هاشتاج #الإعدام_لكل_متحرش يشعل "تويتر".. ناشطة: بنات مصر خط أحمر.. وأخرى: "إعدم المتحرشين يا سيسى وإنصف شرف مصر"

* هاشتاج #الإعدام_لكل_متحرش لمحاربة جريمة التحرش
* ناشط: "لو الإعدام اتطبق هتلاقي الدنيا كلها اتعدلت"
* آخر: "والله باخاف على أمي إنها تنزل شغلها"
* ناشطة: "إعدم المتحرشين يا سيسى وإنصف شرف مصر"
دشن مستخدمو موقع التواصل الاجتماعى "تويتر" هاشتاج "#الإعدام_لكل_متحرش" لمناشدة أجهزة الدولة والرئيس الجديد محاربة جريمة التحرش التى تفشت فى المجتمع المصرى.
واشتعل "تويتر" بتعليقات المستخدمين من أجل الوصول لحل لجريمة التحرش عبر تغليظ العقوبات في القانون الحالي، حتى وإن وصلت العقوبة للإعدام، حيث قال محمد إبراهيم: "لو حكم #الإعدام_لكل_متحرش اتطبق، هتلاقي الدنيا كلها ابتديت تتعدل".
وقالت صابرين مصطفى: "بنات مصر خط أحمر #الإعدام_لكل_متحرش"، وأكد ياسر محلاوى أن الإعدام مطلب شعبى، حيث قال: "#الإعدام_لكل_متحرش طلب شعبي والله باخاف على أمي إنها تنزل شغلها".
وقالت هدى صادق: "إعدم المتحرشين يا سيسى مش عايزين حد يدافع عننا عايزين حقنا يبقى قانون يمشى على الكل.. إعدمهم وإنصف شرف مصر"، ووافقها الرأى عبود حنا فقال: "شعب مصر يصرخون إليك يا سيسى.. أصدر قانونا لإعدام المتحرش وسوف تنظف البلد والمرأة نور عينيك هتمشي فى أمان فى مصر".
وقالت مديحة غنيم: "على فكرة مش عايزين نتشد يومين وبعدها ننسى الموضوع عايزين نكبر الموضوع لغاية ما ياخدوا الإعدام.. عايزينها تكون قضية رأي عام عشان إحنا بننسى بسرعة #الإعدام_لكل_متحرش"، وقال منتصر بكرى: "أطالب بالقبض على من صور وروج لفيديو التحرش وأن ينال نفس العقوبة #الإعدام_لكل_متحرش".
فيما قالت داليا حسن: "#الإعدام_لكل_متحرش أي بنت هتشتم الولد اللي بيتحرش بها لفظيا هيترعب لأن الدنيا هتتلم عليه"، وأكدت مريم سعد: "#الإعدام_لكل_متحرش وفي ميدان عام..! أصلنا عايشين في غابة!"، وغرد سيد الصعيدى: "الجلد أمام العامة عقاب شديد يجب أن يطبق.. عقاب شرعي وفعال في ردع الآخرين #الإعدام_لكل_متحرش".
تجدر الإشارة إلى أن ميدان التحرير كان شهد بعض حالات التحرش مساء يوم الأحد الماضى، حيث استغلت بعض العناصر الإجرامية زحام المواطنين ووجودهم للاحتفال بتنصيب الرئيس الجديد للبلاد، وتحرشوا ببعض الفتيات بالميدان، ومزقوا ملابسهن في محاولة من الجناة لإفساد مظاهر الاحتفال بالاستحقاقات السياسية التي تشهدها البلاد.