مضمومين على بعض ومقفولين بقفل حديدلحد ماييجي الفاتح العظيم ويدفع تمن القفل وساعتها هيبقا مطلوب منها تتحول من زاوية حاده إلى زاوية منفرجة 180 درجة!!!!
تيجي تكبر شوية تبدأ تحسد الصبيان إنهم بيخرجوا ويتأخروا براحتهم،تلاقيها بكل بجاحة بتسأل إشمعنا أخويابيتأخر بمزاجه وأنا لازم أروح بدري،كمان تقارن نفسها بأخوها اللي كبر وبقا راجل ملو هدومه ومن حقه يرافق البنات ويسهر يكلمهم في التليفون ويتمنظر عليهم بعربية بابا وماما،وتلاقيها قال إيه عاوزة تحب وتتحب؟؟!! مش أحسنلها تقعد تتعلم الطبيخ وشغل البيت عشان نلاقي راجل نلزقهاله تخدمه وتخدم عيلته ويشيل عننا هم أكلها وشربها وكسوتها،وكمان يريحنا من رعب شرفها اللي بسببه مش بننام الليل؟؟!!!
المشكلة يا سادة إن الكائن الأنثوي ده صوته علي وإبتدا يطالب بحقوق ومساواة وكلام فارغ كده،بعض منهم إبتدوا يتجننوا ويفتكروا إنهم بني آدمين كاملين ومستقلين ومش من حق حد يتحكم فيهم،عشان كده أنا شايفةإن الغول بيكبر،وإحنا اللي سبناه يكبر لما أديناهم حق الحياة من البداية.
أنا أدعو كل الناس اللي كائن الأنثى بيسببلهم رعب وهلع لما بيطالب بحريته وحقوقه إنهم يدفنوهم أحياء من البداية ويخلصوا نفسهم،وإنتي ياستي ياللي بتجري عالدكتور كل شوية عشان تعرفي هتخلفي ولد ولا بنت ،أنصحك أول ماتعرفي إنها بنت روحي نزليها على طول قبل ما خيبتك تتعرف ويعايروكي بخلفة البنات،وإنت يا اللي عامل نفسك متدين ورضيت بالهم ومضطر تربيها عشان تدخل بسبب عبء تربيتها الجنة،أرجوك ماتعملش في نفسك كده،إجري إسمع شيوخ إغتصاب الأطفال وإقنع نفسك إنها ممكن تطيق النكاح وهيا لسه طفلة وجوزها لأي كلب ينهشها عشان إنت راجل تعرف ربنا ومش بتخالف أوامر مشايخ النكاح.
ياجماعة خليكم متسقين مع ذاتكم،ماتسيبوش البنات تعيش،إنتم ليه سايبينهم يعيشوا وإنتوا من جواكم مقتنعين إنهم أكتر من الهم عالقلب وإن قلتهم أحسن.
يلا زي ما كل تصرفاتنا وأخلاقنا وسلوكياتنا بقت همجية ووحشية وأقرب للجاهلية،يلا نطلق حملة العودة الشاملة للجاهلية لأن كل محاولات التنوير في المجتمع ده مش جايبة نتيجة،يلا نرجع ندفن البنات أحياء زي زمان،يلا نوئد فرحتهم واحلامهم وحقهم في الحياة من يوم ولادتهم بدال مايعيشوا وسطنا ويضايقونا،لأننا مجتمع لايستحق المرأة الكاملة ،نحن مجتمع ناقص يرى المرأة ناقصة ويبالغ في تغطيتها لكي لا يعرِّي هوسه بجسدها وحلمه في مشاركتها الفراش،
لازم مانجيبهاش للدنيا أساساً،لازم نحارب وجودها قبل حقوقها،لازم ندفنها حية!!!!!!!!!