هنادي مهنا: وزني زاد بسبب الدلع والمسقعة والمحشي

كشفت الفنانة هنادي مهنا، سر رشاقتها وخسارتها لوزنها، قائلة : " كلنا بنروح في فترات إكتئاب أو ضغط، وزنه بيزيد مش بيعرف ياخد باله من نفسه أو بتخليه ياكل كتير، وأنا عايشة في أسبانيا وقت الجامعة كنت بتحرك كتير أوي، ومكنش فيه حد بيطبخ فكنت رشيقة ".
وأضافت هنادي مهنا، خلال " برنامج " كلمة أخيرة " الذي تقدمه الإعلامية لميس الحديدي على شاشة ON"، أن : "لما جيت مصر كان فيه دلع كتير أوي، محشي وحمام ومسقعة، ودي حاجات ماينفعش تتساب وماتتكلش".
وأكملت هنادي مهنا، أن : " كنت بدرس في أسبانيا في مجال هندسة الصوت في مجال الموسيقى، لاني كنت بحب المزيكا أوي، وكان حلمي أني أغني قبل التمثيل واكتسبت ده من الجينات من أبويا ".
واصلت مهنا، أن :"لما جيت مصر اشتغلت مدرسة ، ودرست كذا حاجة وكنت فاتحة شركة مع بابا، وأنا بحب أشتغل من صغري، ومش بحب أقعد في البيت، ومش بعرف أقعد في البيت ".
استطردت : " لما اشتغلت ممثلة مكنتش مستوعبة طبيعة الشغلانة، وأن الشغل موسمي ممكن يبقى مكثف شهرين متتالين، ثم شهرين آخرين قاعدين في البيت مش بنعمل حاجة، ودي كانت حاجة بالنسبة غريبة، وكنت بقول فيه حاجة غلط لاني متعودة على الشغل اليومي وأني أنام وأصحى عشان ورايا شغل ".
أكملت :" أول مامثلت الدنيا مامشيتش أوي، وفضلت سنتين أشتغل ومافيش حاجة تذاع لحد أول عمل، وهو افراح إبليس الي لسه معروض قريب، رغم الانتهاء من تصويره منذ فترة طويلة، وعملت كمان فيلم ووقف كل ده سببلي في فترة من الفترات، اكتئاب وكنت قاعدة في البيت فقعدت أكل".
وكشفت عن أن جمهور السوشيال ميديا وقتها إنتقدها وكان حقهم، وأنا في الاساس شكلي كان زي دلوقتي، بعد فقد الوزن، لكن الفترة دي كانت سبب في زيادة وزني حينها ".