حاسه أني هاموت عندي وجع في كل جسمي .. رسالة جديدة من ريهام سعيد

وجهت الإعلامية ريهام سعيد، رسالة جديدة لجمهورها عبر صفحتها الرسمية على موقع التواصل الاجتماعي "فيسبوك".
وكتبت ريهام سعيد ،" شكرا على كل الحب ده بس للتوضيح انا لو عايزة اشتغل ماكنتش سبت النهار ولو عايزة اشتغل كنت عملت برنامج على اليوتيوب أو اشتريت هوا في أي قناة. اظاهر الرساله وصلت غلط. انا مش حسه اني هاموت عشان مش بشتغل مذيعه انا حسه اني هاموت بجد عندي اوجاع في كل جسمي مش بقدر اخرج كتير مش عايزه اكلم حد لان كل الناس وحشه اوي اوي معنديش رغبه اني اعيش وحسه اني هافارق اولادي قريب. انا معنديش اصحاب أو اكتشفت أن معنديش اصحاب، انا تعبانه من الظلم إلى اتظلمته تعبانه من الحرب إلى شغاله لغايت دلوقتي».
واضافت:«اي حد بيطلبني في برنامج حتي كضيفه بيعتذر لي بعدها. بترشح في مسلسلات بترفض. انا ممثله مسرح بعد ما جالي عروض اختفت الصحافه على طول مصدره الوحش أو الغلط زي ما يكون في حمله للقضاء على اسمي من مين معرفش».
وتابعت: «ده غير كل التهم إلى اتهمت بيها وهي كلها ظلم في ظلم. انا مش زعلانه اني مش على الشاشه انا زعلانه على عمري إلى راح من غير تقدير زعلانه على الايه المقلوبه زعلانه على النفوس الكدابه المفتريه إلى حوالينا زعلانه من الحرب إلى ضدي الغير مبرره زعلانه أن مصير البني ادم بقي بيتحدد بناس قاعده ورا اجهزه أو ماسكين تليفونات بيتسلوا على اذيه البشر، زعلانه على البهدله إلى شفتها. انا عندي 3 محاضر لغايت دلوقتي منهم واحد متهمه فيه اني دبحت التعلب ومحضر تاني من 2017 يعني من 5 سنين ظهرت صور راجل مذبوح من غير وشه في البرنامج تعبت والله. بما اني مش هارد تاني كل الحكايه متلخصه في الاتي: 22 سنه في عربيه ميكروباص ولو محظوظه عربيه نيسان كاوتشها نايم بتقف اكتر ما بتمشي بلف مصر كلها عشان اوعي الناس مكنتش بنام ولا دقيقه. عملنا مستشفي اطفال مصر، عملنا مدرسه لذوي الاحتياجات الخاصه، اول واخر ناس تعمل فريق طبي عشان جراحات الدمور في المخ وخلافه».
وأكدت ريهام: «عرفنا الناس يعني ايه زرع قوقعه وقاومنا الصم والبكم. عالجنا اعداد رهيبه من الشباب من الادمان. كل ده بالورقه والقلم موجود. سفرنا 650 طفل بره مصر كانوا واخدين رفض من جميع مستشفيات مصر عشان عمليات قلب غير عمليات القلب داخل مصر و، النتيجه ايه؟ سجن 45 يوم بلاش اقول حصل فيهم ايه وبهدله محاكمات عمال على بطال. هجوم من الصحافه طول الوقت، تشويه سمعتي وصورتي ادام الناس. صرفت كل فلوسي محامين وقضايا عشان افضل جنب الولادي ده غير فلوسي إلى ماخذتهاش. عروض الشغل ماتمشيش خالص مع كفاءتنا أو نجاحاتنا. انا كل الكرو بتاعي مش لاقي شغل إلى عايز يشتغل سواق وإلى».
وتابعت: «مش عايزه اتكلم عشان مايزعلوش ليه؟ ليه كل ما حد يقول كنت بشتغل في صبايا يترفض؟ برنامج عمل مشاكل؟ كذب كله كذب وافتري ولا حاجه صح ولو غلطنا مع انه محصلش كل الناس بتغلط احنا بس إلى بنتحاسب. يمكن نجحتوا تنسوا الناس تعبنا لكن ربنا مش هاينسانا عشان اعلم بنيتنا .و الله ما هينسانا. على فكره حتي لو مكنتش اشتريت راحه البال واعتزلت مكنش هايجيلي شغل مع أن في ناس علئ الشاشه مايعلم بيها الارينا .... ليه معرفش. المواضيع إلى صبايا بيقدمها خلاص مبتتقدمش دلوقتي والدوله فعلا عامله إلى عليها من خلال كل المبادرات. عرضنا نعمل أي برنامج تاني كانت القنوات بتصمم على صبايا. رساله للكرو بتاعي المخلصين إلى فاضلين لو ممتش اوعدكوا أن ربنا هايرزقنا بحد ربنا هايختارهو ضميره صاحي يخلينا اقوي من الاول ولو مت ربنا مش هاينسا احنا عملنا ايه والله اجرنا عند الله. عارفه أن احنا ولا اتقدرنا ادبيا ولا عملنا أي فلوس لكن ربنا كبير. ادعولي اقوم. ادعولي الاوجاع إلى عندي تروح إلى الدكاتره مش عارفين سببها. ادعولي اقف على رجلي تاني حتي لو ايامي قليله. لو مت يبقي إلى قتلني الظلم. إلى هايقول بتمثل وإلى هايقول بتستعطف والله ما هممني.يتفلق .لو في واحد سامعني وًحاسس بيه يدعيلي عشان انا بجد تعبانه اوي ومش هاستسلم وهاحاول اقف على رجلي».
يذكر أن آخر أعمال ريهام سعيد مسلسل "وادي الجن" بطولة بشري وخالد كمال ويوسف عثمان وليلى أحمد زاهر وفراس سعيد وسينثيا خليفة، وعدد من النجوم البارزين من مصر ولبنان والسعودية والعراق وسوريا.
المسلسل من إخراج المصري حسام الجوهري، الذي ينجح دائمًا في تحويل النصوص إلى أعمالٍ واسعة المخيلة وتقديمها للمشاهدين، مع المنتج رامز عاطف والمخرجة الفنية هند حيدر ومصممة الأزياء إيناس عبد الله.
يذكر أن الإعلامية ريهام سعيد، فاجأت جمهورها بخبر اعتزالها المجال الإعلامى والاتجاه مرة أخرى إلى عالم التمثيل.

IMG_20220224_174134 IMG_20220224_174152 IMG_20220224_174207