بالفيديو... أغنية ردا على قرار ترامب لشعبان عبد الرحيم

طرح المطرب الشعبي المصري شعبان عبد الرحيم، أمس، السبت 9 ديسمبر، أغنية جديدة، والتي عبر فيها عن رفضة لإعلان الرئيس الأمريكي دونالد ترامب، أن القدس عاصمة إسرائيل.
وتحمل الأغنية الجديد اسم "ترامب خلاص اتجنن"، وهي من كلمات الشاعر إسلام خليل.
وتقول كلمات الأغنية:

ترامب خلاص اتجنن…محتاج يا ناس قفص

وكله يخلي باله…لو عض أو رفس

مالك ومال القدس…أما أنت راجل رذل

كبرت خلاص يا ترامب…ولازم تعتزل

عامل علينا معلم…علشان إحنا دلعناك

مافيش غير بس كوريا…هي اللي مظبطاك

إكمنك شكل هوجان…ماشى تخبط بإيديك

مافيش غير كيمو يانج…هو اللي بيقدر عليك

يا راجل اختشي على دمك…بجد عيب عليك

ولعت الدنيا بكلمة…يارب تعمى عنيك

يا ترامب يا صهيوني…يا ممثل دوبلير

الشعب العربي كله…مش هيعديها على خير

القدس هتفضل باقية…عربية ليوم المعاد

يا جماعة فين القدس…أومال فين الجهاد

قاعدين تجاهدوا فينا…جهاد مالهوش مثيل

أنا نفسي أشوف جهادكم…في أمريكا وإسرائيل

القدس أهي بتتسرق…بنقول يا مين يحوش

قولنا الربيع العربى…مؤامرة ماصدقوش

ترامب ناوي يخربها…ويولع الفتيل

طالع يقول القدس…عاصمة إسرائيل

لو مرة يا عرب اتحدوا…اكسروا سم التعبان

ده المتغطي بأمريكا…وحياة ربنا عريان

فتحت فاتوحة على نفسك…يا ترامب ومش هتفوت

القدس خط أحمر…وباقية مش هتموت

إياك تتكلم تاني…على صلح أو سلام

ده أنت الإرهاب الأصلي…وشوية عليك إعدام

الموج والنبى لنهده…ياللي صنعتوا الإرهاب

إسرائيل إيه يا جدو…ليلة أبوكوا هباب

الغضب الساطع آت…ياترامب يابن ماريكا

ولا إسرائيل هتحوشو…ولا مامتك أمريكا