# هشتجة

من ساعة ما الغنا بقي مهرجانات،
والإعلام بقي منتدي فتكات،
والدراما عاليوتيوب ملخصات،
الناس خلاص بقت عينهم في الموبايلات
# آه_ياعيني
بريطانيا تعلن عن قلقها بشأن الأوضاع في فرنسا وتحذر رعاياها من السفر إلي.....مصر
# ازدواجية أووووفر
في كرة القدم اللعيبة كلهم بيلعبوا برجليهم، إلا فرجاني ساسي، بيلعب بعقله
# بحبك_ياساسي_بكل_إحساسي
الواد محروس بتاع الإعلام، فيه فرق بين الهبل والاستهبال، بين الظرف والاستظراف بين التلقائية والاستهانة بعقول الناس
# دمك_تقيل
# قلت_له_اضرب_ياوله
وليد سليمان، خد معاك أي عشرة ناشئين لابسين أحمر، وهتكسروا الدنيا وتاخدوا الدوري كمان
# الحاوي
إيه ضاااه، يعني الرجل اللي قتل عياله وانتحر ماطلعش فقير ونفسه في بطاطس والثورة مستمرة وخالد سعيد في نفسه وكدهون، والموضوع طلع خلع وطلاق وبس!!!!
# الهبدة باظت
آلو، أيوة يا دكتور
دلوقت انا اتفرجت علي جول صلاح الأخير 968468 مرة في أقل من ساعتين، هل انا كدة طبيعي ولا لازم اتعالج؟
# مووصلاح
فساد إيه اللي عايزين تحاربوه في بلد نصها مولود في 1 أكتوبر والنص التاني في أول يناير
ده علي أساس إن إننا من الثدييات اللي بتولد يومين في السنة
# الفساد_في_المهد
عملتوا إيه لما عرفتوا ان أمريكا أنتجت أول علاج نهائي للسرطان؟
اوووه ماسكتناش طبعا،
جرجرنا رانيا يوسف علي النيابة هي وفستانها
طيب ولما سمعتوا عن التجارب الصينية علي تعديل الجينات كان إيه رد فعلكم؟
لا مش فاضيين، احنا محتاسين في اكتشاف الشيخ خالد الجندي
ان الجنة مفيهاش علاقات جنسية ولا تواليت
# العلم_في_الراس_واحنا_الأساس
اللحظة الوحيدة اللي بتحس فيها بالمشاركة والناس كلها بتقف جنبك وفي ضهرك،
لما تسحب فلوس من ال Atm، أو وانت نازل من الأوتوبيس
# زمن_الوحوش
انتوا غلطانين بصراحة والمرة الجاية لازم تاخدوا الست بتاعة حقوق الإنسان تزور مجدي شطة وحمو بيكا وهما هايقوموا بالواجب
# إذا_انت_أكرمت_اللئيم_تمرد