«خيام» جامعة القاهرة استعدت للامتحانات غداً

وكيل الحقوق: «حاجة ترد الروح».. الطلاب: «قهوة بلدي وكراسي أفراح»

لاقي إعلان جامعة القاهرة عن الانتهاء من «نصب الخيام» استعدادا لامتحانات الفصل الدراسي الثاني موجة عارمة من النقد والسخرية من الطلاب علي «فيس بوك» ، وانهالت التعليقات علي «بوست» د. عبدالمنعم زمزم وكيل كلية الحقوق بالجامعة والذي نشر خلاله صور الخيام قائلا : «خيام الامتحانات اتنصبت.... حاجة ترد الروح.... بالتوفيق يا رب» ، وسرعان مارد الطلاب فقال أحدهم : « ترد الروح من أي اتجاه ، وقال آخر : ترد الروح دي تاخد الروح.. وأضاف ثالث : دي قهوة بلدي.. وتساءل طالب : طيب يا دكتور بالنسبة للحمامات ايه وضعها ده الواحد هيخودلوا ربع ساعة رايح جاي كده ؟.. وقالت طالبة : فعلا ترد الروح يا دكتور هوا احنا عايزين ايه اكتر الكراسي ملونه بتدينا دافع قوي لأداء الامتحان وده كفايه الصراحة.. وعلي فكره هنجلس 3 ساعات علي كراسي افراح ده ايه الجمال ده هو صافينار هتراقبنا.. وقالت أخري : هي فتحه السقف دي عشان نعذب اللي تحتها ولا ايه». وكانت جامعة القاهرة قد أعلنت عن إنهاء كافة استعداداتها لبدء امتحانات الفصل الدراسي الثاني ، وصرح د. محمد الخشت نائب رئيس الجامعة لشئون التعليم بأن الامتحانات ستبدأ غدا بكلية الطب والسبت بالصيدلة وبكلية دار العلوم 17 مايو، والطب البيطري والحقوق 21 مايو، والاثار 24 مايو، والتمريض 28 مايو، والآداب 28 مايو. وأكد الخشت أن الامتحانات ستنتهي خلال شهر رمضان قبل الافطار بأربع ساعات.