محمد صلاح: يا مساء الخير تحت شعار "من اجلك انت" هيبدا الحزب الوطني الديمقراطي مؤتمرة السنوي السادس طبعا سبقه نشاط سياسي مكثف اجتماعات تحضيرية للمؤتمر تمت هيئة المكتب والامانة العامة والمجلس الاعلى للسياسات كلها اجتماعات شعارها ترتيب البيت من الداخل المفروض دا يكون عمل أي حزب سياسي على طول يسمع اعضاؤه في مناسبة سنوية يعمل مراجعات الناس تشوف بعضها بيبقى عيد لكن الحزب الوطني مش أي حزب اولا هو الحزب الحاكم ثانيا حزب الاغلبية بعدد الاعضاء المنتمين ليه في عدد نوابه في مجلسي الشعب والشورى وكمان المجالس المحلية ثالثا بقى الحزب الوطني من ساعة تاسيسه سنة 78 لغاية النهاردة يعني الحزب ممكن يحتفل بمرور 30 سنة على وجوده في السلطة الحزب في السلطة 30 او31 سنة ممكن الحزب يسال نفسه ازاي ممكن يستمر في السلطة 30 سنة كمان خصوصا ان المسالة مابقتش سهلة بقت عملية وعرة مفيش حزب في الدنيا بيتنازل عن السلطة الا في اطار منافسة مع احزاب تانية الحزب الوطني شايف ان الاحزاب التانية ضعيفة احزاب المعارضة بتقول ان الحزب الوطني متشبث بالسلطة فيه ناس شايفة ان دا جدل صحي ممكن يفيد الناس في النهاية لكن المؤكد انه مؤتمرات الحزب الوطني سواء المؤتمر السنوي او المؤتمرات العامة اللي بتتعمل كل 5 سنين انها وبسبب وضع الحزب على الخريطة السياسية في مصر بتبقى تحت المنظار نقول تحت المناظير من احزاب معارضة منظمات حقوقية حركات احتجاجية يعيني باختصار من الراي العام بكل الوانه كمان الحزب الوطني وفي كل مؤتمر بيكون له شعاره المثير للجدل من اجلك انت دا شعار السنادي كمان بيكون له اوراقه ودراسات لجانه بكل مفاجاته بيرفع المؤتمر باستمرار بورصة التكهنات والتوقعات بالتغيير وعدم التغيير مؤتمر الحزب على موعد مع ملفات كتيرة شائكة زي مثلا مرشحي الحزب في انتخابات التجديد النصفي لمجلس الشورى وكمان مرشحي الحزب في مجلس الشعب انتخابات كمان السنة الجاية ومرشح الحزب لرياسة الجمهورية السنة اللي بعدها شائعات التغيير الوزاري الملازمة لاي مؤتمر الموقف من احزاب المعارضة مؤتمر الحزب الوطني السنوي السادس هيكون لينا عنه النهاردة كلام مسئول محمد صلاح: الناس عايزة ايه من مؤتمر الحزب الوطني، الحزب نفسه عايز ايه من المؤتمر يمكن يكون فيه تحديات ، مشاكل ، اولويات لكل قرية وحي لكل مدينة ومحافظة.. مطلوب دايما ابتكارات وحلول آليات تواصل عشان الحكاية توصل للناس.. المؤتمر السادس للحزب الوطني هيكون لينا عنه النهاردة مع أمين التدريب والتثقيف في الحزب الد محمد كمال كلام ....... مسئول ومن كلام الد محمد كمال اوراق المؤتمر السادس للحزب الوطني لا تتضمن أي تغييرات في نظام الانتخابات البرلمانية او أي تعديل في نسب التمثيل تحت قبة البرلمان ,الحزب سيطرح مجموعة من المبادئ العامة دون الدخول في التفاصيل التي ستترك في الحوار مع المجتمع والاحزاب لادخال تعديلات تشريعية في قانون مباشرة الحقوق السياسية ,المؤتمر سيناقش 11 ورقة عمل وهي التنمية الاجتماعية ومكافحة الفقر والتشغيل والاستثمار والامن الغذائي والتنمية الزراعية والاسكان والتنمية العمرانية والرعاية الصحية والخدمات التعليمية ، سياسات الطاقة ، سياسات النقل ، اللامركزية والمواطنين والديمقراطية وسياسات المراة والاسرة والشباب والرياضة لا احد يرضى بنسب المشاركة في الانتخابات والتي تبلغ حوالي 39% من اسماء المسجلين في الجداول الانتخابية والمشكلة لها اسباب تاريخية تتعلق باحساس بعض الناخبين بان صوتهم ليس له قيمة . بعض المسلمين وبعض الاقباط يلجاون الى الدين والمؤسسات الدينية كاطار للمشاركة السياسية وتعبير عن وجهات النظر وهذه مسالة خطيرة لان العمل السياسي لابد ان يكون من خلال الاحزاب الحزب الوطني بيقول انه اعد عدته للمؤتمر برامج محاور اوراق عمل كشف حساب عن اللي تم من المؤتمر اللي فات للمؤتمر الجديد هنشوف ملفات الحزب وقضايا الحكومة استفسارات اعضاء الحزب وهموم الناس نظرة الناس للمؤتمر ونظرة المؤتمر للناس امين التدريب والتثقيف في الحزب الوطني الد محمد كمال هيكون لينا معاه دلوقت كلام ..... مسئول فاصل محمد صلاح: نرحب بامين التدريب والتثقيف في الحزب الوطني د محمد كمال ..مؤتمر الحزب الوطني السنوي السادس هيجلس قادة الحزب مع اعضاؤه مع كوادره يتناقشوا ويبحثوا في الملفات اللي موجودة واللي هنناقشها مع بعض لكن خلينا نتكلم بقى كلام بتاع الناس اللي في الشارع اللي ممكن ما يكونوش اعضاء في الحزب نشوف اهتماماه ايه وعايزة ايه ..موافق.. د/ محمد كمال - أمين التدريب والتثقيف في الحزب الوطني: تحت أمرك.. محمد صلاح: البلد فيها انفلونزا خنازير الحزب الوطني مأمن نفسه ازاي بقى ؟ د/ محمد كمال: الحقيقة اخذين هذا الامر بكل جدية اولا تم تقليل عدد الجلسات وايضا تم تقليل عدد الحضور في القاعة الرئيسية وهيبقى فيه قاعات جانبية فيها شاشات للعرض ممكن يتم متابعة الجلسات محمد صلاح: يعني تفتيت الاعداد ؟ د/ محمد كمال: بالظبط هيبقى فيه اجراءات طبية في الدخول هيبقى فيه اكثر من طبيب مقيم في مكان المؤتمر محمد صلاح: كام واحد بيشاركوا في المؤتمر تقريبا ؟ د/ محمد كمال: حوالي 3000 عضو محمد صلاح: بيقيموا فين ؟ د/ محمد كمال: بيقيموا في فنادق واماكن للمبيت بتبقى قريبة من قاعة المؤتمرات اللي هيعقد فيها المؤتمر لكن كل تكاليف الاقامة بتدفع من موازنة الحزب اللي هي بتيجي من الاساس من اشتراكات العضوية او من تبرعات الاعضاء محمد صلاح: مفيش بقى مجاملات ؟ د/ محمد كمال: لا وارد حتى انت كمواطن ورايح تأجر قاعة هناك تتفاوض مع هذا الفندق محمد صلاح: الحزب الوطني د/ محمد كمال: لا مفتكرش احنا بنخش وبنشوف ايه افضل العروض اللي متاحة وبناء على ذلك بيتم التعاقد محمد صلاح: ممكن رجال اعمال في الحزب يدعموا بشكل او باخرعربيات في ناس طبعا في الحزب بيستخدم عربيات الحكومة ؟ د/ محمد كمال: لا ..اولا أي شخص في الحزب من حقه انه يتبرع للحزب محمد صلاح: مش للمؤتمر ؟ د/ محمد كمال: مش للمؤتمر مش مخصصة للمؤتمر ولا مخصصة لنشاط امانة معينة او نشاط محدد فبيتبرع لميزانية الحزب وهذه الميزانية بتصب في انشطة الحزب المختلفة بما فيها مؤتمر الحزب لكن استخدام سيارات الحكومة هذا ممنوع على الاطلاق ولا يحدث البتة محمد صلاح: "من اجلك انت" دا شعار المؤتمر السنادي ايه المغزى منه ؟ د/ محمد كمال: المغزى منه تقدر تقول ان كل اوراق الحزب اللي مقدمة في المؤتمر وكل السياسات اللي بيتبناه الحزب وحكومته هدفها المواطن وعلى وجه التحديد المواطن البسيط عشان كده حضرتك هتشوف في المؤتمر السنادي انه مختلف بعض الشئ في القضايا اللي بيتناولها يعني مثلا كل سنة بتلاقي لجنة التعليم بتناقش 5 او 6 قضايا لجنة الصحة 7 او 8 قضايا السنة دي هيبقى التركيز على قضية او اتنين اللي لها بعد جماهيري وبتمثل تحدي او مشكلة محمد صلاح: اديني نموذج؟ د/ محمد كمال: يعني كل سنة بنتكلم في التعليم عن قضايا بتتعلقق بالجودة بتحسين المهارات الى اخره السنادي قضايا عامة وقضايا مهمة وبتمس الرؤية للمستقبل لكن السنادي هنتكلم مثلا على موضوع النظام الجديد للثانوية العامة والقبول في الجامعات الصحة هتتكلم بشكل اساسي على موضوع التامين الصحي وقانون التامين الصحي الجديد بالنسبة للنقل فيه اوراق على النقل البحري والنقل الجوي وخاصة مشاكل النقل البري للركاب في منطقة القاهرة الكبرى يعني قضايا مختلفة بتركيز على الموضوع دا ..الشباب فيه كلام على مراكز الشباب وعلى تطوير الرياضة لكن هنركز بشكل اساسي على قضية الادمان وادمان المخدرات بين الشباب اللي هي بيعاني منها عدد كبير من الاسر المصرية محمد صلاح: والقضايا اللي لها علاقة بها البطالة بقى والفقر وهكذا ؟ د/ محمد كمال: بالظبط وبتطرح تصورات لكيفية التعامل مع هذه المشكلات فالشعار كان الهدف منه ربط كل القضايا دي والتاكيد على انها تستهدف المواطن المصري بالاضافة انت السنة الجاية داخل على انتخابات مجلس الشعب ومجلس الشورى فانا رايي ان الشعار مرتبط بهذه المسالة يعني المؤتمر كله هو بمثابة تمهيد لانتخابات مجلس الشعب والشورى فبتحاول تمهد انه الحزب دا من اجلك انت مرشح الحزب في الانتخابات هيبقى ايضا من اجلك انت فالمسالة مرتبطة بمرحلة ما بعد المؤتمر محمد صلاح: طب مافيه ناس هتيجي تقولك هو يعني المؤتمرات بتاعة السنين اللي فاتت ماركزتش على المواطن ؟ د/ محمد كمال: لا بتركز لكن انا بقول ما العمل السياسي برضه ممكن يمر بمراحل مختلفة مرحلة معينة بتطرح رؤية استراتيجية مرحلة بعدها ممكن بتحط خطوط عريضة للسياسات اللي بقول عليها المؤتمر السنة دي هيركز على وجه التحديد على عدد محدود من القضايا اللي هي بتمثل مشكلة او تحدي للمواطن العادي لكن المسالة دي كلها مسالة تراكمية يعني مكانش ممكن نوصل للمرحلة اللي احنا فيها دي من دون ما نمر باوراق السياسات اللي تم صياغتها في السنوات السابقة محمد صلاح: دكتورمحمد عادة المؤتمر السنوي للحزب وحتى المؤتمر العام بيكون مصحوب دايما بتكهنات حول صعود بعض الاشخاص وهبوط بعض الاشخاص واختفاء البعض وبروز البعض على سطح الاحداث هل فيه السنادي أي نقاش او احراءات تتعلق بالمراتب التنظيمية المختلفة داخل الحزب د/ محمد كمال: لا هو الحقيقة السيد صفوت الشريف الامين العام للحزب الوطني اعلن ان هذا المؤتمر لن يشهد أي تغييرات في الهيكل التنظيمي القيادي للحزب الوطني فالاجابة لا مفيش مناقشة ولن يحدث تغيير بالنسبة لهذا الموضوع محمد