"الناظر" يحذر من الإفراط فى استخدام الدهانات والمراهم المحتوية على "الكورتيزون"

حذر الدكتور "هانى الناظر" رئيس المركز القوى للبحوث سابقا وأستاذ الجلدية، من الاستخدام العشوائى للدهانات والمراهم المحتوية على الكورتيزون والتى تستخدم فى علاج للأكزيما والصدفية والبهاق والثعلبة نظرا لما يمكن ان تسببه من ظهور شعر غير عادى فى الوجه وتكوين شعيرات دموية تحت الجلد سهلة النزف، ناصحا بضرورة استعمال تلك المراهم تحت إشراف الطبيب المعالج.
وكتب "الناظر" فى تدوينه له عبر صفحته الشخصية بموقع التواصل الاجتماعى "فيس بوك": "في موضوع مهم عاوز اتكلم مع حضراتكم فيه النهاردة بصفتي طبيب امراض جلدية... الموضوع ده خاص بالدهانات اللي بنستعملها وبتحتوي على الكورتيزون سواء كانت كريمات او مراهم او محاليل.. لازم نعرف ان الدهانات دي أدوية مهمة وأساسية ولها استعمالات محددة ومنقدرش نستغنى عنها بس مينفعش برضه ان احنا نستعملها بطريقة عشوائية لعلاج اي مشكلة او التهاب في الجلد او نوصفها لبعض".
وتابع : "فعلي سبيل المثال هي علاج اساسي للاكزيما بأشكالها المختلفة والصدفية واحيانا للبهاق والثعلبة والعديد من الأمراض الاخري سواء للكبار اوالصغار لكن الذي يصفها لابد ان يكون طبيب متخصص".
واضاف : "ليه بقول كدة لان الاستخدام العشوائي والخاطئ لها والمتكرر بيعمل اثار ضارة فاذا استعملناها بكثرة على جلد الخدين والذقن ممكن تتسبب في ظهور شعر غير عادي في الوجه او تكون شعيرات دموية تحت الجلد سهلة النزف وساعات تخلي الجلد رقيق جداً ..كمان مينفعش ندهن مناطق الثنايا او الجانبين او الفخذين لفترات طويلة لانها ممكن تعمل ضمور في الجلد ويظهر في صورة خطوط حمراء عميقة صعب علاجها".
واستطرد "الناظر" قائلا: "وعاوز اقول كمان ان دهان مساحات كبيرة من الجسم بالدهانات دي بيؤدي لامتصاص الكورتيزون للداخل ويكون له تأثير ضار على مرضى الضغط والسكر وغيرهم.. ولكن لازم نعرف برضه ان الدهانات دي موش كلها زي بعض يعني في انواع مختلفة منها بيكون تأثيرها أقوى من الأنواع التانية وبعضها بيكون اخف يعني في دهانات بيكون تركيز الكورتيزون فيها عالي او من النوع سهل الامتصاص ودي بتكون أقوى وفي انواع بتكون نسبة الكورتيزون قليلة وتاأيرها بيكون أخف وضررها أقل".
واختتم "الناظر" تحذيراته للمواطنين قائلا: "المهم في النهاية عاوز أقول ان الدهانات دي مهمة وضرورية ومنقدرش نستغنى عنها في علاج العديد من الأمراض الجلدية ولكن لابد ان يصفها الطبيب علشان تحقق الفائدة المرجوة منها في العلاج وتعطي احسن نتائج بدون اي اثار جانبية تماما.. وارجوكم لا تستعملوها بأنفسكم بطريقة عشوائية ومتكررة ولا تصفوها للغير".