بالفيديو.. النص الكامل لكلمة السيسي

بدأ الرئيس عبد الفتاح السيسي كلمته للشعب المصري، بتقديم التعازي لأهالي الشهداء، الذي سقطوا خلال الحادث الإرهابي الذي استهدف محافظة شمال سيناء الخميس الماضي، قائلًا: 'خلينا نبدأ كلامنا بتعازي أهالي الضحايا'.
وأضاف الرئيس، في كلمة وجهها للأمة، عقب لقائه بالمجلس الأعلي للقوات المسلحة، اليوم، 'بصراحة إحنا محتاجين نتوقف عند مجموعة نقاط مهمة جدًا، خلال لقائي مع الإعلاميين أمس، أنا قلت تعبير وهكرره الآن، مصر تواجه أقوي تنظيم سري في العالم، ودا معناه إن المصريين في 30 يونيو أخذوا قرار من أخطر القرارات في العصر الحديث'.
وتابع الرئيس، 'المصريون قالوا إحنا مش هنكمل، وعشان كدا أنا جيت قلت أنا عاوز تفويض لمواجهة الإرهاب والعنف المحتمل، عشان أنا كنت متأكد'.
وقال السيسي، إن المواجهة مع الإرهاب صعبة وقوية وشريرة، وستستغرق وقت طويل، مؤكدًا أن من يدفع الثمن هم المصريين.
وأكد أن رجال الجيش مستعدين لدفع الثمن من أجل الدولة المصرية والمنطقة العربية بالكامل، قائلًا: 'أنا قلت للإعلاميين أمس، زمان أيام الحروب مكانش بيكون في تناول لأخبار الجيش من أجل الانتصار، إحنا عارفين احنا بنعمل إيه'.
وأضاف الرئيس السيسي، أن الشعب المصري اختار، مضيفًا 'الشعب المصري لما يختار أنا أنفذ بكل قوة'.
وأكد أن مصر تواجه صراع، وأنها مصرة علي الانتصار فيه، ولن تستسلم قائلًا: 'إحنا مش هنسيب سيناء، سيناء يا تكون بتاعت المصريين يا نموت عشانها'.
وأضاف السيسي: 'مصر تواجه أقوي تنظيم سري في العالم، وهذه المواجهة صعبة وشريرة وستأخذ وقت طويل'.وتابع: 'أؤكد لكم أن يوم 21 يونيو، وتذكروا هذا التوقيت جيدًا، أحد أكبر القيادات لهذا التنظيم –في إشارة لتنظيم الإخوان-، طلب لقاء معي شخصيًا، وقلت هذا الحديث سابقًا وبقول للمصريين، لمدة 40 دقيقة وأكثر كان بيقول لي هذا القيادي، هتلاقي من كل ربوع الدنيا ناس جاية تقاتلكم، من أفغانستان وباكستان وسوريا وفلسطين وليبيا'.
كما قال الرئيس عبد الفتاح السيسي، مخاطبًا الشعب المصري ومتحدثًا عن الإرهاب واحتمالية تكرار حوادث استهداف قوات الجيش والشرطة، 'إرادتكم وإرادة الجيش والشرطة تبقي دائمًا في أعلي ما يمكن، هذا الأمر سيتكرر وقلت ذلك من قبل، أنا مخبتش عنكم حاجة'.
وأضاف السيسي، منفعلًا، 'أنا قلتلكم يا نحكمكم يا نقتلكم، اختاروا، أنا بالنسبة لي ممكن أتقتل معنديش مشكلة، أنا مستعد أتقتل وهقابل ربنا باللي أنا عملته'.
وجدد السيسي، تأكيده علي ما قاله مسبقًا، 'أنا قلت قبل كدا، هما نظاهم يا هتتحكموا يا هتتقتلوا، إنتوا قلتوا لا قلنا إحنا هنتقتل مكانكم، أنا ميهمنيش غير المصريين، أنا مستعد أقف قدام الكل، أنا مقدرش أقاوم إلا بيكم أنتم، المصريين اللي غيرتوا الدنيا دلوقتي، دا أمر لازم يبقي واضح جدًا، إحنا ما بنخافش'.
كما وجه السيسي، رسالة إلي الإرهابيين قائلًا: 'اللي ساعدكم إحنا عارفينه وشايفينه ومش هنسيبه، إحنا بفضل الله سبحانه وتعالي هننتصر في هذه المواجهة بالعمل والجهد والدم'، وخاطب المصريين قائلًا: 'إنتوا مش عارفين هما بيعملوا كده ليه'.
وأشار السيسي، إلي أهمية المؤتمر الاقتصادي الدولي المزعم عقده في مارس المقبل، واصفًا إياه ب'مؤتمر الاقتصاد المصري دراع مصر'.
وأضاف السيسي، عقب لقائه المجلس الأعلي للقوات المسلحة، أنا عايز أقولكم إرادتكم وخياركم هما الأمر النافذ عليا، اللي انتوا عاوزينه أنا هعمله، هتشاوروا عليه وأنا هنفذه، عشان أنا بحترم أمر الناس وربنا أمر إننا نخير الناس، عاوزين ننتبه كويس أوي للي بيدور حوالينا، إحنا مش اتفقنا إن بناء مصر مشترك مع أجهزة الدولة والمؤسسات'.
واختتم الرئيس كلمته، مؤكدًا أن كل مؤسسة لها دور، وكل أجهزة الدولة تقف إلي جانب المصريين، والجميع له دور في مواجهة الإرهاب'.
وتابع: 'بناء مصر الحديثة هيكون بيكم يا مصريين إن شاء الله، مصر هتكبر رغم كل اللي بيتعمل، رغم حقد الحاقدين وكيد الماكرين، مش هيقدروا عشان المصريين إرادتهم قوية، وهما إن شاء الله علي حق، تحيا مصر تحيا مصر تحيا مصر'.