صلاح: اتكلمت من شوية على مسالة انتخابات التجديد النصفي لمجلس الشورى السنة اللي جاية وانتخابات مجلس الشعب والعملية بدات تسخن حتى في دوائر المعارضة وبعض القوى السياسية انتوا هتناقشوا اسماء ولا هتناقشوا معايير د/ محمد كمال: لا المؤتمر لا هيناقش اسماء ولا هيناقش معايير المؤتمر بشكل اساسي هو مؤتمر سياسات يعني بتطرح سياسات عامة في المجالات المختلفة لكن يمكن ان ينتج عن مناقشات المؤتمر بداية الاعداد للبرنامج الانتخابي للحزب في انتخابات مجلس الشورى ومجلس الشعب دا يمكن البعد الوحيد المرتبط بالانتخابات اللي ممكن يبدا في التبلور اثناء المؤتمر لكن المؤتمر ليس دوره مناقشة معايير او اختيار اشخاص فيه جهات مسئولة داخل الحزب هي التي تقوم بهذه المسالة محمد صلاح: في ضوء اللي هيحصل في المؤتمر ؟ د/ محمد كمال: اللي هيحصل في المؤتمر هيدي احساس بطبيعة السياسات والقضايا اللي من المهم التركيز عليها في حملة الحزب لهذه الانتخابات وفي اعداد البرنامج الانتخابي لكن انا متاكد ان بعد انتهاء المؤتمر هيبدا قطعا مرحلة تقييم الاعضاء الحاليين مسالة البحث عن مرشحين جدد الى اخره لكن هذه مرحلة ستاتي بعد المؤتمر محمد صلاح: يعني طوال السنة اللي هي بعد المؤتمر لحد موعد الانتخابات ليه فيها احساس انه الانتخابات اللي جاية انتخابات مهمة وقد تصل لمرحلة الخطورة هل انها هي هذا المجلس هو اللي هيعاصر في مرحلة لاحقة انتخابات الرئاسة اواللي هتتم في وجود انتخابات الرئاسة في2011 ولا نتيجة الانتخابات اللي فاتت وحصول الاخوان المسلمين على 88 مقعد اوحصول مرشحي الحزب اللي اعتمدهم على نسبة الثلث د/ محمد كمال: لا الحقيقة هي مهمة لاسباب كثيرة مهمة لان المواطن المصري في هذه المرحلة يبدو وكانه اكثراهتماما بالسياسة محمد صلاح: فعلا ..!!!! د/ محمد كمال: انا رايي كده.. محمد صلاح: رأيك .. ولا انتوا رصدتوا كده ؟ د/ محمد كمال: انا رايي واستطلاعات الراي العام اللي بنعملها في الحزب بتبين ايضا انه فيه اهتمام مرة اخرى يعني طبعا انا بلاحظ دا بين الطلبة في الجامعة لكن المجتمع بصورة عامة بسبب حرية الاعلام الغير المسبوقة ووسائل الاعلام الخاصة اللي اصبحت منتشرة بشكل كبير جدا سواء فضائيات سواء صحافة اعتقد مؤثرة جدا يعني انا رايي الراي العام في مصر اصبح مؤثر جدا وفي احيان كثيرة تاثيره اكبر من تاثير مؤسسات معينة ممكن يبقى لها دورفي الرقابة او المحاسبة الى اخره فالمجتمع بقى مُسيس فيه اهتمام بمتابعة الاحداث بشكل عام وانا اعتقد ن دا هينعكس في الانتخابات مش مجرد اهتمام بالانتخابات والمرشحين ولكن اتمنى واعتقد ان دا هيحدث انه هيبقى فيه نسب اعلى من المشاركة في الانتخابات عن الانتخابات السابقة محمد صلاح: بس ف اذهانكم برضه ان اللي حصل ان الاخوان خدوا 88 مقعد في الانتخابات مش كده ولاّ اية ؟ د/ محمد كمال: هذه الانتخابات هتبقى انتخبات درجة المنافسة فيها عالية جدا يعني سواء من الاخوان المسلمين سواء من الاحزاب الاخرى سواء من مرشحين مستقلين فمن ناحية التنافس بتبقىرجة المنافسة عالية جدا المسالة التالتة اللي بتخليها مهمة ان احنا لسه بنعيش في اجواء الازمة الاقتصادية العالمية وبالتاكيد اثرت على الاقتصاد المصري طبعا تاثيرها اقل بسبب اجراءات الاصلاح الاقتصادي اللي تمت في السنوات الماضية لكن انخافض معدل النمو من 7 ل 4 او 4.5 طبعا بياثر في حاجات كتيرة منها نسب التشغيل وحاجات اخرى فلازم طبعا تهتم بالانتخابات لهذا السبب ايه هيبقى رد فعل المواطن المصري لما يحدث في الساحة الاقتصادية المسالة الاخرى انت عندك برنامج انتخابي لمجلس الشعب يعني غير البرنامج الانتخابي الرئاسي فمن المهم انك تقول للمواطن والله انا حققت كذا وماحققتش كذا ومصداقية الحزب ونسبة التصويت ليه هترتبط بهذا العنصر الجديد المتعلق بالبرنامج الانتخابي عشان كده انا اعتقد ان الانتخابات القادمة تبقى انتخابات مهمة جدا وهتبقى على درجة عالية من التنافسية محمد صلاح: بشكل عام لما الحزب بيختار مرشحيه وبخبراتك السابقة واللي ممكن يكون كوادر الحزب والقيادات فيه شايفين ان دي المدرسة اللي بيتبعوها هل مسالة الترشيح للانتخابات بتحسبوها بحسب قوة المنافسين بالقياس بقوة مرشحي الحزب ولا يكون فيه حرص ايضا على التنوع وعلى التغيير وعلى طرح وجوه جديدة ؟ د/ محمد كمال: لا .. اولا هي بتختلف من انتخابات لاخرى بينطبق على انتخابات المجالس المحلية لا ينطبق على مجلس الشعب يعني انتخابات المجالس المحلية كان العنصر الاساسي في تفكير الحزب فيها هو الدفع بدماء جديدة ودماء شابة وقيادات تنظيمية داخل الحزب الوضع في انتخابات مجلس الشعب مختلف المعيار الاساسي بصراحة مدى شعبية المرشح في الدايرة عشان ينجح بندور على الشخص اللي بينجح والمسالة دي بتبقى في احيان كثيرة بتبقى في غاية الصعوبة لان الحزب والوطني حزب كبير وبيستقطب اعداد كبيرة من الناس للعضوية وعدد كبير من هؤلاء لديه طموح شرعي للترشيح في الانتخابات وعدد منهم بيبقى ليه قواعد شعبية قوية فبتحاول تستخدم اسليب جديدة زي استطلاعات الراي العام زي المجمع الانتخابي ودي فكرة جديدة تم اجرائها في الحزب يعني يبقى فيه انتخابات داخلية في الدايرة نفسها لاختيار مرشح معين لكن احيانا بتيجي نسب يعني واحد واخد 51% وواحد واخد 49% يعني بتحط اللي بيختار في حيرة من امره وبعدين كل الحاجات دي بتتم باسلوب العينة يعني استطلاعات الراي العام اسلوب العينة المجمع الانتخابي ممثل للحزب الوطني ولكن ليس ممثل للدايرة وكل الناخبين فاحيانا ترشح شخص معين ولكن لا يحالفه الحظ في النجاح محمد صلاح: برضه وجهة نظر اخرى شايفة انه يجب النظر الى المرشحين الاخرين يعني لما يكون عندي مرشح اخوان قوي لازم احط له حد قوي او عنصر حزبي في بعض الاحيان من ممثلي الاحزاب الاخرى ليه مكانة شوية عشان ما احطلوش حد تقيل عشان أمرره د/ محمد كمال: عشان اكون صريح معاك برضه الانتخابات عندنا في مصري مجلس الشعب وفي ظل النظام الفردي بتعتمد بالاساس على الانتخاب للفرد للشخص مسالة انتماؤه لايدلوجية معينة او فكر معين لا تدخل كثيرا في ذهن الناخب المصري احنا مش انجلترا بتصوت لواحد حزب العمال او حزب المحافظين هنا الشخص هو المهم الخدمات اللي بيؤديها لاهل دايرته العيلة اللي بينتمي اليها القبيلة اللي بينتمي اليها فالسياسة دي لازم تكون واقعي عشان تشتغل في السياسة فالحزب بصراحة بيتعامل مع هذه المسالة بكل واقعية فبتشوف المرشح الاكثر شعبية بناء على هذه المعايير لكن برضه عايز اقول حتى لو شفنا تشكيل مجلس الشعب الحالي دا ما بيمنعش ان هذه الشروط بتنطبق على عناصر على درجة عالية من التعليم درجة عالية من الوعي والانتماء الحزبي ومجموعة ليست صغيرة من الشباب فانا بقول بالرغم من ان النظام دا بيعتمد الى حد كبير على معايير تقليدية لكن يمكن ان يفرز عناصر غير تقليدية يرشحها الحزب وتفوز في الانتخابات محمد صلاح: قولي الحزب وقف خلف قانون كوتة المراة وقوى المعارضة شافت ان رغم الحديث دائما عن ترتيب المراة واعطاء المراة دور لكن البعض اعتقد وحتى من بين بعض السيدات شافوا ان دا نوع من التمييز وان الحزب الوطني اللي وقف خلف القانون وسانده استسهل الموضوع وانا بتكلم مع امين التثقيف بدل ما الحزب يثقف الناس ويوعيهم باهمية منح المراة دور وتمكينها وانه لا فارق بين العمل السياسي بين المراة وبين الرجل استسهل الحكاية ولو لفترة ايه رايك ؟ د/ محمد كمال: مسالة استسهال دي بالتاكيد دي مسالة صعبة جدا تغيير ثقافة المجتمع والمسالة بس مش مسالة المراة دا موضوع المواطنة على سبيل المثال دا محتاجة تغييرات جيلية ومحتاجة عملية تغيير ثقافية قد تمتد لعدة اجيال اللي عايز اقوله ان احنا مش الدولة الاولى اللي تلجا لنهج الكوتة عددد من الدول الديموقراطية ماتزال تستخدم هذا النظام الهند 25% من المحالس المحلية فيها وفقا للدستور مخصصة للمراة الدول الاسكندنافية وعدد من الدول الاوربية بدات بنظام الكوتة لكن بعد فترة لما حصل تغيير في الوعي وتغيير في الثقافة وايضا لما ثبت للناخب ان المراة تستطيع ان تكون سيدة نيابية لا تقل عن الرجل في عملها البرلماني فبدات المسالة تتغير في الذهن ورجعوا للوضع الطبيعى ودا اللي احنا تبيناه في الحزب انه معملش موضوع الكوتة دي لا نهائيا زي موضوع العمال والفلاحين حطينها في الدستور ومش عارفين نخلص منها لغاية دلوقت ..فيه جدل حول هذه المسالة حتى داخل الحزب وفيه وجهات نظر مختلفة بشانها محمد صلاح: بس بينتصر الراي اللي بيثبت 50% العمال والفلاحين د/ محمد كمال: في هذه المرحلة لكن اعتقد ان الجدل مستمر وجدل مجتمعي مش بس جوه الحزب محمد صلاح: يعني وارد في المستقبل يتغير د/ محمد كمال: وارد مش دي القضية بس قضايا اخرى دستورية دي سنة الحياة ان الدستور اذن الكوتة للمراة نص القانون بيقول انها لفترتين من فترات مجلس الشعب يعني 10 سنين بعد 10 سنين لقينا والله انه فيه تغير في ثقافة المجتمع نتيجة لاداء المراة في البرلمان خلاص انتهت موضوع الكوتة ورجعنا للوضع الطبيعي لقينا ان المسائل لسه كما هي فممكن مد الكوتة لفترات اخرى محمد صلاح: لو حتى اعتبرناه انه تمييز ايجابي تغيير في ثقافة الناس ووعيهم نطرح المراة كمرشح ونلغي حكاية الكوتة طب ليه مانعملش ودا اتقال في اوساط الاقباط يتعمل تمييز ايجابي ايضا للاقباط برضه دورة او دورتين على عدد معيين من المقاعد للاقباط ونبقى نلغيها بعد دورتين لما الناس تتعود انها