عماد متعب : حظي كان كويس إني تعاملت مع المعلم حسن شحاته

أكد عماد متعب نجم الأهلي السابق، أنه كان محظوظا بالأجيال اللي لعب معها على مدار مسيرته سواء في النادي الأهلي، أو منتخب مصر، وكذلك بالأسماء والمدربين الذين تعامل معهم منذ دخوله القلعة الحمراء في عام 96، في قطاع الناشئين.
وأضاف متعب ، خلال استضافته في برنامج "بره الملعب " مع مها السنباطي على أون سبورت إف إم، أن أكثر المدربين تاثيرا في شخصيته كان المعلم حسن شحاته الذي يعتبر والده، وكذلك البرتغالي مانويل جوزيه المدير الفني الأسطوري للنادي الأهلي.

وتابع: حظي كان كويس إني اتعاملت مع كابتن حسن في بداية حياتي كلاعب وكان سني صغير في جيل محترم في منتخب الشباب حت قيادته هو وكابتن اسماعيل يوسف والحقيقة كابتن حسن أثر كثيرا في شخصيتي ولما كبرت ودخلت المنتخب الأول كان برضه المدرب كابتن حسن شحاته، اللي علمني ألعب وأنا مرتاح وأبقى واثق في نفسي وده طبعا غير فنيات كثيرة جدا، أما جوزيه فكذلك تعلمت منه حاجات كتير جدا أثرت في شخصيتي منها إني لازم يبقى عندي شغف للأفضل دائما مهما حققت من بطولات وانجازات وكان له جملة شهيرة بيقولها دائما "النجوم في السما " مفيش نجوم بتعيش على الأرض".
وحكى متعب تفاصل واقعة له مع جوزيه قائلا: كنت في ثالث أو رابع مباراة لي مع الأهلي اللي حصل إني كل ما تيجي لي الكورة أفكر في إني أرقص وأعدي فكانت الكورة بتتقطع مني كثيرا مستر مانويل كلمني بشدة وقتها، وقال: " إحنا هنا بنلعب كرة جماعية لو عاوز تلعب جولف هتكون لوحدك وتنبسط أكتر ده مش هنا " وأنا فهمت من بعد الموقف ده أنه كان عاوز يعلمني مش قاصد يزعق لي أو يضايقني، لهذا أنا كنت محظوظ بالشخصيتين العظيمتين المعلم وجوزيه، وفي لاعبين كثيرين أفضل مني مهاريا لكن ما لم يتعلموا كيف يحافظوا على استمراريتهم في الملعب واختفوا سريعا.

وأكد عماد متعب ، أن والده هو أكثر شخص حببه في الكورة رغم إنه توفى وهو في سن 7 سنوات، مضيفا أن والده كان بيحب الكورة جدا ودايما كان بياخدنا معاه الاستاد فطلعت عارف يعني إيه كورة ودورها في إسعاد الناس، أكيد كان نفسي يكون موجود ويشوف النجاح اللي حققته والبطولات والأهداف، ومن بعده والدتي اللي بقول إنها شخصية عظيمة لإنها قدرت تربي 4 رجالة لوحدها بعد وفاة والدي والحمد لله كلنا طلعنا معتمدين على نفسنا وبفضل دعائها حققت كتير وأنا لاعب ولحد دلوقتي أنا عايش من دعواتها ليا.
وأضاف متعب: أنا اتعلمت المسئولية بدري يعني من سن 12 سنة أنا عايش لوحدي في القاهرة في قطاع الناشئين في الأهلي، وإني أحاول أساعد بقدر الإمكان مع اخواتي ووالدتي.
وعن بداياته قال أسطورة هجوم الأهلي: بدايتي كانت من نادي بلبيس، اللي كنت بلعب فيه أنا وأخويا وائل اللي بيكبرني مباشرة، وكان لاعب جامد جدا بس مشكلته إنه كان عصبي جدا نفس شخصية وطريقة لعب كابتن إبراهيم حسن بس للأسف الظروف ، بتاعتنا وقتها لم تساعده إنه يكمل في مسيرته في الكورة لأن كان الكبير بعد أخويا الأكبر وليد وتحملوا المسئولية بدري.
وأضاف متعب: مدرب عندنا في بلبيس إسمه كابتن محمد صلاح أخد مجموعة حوالي 6 من الفريق وطلعنا رحلة للقاهرة نختبر في النادي الأهلي كان عمري وقتها 12 سنة قابلنا بقى كابتن ميمي الشربيني، وتم اختياري أنا لوحدي من المجموعة دي، طبعا فكرة دخول الأهلي والمرور من البوابة رهبة غير عادية، لكن الخوف الأكبر بعدما تم اختياري، وإني هكون لاعب في الأهلي وقعدت فترة طويلة مكنتش بعرف أروح لوحدي كان بييجي معايا كابتن محمد صلاح لحد ما تأقلمت على الوضع وبدأت اعرف زملائي.
عماد متعب