ريهام سعيد تهاجم تامر أمين بقوة على الهواء بسبب شيرين.. فيديو

قالت الإعلامية ريهام سعيد، إنه أصبح لدينا توجه عندما نرى شخصا ناجحا، مضيفة: "هو العمل على إفشال هذا النجاح".
وأضافت "سعيد"، خلال تقديمها برنامج "صبايا"، المُذاع عبر فضائية "الحياة"،: «الفنانة شيرين مبتغلطش، شيرين فيها عيب إنها عفوية وبتقول اللي بييجي علي لسانها وأكيد دا غلط، لكن إحنا ماسكين ليها على الواحدة».
وأوضحت: «الزميل تامر أمين عمل حملة لإيقاف الفنانة شيرين علشان تتمنع من الظهور في الحفلات، وفي وقت من الأوقات اتقال علي تامر أمين إنه فلول وقعد في البيت وبعد كده اشتغل في قناة مش مصرية و اضطهدت جدا، وفضلت تدافع عن نفسك كتير، ومش حلو إننا نظلم حد، ونقعد نمسك السكين لبعض وخصوصا إذا كنا في مجال واحد وعارفين إن نية شيرين مش وحشة».
وأشارت: «ليه يا تامر علشان أطلع ترند أو علشان فيديو ليا ينتشر أهاجم حد، وانت عندك مليون وحدة غير شيرين بتسيء لمصر، عندك واحدة تانية بتسيء بطريقتها وفيديوهاتها ولبسها وشكلها وكلامها وفيه مليون مثال ممكن يتقال».
وتابعت: «هو لما نهاجم شيرين ونوقفها عن الغناء مشاكل مصر هتتحل، وأكيد يا تامر انت بتغلط وناس كتير بتغلط، وبلاش نمسك لبعض على الواحدة، وشيرين تعبت علشان توصل وتعبت أوي وأكيد عانت كتير، ولو شيرين بتهزر أو تقول كلام وحش جمهورها هو اللي يحكم عليها».
وأكملت: «الجمهور بيحب شيرين علشان نيتها مش وحشة، هى بتهزر، وهي متعلمتش زيك، وأكيد فيه فرق في التعليم، بس هي فنانة كبيرة وطيبة وناس كتير حبتها، وشيرين رفعت راسنا بره مصر كتير».