ماتروحش تنتخب وفقا لديانة المرشح ولكن طبقا لبرامجه او خدماته د/ محمد كمال: لا انا اعتقد ان المسالة دي سوف ترسخ الانقسام في المجتمع المصري فالمنطق مختلف تماما وصعب المقارنة بين الاقباط والمراة الموضوعين مختلفين تماما الدول التي تعطي حصة لجماعات دينية معينة هي بتبقى مجتمعات منقسمة في ثقافتها وفي انتماءاتها يعني مجتمعات اللي بينتمي لديانة معينة بيبقى ليه اولويات ورؤية بتختلف عن الذي ينتمي لديانة اخرى لكن احنا هنا المسلمين والمسيحيين بكافة طوائفهم ومذاهبهم انا ادعي ان مواقفنا واضحة ومواقفنا متشابهة الى حد كبير بالنسبة للقضايا المختلفة سواء قضايا داخلية واو قضايا خارجية اللي عايز اقوله المسالتين مختلفتين تماما وانه وجود حصة للاقباط سوف تؤدي الى مزيد من تكريس الانقسام داخل المجتمع المصري محمد صلاح: تكريس الانقسام ... هو فيه اصلا انقسام ؟ د/ محمد كمال: لا انا عايز اقول انه لسه موضوع المواطنة دا محتاج شغل وخاصة من البعد الثقافي بتاعه لان القانون واضح تماما وهو المساواة بين كافة المواطنين بغض النظر عن الدين دا مبدا دستوري والمادة لااولى من الدستور بتتحدث عن ان النظام السياسي يقوم على مبدا المواطنة لكن البعد الثقافي مازلنا نحتاج جهد اكبر في التثقيف محمد صلاح: خصوصا في محكات لما بتحصل مشكلة . د/ محمد كمال: بالظبط ..التثقيف بالمواطنة سواء بين المسلم وغير المسلم الرجل والمراة وغيرها من الانقسامات محمد صلاح: موضوع مهم ولسه فيه مواضيع تانية خليك معانا لسه الكلام مخلصش فاصل محمد صلاح: مهم طبعا موضوع المواطنة لكن فيه موضوعات اخرى متعددة ولها علاقة بسياسات الحزب الوطني د محمد معانا مداخلة من الد عمرو هاشم ربيع تيجي نشوفها د/ محمد كمال: اه طبعا محمد صلاح: نشوف الدكتورعمرو هاشم ربيع فاصل د/عمرو هاشم ربيع- الكاتب الصحفي بالأهرام الاستراتيجي: ازمة كبيرة من المشكلات القائمة والموجودة في المجتمع والدولة المصرية تحتاج الى مزيد من الاصلاح اصلاح سياسي اصلاح اقتصادي اصلاح اجتماعي بعضها كان مع الاسف الشديد متكرر لم يحدث فيه أي تغيير ولم يحدث فيه أي جديد على مستوى الاصلاح السياسي لازال هناك حالة من الخلل البين في سلطات الدولة الثلاث التنفيذية والتشريعية والقضائية فيما يتعلق بسلطاتهم مسالة استخدام القضاء مسالة اصلاح النظام الحزبي اللي هو يجب ان يبدا في تقديري من اصلاح الحزب الوطني من الداخل ان الحزب الوطني بقدر او باخر هو قاطرة النظام الحزبي القائم فاصلاحه بيؤدي بالطبع بشكل عام الى اصلاح باقي المنظومة الحزبية في مصر مسالة الجمع بيين رئاسة الحزب ورئاسة الدولة مسالة الامور الخاصة ما يثار عن استغلال الحزب للادارة وللمحليات في ادارة شئون الحزب امور كثيرة ايضا مرتبطة باللامركزية نحن ننتظر قانون المحليات ننتظر تعديله منذ 3 سنوات وهذا كثير للغاية مسالة المجتمع المدني ننتظر قانون النقابات منذ اكثر من 3 سنوات قانون الاحزاب اعود مرة اخرى للاحزاب به كثير جدا من المصاعب الاحزاب الترخيص وليس بالاخطار كما في كافة دول العالم اتصور انه يكون فيه شرطين اساسين لانشاء أي حزب فقط انه يكون ليس له ظهير ميلشياتي وليس حزب ميني على اساس طائفي الامور المتعلقة بالاصلاح الاجتماعي تحتاج منا ايضا الى وقفة والى وقفة كبيرة في واقع الامر لدينا 1221 عشوائية في مصر لدينا سكان المقابر 1.5 مليون لدينا ايضا تقرير التنمية البشرية تتحدث عن ان 52% من الشعب المصري يعيشون على اقل من 2 دولار يوميا هذه مشكلات كبيرة في واقع الامر حالة الخلل في توزيع الدخول شرهة بشكل غير مبالغ فيه لما بقول شرهة هي كلمة غير مبالغة في واقع الامر لكنها بتعبر عن الواقع القائم ما بين مستويات الدخول الكبيرة بين الموظفين حتى في المؤسسة الواحدة وحتى في الادارة الواحدة الد رشيد بنفسه تحدث عن مشكلات كبيرة وان حوالي 75% من الشعب المصري لم يستفد من برامج الخصخصة هذا تصريح من الحكومة امور كثيرة في واقع الامر تحتاج منا الى وقفة في الامور الاجتماعية مسالة تمكين المراة انا لا افهم حتى الان نتحدث عن التمكين منذ سنوات كثيرة ولدينا برنامج مرشحي الحزب الوطني في الانتخابات الاخيرة مجلس الشعب كانوا 6 مرشحات هذه مشكلة ايضا ..مشكلة ايضا المتعلقة بالنوبيين يعني احنا عمالين نلملم مسالة المراة ومسالة الاقباط يطلع لنا كمان مشكلة النوبيين هذه ايضا مشكلة كبيرة فاصل محمد صلاح: اثار الدكتورعمرو هاشم ربيع عدد من النقاط المهمة تحتاج رد عندك رد يادكتور محمد؟ د/ محمد كمال: اه الحقيقة قضايا كثيرة لكن انا عايز اقول بالنسبة للبعد الاجتماعي والسياسة الاجتماعية دا موضوع مهم جدا وبيحتل اولوية في سياسات الحزب وحيكون احد العناوين الرئيسية في المؤتمر اولا مسالة الانفاق الاجتماعي شهدت زيادة كبيرة جدا ربما 4 اضعاف خلال ال4 سنوات الماضية حجم الموازنة الموجه للانفاق الاجتماعي زيادة في برامج الدعم في اعداد المسجلين في البطاقات التموينية معاشات الضمان الاجتماعي بالاضافة طبعا للخدمات اللاساسية اللي بيحتاجها المواطن من مياه والصرف الصحي الى اخره وعقب المؤتمر ان شاء الله في البرلمان الجديد الحكومة سوف تتقدم في البرلمان بطلب الموافقة على 10 مليار جنيه اضافية تذهب لتمويل برامج المياه والصرف الصحي ,والاستاذ عمرو اشار الى موضوع مهم جدا وهو موضوع العشوائيات دا ايضا من القضايا اللي مطروحة بشكل تفصيلي في المؤتمر ويعني احنا بنعتبر ان العشوائيات هي الجانب الاخر للعملة من برنامج مكافحة الفقر في القرى الحزب مهتم بهذا البرنامج في الاف قرية الاكثر فقرا في مصر لكن الفقر لا يقتصر فقط على هذه الاف قرية محمد صلاح: في احياء شعبية واحياء عشوائية فيها فقر د/ محمد كمال: بالظبط.. فالفقر في المدن هو موجود بشكل اساسي المناطق العشوائية فهيطرح مجموعة من السياسات مرتبطة بتمويل محدد لهذا البرنامج الاستاذ عمرو ايضا اعتقد تناول قضايا كتيرة سياسية طبعا موضوع تمكين المراة مع 64 مقعد جديد اعتقد ان دي نقلة نوعية مهمة محمد صلاح: الامور الخاصة بموضوع النوبة د/ محمد كمال: بالتاكيد فيه حركة حراك في المجتمع دا مستمر فعلا من سنة 2005 من ساعة تعديل المادة 76 وبيزداد كل عام زي ما قلنا بسبب وسائل الاعلام المتاحة الفضائيات الصحافة الخاصة وشبكة الانترنت اللي بتخلي كل واحد عنده النافذة الخاصة بيه اللي ممكن يعبر من خلالها على وجهة نظره الى اخره فاحيانا بيبقى فيه شكل من اشكال المبالغة الاعلامية في التعامل مع هذه القضايا انا مابقولش ان دي قضايا لكن انا شاركت مع وفد حزبي لزيارة النوبة قرية نصر النوبة اللي فيها العدد الاكبرمن النوبيين اه الناس عندها مشاكل فيه سياسات طرحت للتعامل مع هذه المشاكل لكن منقدرش نحطها على انها دي اقلية محمد صلاح: مشاكل سياسية ولا مشاكل حياتية يعني زي مشكلة الجراكن اللي كانت في كفر الشيخ مثلا او مشكلة المجاري اللي اتوجدت في الفيوم يعني نوعية المشاكل دي ولا مشاكل سياسية ؟ د/ محمد كمال: معظم المشاكل مشاكل حياتية ذات طابع اقتصادي ولما الحكومة بتتدخل او بتحدد او بتعتمد موارد اكبر للتعامل مع هذه المشاكل بتقل حدتها لكن ممكن الاعلام يضفي عليها طابع سياسي لكن انا اعتقد جانب اكبر من هذه المشاكل هي مشاكل ذات بعد اقتصادي محمد صلاح: ايه محصلة استطلاعات الراي على الجولات اللي قام بيها السيد جمال مبارك أمين السياسات في الحزب في القرى وكانت جولات عديدة ؟ د/ محمد كمال: هو بالنسبة للموضوع دا مفيش استطلاعات راي ولكن بيتم عملية تقييم ايه حجم التقدم اللي حصل في المجالات المختلفة وانا اعتقد ان الصورة ايجابية الى حد كبير لانه برنامج جاد برنامج مخصص لموارد محددة برنامج بيتعامل مع الفقر بمفهوم الواسع مش انك تدي الناس دخل ينقلها من منطقة الى منطقة اخرى اقتصاديا بتتعامل مع نقص الخدمات مدارس مستشفيات مراكز شباب مشاكل في المية في الصرف الصحي فبتلاقي اكتر من جهة حكومي بتحاول ان تعالج هذه المشكلات عشان كده بتحس انه بيحصل نقلة نوعية في القرية ككل وكل مرافقها مش على جانب واحد محمد صلاح: تعليقك ايه على الضجة اللي حصلت في وسائل الاعلام على موضوع انتخابات الرئاسة يعني بيتكلموا على انتخابات الرئاسة 2011 اكتر بكتير ما بيتكلموا على انتخابات مجلس الشعب برضه انتوا المفروض بتاخدوا بالكم من حاجة زي كده والناس بتتكلم ازاي ؟ د/ محمد كمال: بعد انتخابات الرئاسة الماضية يعني في 2005 بعدة اسابيع ابتدت الناس تتكلم عن انتخابات الرئاسة القادمة خلاص دا بقى جزء من الحياة السياسية في مصر وبقى بعض الناس بتمتهن كانها مهنة انه يكتب حول هذه الموضوعات انا اعتقد ان الكلام اللي بيكتب حول هذه القضايا مبالغ فيه جدا لانه كما ذكرت من المبكر الحديث حول هذا الامر محمد صلاح: ما جايز الحزب الوطني فلما هيطرح هيطرح قبلها بسنة مثلا هما محتاجين وقت اطول شوية ؟ د/ محمد كمال: ليس من الحكمة السياسية ان الحزب يعلن عن اسم مرشحه مبكرا لان انت بتحطه خلاص كهدف الكل هيتصيده ففيه مواعيد معينة في الدستور للاعلان عن اسم المرشح وبدء الحملات الانتخابية وانا اعتقد ان الحزب هيلتزم بهذه التوقيتات لكن المسالة ليست اسم المرشح خلينا بقى كمجموعة مهتمة بالعمل العام في مصر ونتكلم عن القضايا الاكثر عمقا احنا عايزين يبقى ايه شكل النظام السياسي المصري في المستقبل او بالنسبة للانتخابات نفسها ازاي نخلي الانتخابات اكثر تعددية اكثر نزاهة اكثر تنافسية انا رايي دي القضايا الحقيقية اللي من المهم ان النخبة والكتاب في مصر يهتموا بيها ومفيش مشكلة ان يبداو يهتموا بيها وبيكتبوا عنها بدل من تشخيص هذا الموضوع محمد صلاح: اذا مكنتش هتقولي راي الحزب فقولي رايك الشخصي عن الاسامي اللي عمال تتطرح دلوقت في وسائل الاعلام عن ان فلان بيفكر انه يترشح او ان فلان سالناه فقال مش دلوقت يمكن بعدين وان فلان قال من حق أي حد انه يترشح وتحديدا طرحت اسماء الد محمد البرادعي الد زويل ، السيد عمرو موسى والجرايد والصحف خلال الاسبوع اللي فات والجرايد والتوك شو اشتغلت على الحاجات دي انت بتبصلها ازاي الحكاية دي ؟ د/ محمد كمال: انا رايي ان الصحافة والاعلام هو الذي يخلق هذه القضايا انه يتصل بشخص معين يعني عمرها ما حصلت بالشكل اللي بيتم في أي دولة والله أي حد من حقه يرشح نفسه طالما جاية مبادرة من عنده يقول والله انا برشح نفسي لاسباب التالية وبرنامجي كذا لكن مهم ايضا تنطبق عليه شروط الترشيح فيه شروط معينة يحددها الدستور بالنسبة للترشيح لهذا المنصب محمد صلاح: يعني يالتلاتة اللي قلناهم او اللي طرحوا مش اعضاء في أي حزب؟ د/ محمد كمال: لابد انه ينتمي لحزب معين لهيئة عليا لهذا الحزب لمدة سنة معينة هذا الحزب يكون قائم لمدة 3 سنين هذا الحزب يكون له عضو واحد على الاقل منتخب في البرلمان او عايز بقى يسلك طريق المستقلين فعابز اقول دي قضايا اعلامية يعني لا نهتم بيها كثيرا يعني انا بقى كشخص اتمنى ان الانتخابات القادمة زي ما حصل في 2005 انتخابات تعددية وانتخابات تتضمن معايير النزاهة ومعايير الحرية محمد صلاح: نتكلم في التوريث د/ محمد كمال: زي ما تحب محمد صلاح: بيتكلموا كتير على موضوع التوريث بتقابلوا ا الكلام دا ازاي؟ د/ محمد كمال: دا برضه كلام مش جديد دا من سنة 2001 محمد صلاح: هو من 2001 صحيح بس عمال يزيد رغم التعديلات اللي ادخلت على الدستور بيزيد بتقرا اللي بيتكلموا على الموضوع دا ازاي يعني ؟ د/ محمد كمال: انا بقولك ان البعض بدا يمتهتن هذه المهنة وبدا هو الموضوع الاساسي اللي بيتكلم عنه وبيبني اسمه عليه والجرايد بتعتقد ان دا هيزود من توزيعها الى اخره الموضوع مش جديد وهيستمر الحديث حول هذه المسالة فمفيش حاجة جديدة ممكن تعمل بخصوصها السيد الرئيس وامين السياسات تحديدا تحدثوا بو ضوح حول هذا الموضوع امين السياسات نفسه بيقول ان هو شايف دوره من خلال الحزب الوطني وموقعه من خلال الحزب الوطني ودي حدود الدور بتاعته ما بيقومش باي دور تنفيذي او باي دور رقابي هو دور حزبي بالاساس عايز اقول انه فيه قضايا اكثر اهمية زي ما كنت بتكلم في فترة قليلة اكثر اهمية يجب ان ننشغل بيها كنخبة وكمفكرين وكصحفيين يهمهم تقدم مصر لو عايزين نتكلم على قضايا الاصلاح السياسي لا يجب ان نشخص هذه القضايا كلنا كمواطنين مصريين نتمنى انه يبقى فيه اكثر من مرشح قوي في الانتخابات القادمة وانا رايي ان الاحزاب المختلفة يجب ان تفكر في هذه المسالة مش بس الحزب الوطني محمد صلاح: رؤوس الاحزاب بيقولوا على اسامي مش في الاحزاب بتاعتهم اصلا د/ محمد كمال: ماهي دي مشكلة اساسية واذا كان النخبة ماسكة موضوع التوريث ومين الرئيس القادم لابد ايضا ان تخاطب الاحزاب الاخرى تقولها طب مين مرشحكم ايه برنامجه ايه رؤيته للاصلاح لازم برضه اللي عايز اقوله ان تشخيص هذه المسالة غير مفيد وبيحجب الرؤية عن قضايا اكثر اهمية تتعلق بتطور النظام السياسي المصري يجب ان ننشغل بيها جميعا كناس عايزة يحصل تقدم في مجال الاصلاح السياسي في مصر محمد صلاح: خليك معانا لسه الكلام مخلصش فاصل محمد صلاح: يمكن اعضاء الحزب الوطني عارفين عايزين ايه من الحزب او قادة الحزب او قيادات الحزب عارفين عايزين ايه من اعضاء الحزب بيعملوا ياه عشان ينفذوا سياساته او يحققوا اهدافه لكن فيه ناس في الشارع ..عندنا تقرير يا د محمد عن ناس كده بتتكلم عن الحزب الوطني نسمعه د/ محمد كمال: ياريت محمد صلاح: نشوف الناس في مصر بتقول ايه عن الحزب الوطني فاصل مواطن1: عايزين امان وسلام واهم حاجة يكون فيه ضمير دا اهم حاجة الناس تشتغل بضمير ويكون قلبهم على بعض كلنا كده يد واحدة والحزب ونكون كلنا يد واحدة مع بعضنا مواطن2:انا عايز نلاقي شغل لان احنا لما بنتخرج ما بتنلاقيش شغل خالص فمعظم الشباب بيتخرجوا بيقعدوا على القهوة مفيش حاجة غير كده فياريت بنطلب من الحزب انه يوفر لنا شغل ويشوفوا حل للمشكلة دي مواطن3:فيه مشاكل متعلقة بالقضاء اهمها تنفيذ الاحكام ايه فايدة ان انا اخد حكم وما يتنفذش يبقى كانه حبر على ورق فانا بطلب تنفيذ الاحكام والعدالة الناجزة .. العدالة البطيئة هي الظلم بعينه مواطن4:المواطن بحق الله تعبان ..تعبان ازاي حضرتك دلوقت كيلو اللحمة وصل 40 جنيه طبعا انا معايا 5 عيال لامؤاخذة يعني فيه غيري بيقبض كام 40 عشان يجيب لحمة واولا الاسعار دي التجار اللي مزودينها الحكومة لم تعلم شئ عن غلو الاسعار كيلو السكر وصل 5 جنيه ياباشا ..! ليه يعني 5 جنيه ليه..!! مواطن5:العامل مضغوط والاسر مضغوطة ومش عايزين غير الحق المشروع ناخده مش اكتر من كده فاصل محمد صلاح: الناس في مصر طيبة قوي عايزين يعيشوا يعني في مستوى لائق ..كيلو السكر ب5 جنيه واللحمة ب40 جنيه الناس طيبة قوي ما اتكلموش في السياسة خالص .. الحزب واعي للكلام دا يا دكتور د/ محمد كمال: اه طبعا المشاكل الحياتية دي اللي بتهم المواطن وعلى فكرة مش في مصر بس دا في كل دول العالم لكن دا ما يمنعش ان برضه القضايا السياسية محمد صلاح: الانتخابات والحقوق السياسية للمراة . د/ محمد كمال: لكن طبعا قضايا التشغيل قضايا الاسعار قضايا مهمة جدا اللي اشار اليها احد المواطنين اللي تتعلق بتنفيذ الاحكام القضائية كلها الحقيقة قضايا وعشان كده بقول انه مرة تانية عدد كبير من هذه القضايا هي على اجندة المؤتمر وستحتل اولوية في المرحلة القادمة ايضا الاخ اللي تحدث عن سعر السكر اللي زاد هو حاسس بيها لكن عايز ااكد لحضرتك ان عدد ليس قليل من المواطنبن مش حاسين بالمشكلة دي بسبب ان هما بيحصلوا على السكر المدعم من البطاقات التموينية ودا تم اضافة عدة ملايين محمد صلاح: الراجل دا معندوش بطاقة . د/ محمد كمال: وارد لكن بالتاكيد هي مشكلة ومش عايز اقول ساعات بترتبط بالاسعار العالمية لكن ممكن ايضا عدد من هذه السلع انخفضت لما الاسعار العالمية انخفضت لكن الحزب بيضع هذه القضايا الحياتية للمواطنين على قائمة اولوياته ودا هيظهر بشكل واضح في المؤتمر ان شاء الله محمد صلاح: د محمد في مؤتمر السنة اللي فاتت سبقه هجوم شديد جدا من المعارضة وانتقادات حادة شوية للحزب الوطني وقياداته وشفنا الرد جه في كلمات بعض رموز الحزب الوطني اثناء المؤتمر كان فيه حتة في المعارضة بشكل عام وعلى وجه الخصوص بعض القوى السياسية داخل الطيف السياسي للمعارضة السنادي المعارضة ماهاجمتش ولا حاجة يعني طبعا اتقال ساعتها ان دا كان رد على المعارضة من الحزب الوطني السنادي مفيش هجوم على المعارضة الناس حنينة هتعملوا ايه ؟ د/ محمد كمال: الهجوم والهجوم المضاد دا شئ طبيعي في الحياة السياسية ومن الطبيعي ومن المهم ان المواطن والناخب بعد كده يعرف الاختلاف والتباين بين القوى السياسية المختلفة فانا الحقيقة شايف ان ده ظاهرة صحية ممكن يبقى فيه تجاوز في بعض العبارات من هنا او من هناك لكن محمد صلاح: التجاوز ظاهرة صحية !!!؟ د/ محمد كمال: لا انا بقول الظاهرة الصحية انه يبقى فيه حوار وفيه جدل ببن القوى السياسية محمد صلاح: هو مكانش جدل كان هجوم وهجوم مضاد د/ محمد كمال: دا برضه مشروع في السياسة ما بين حزب اغلبية او حزب حاكم وقوى معارضة المهم انه يصبوا في النهاية في مصلحة المواطن وفائدة المواطن انه يبقى حوار اوهجوم وهجوم مضاد حول القضايا والرؤى المختلفة والله انا بقول دي رؤيتي لموضوع التامين الصحي لكن الهجوم على الاشخاص دون ربطه بقضايا معينة اعتقد ان ده بيضر الحياة السياسية سواء قام بيه حزب الاغلبية او قوى المعارضة لكن المهم يبقى فيه حوار وجدل حول البدائل المختلفة اللي بتطرحها القوى السياسية المختلفة وانا ازعم ان الحزب الوطني بيطرح بدائل ورؤيته لقضايا مختلفة من المهم انه القوى السياسية الاخرى تقول والله هذه هي البدائل اللي احنا بنطرحها ووقت ما ترسخ في ذهن المواطن انه فيه بدائل لرؤى مختلفة اعتقد ان دول ناس جادين وممكن ان يمثلوا بدائل للحكم محمد صلاح: لو خدنا فترة زمنية سنة من المؤتمر الخامس الى المؤتمر السادس وعملنا كشف حساب سريع كده للحكومة انجزت في ايه واخطات او تعثرت في ايه.انجزت في ايه بنشوفه كتير ومتابعينه فيه كلام كتير على الانجازات وكده من وجهة نظرك حتى الشخصية تعثرت في ايه ؟ د/ محمد كمال: يعني عايز اقول برضه خلال هذا المؤتمر محمد صلاح: وعارفين طبعا انه فيه الازمة المالية العالمية د/ محمد كمال: لا لا مش هقول ..انا عايز اقول انه فيه عملية رصد بتتم بشكل سنوي لما يتحقق في البرنامج الانتخابي للسيد رئيس الجمهورية فيه برنامج مفصل وواضح المعالم وفي كافة القطاعات 4,5 مليون وظيفة جديدة ، 1000 مصنع وهكذا في باقي المجالات فكل سنة بيطلع رصد في وثيقة كده بنسميها "وعدنا فاوفينا" فاللي عايز يرجع للارقام دي هيلاقيها انا اعتقد معدلات الانجاز الرقمية ماشية بشكل جيد طبعا حصل تراجع في معدلات النمو من 7 ل4 او 4.5% فدا هينعكس في تراجع معدلات التشغيل فرص العمل اللي خلقها الاقتصاد المصري لهذا العام وربما ايضا في العام القادم هتبقى اقل ربما متحصلات الضرائب هتبقى اقل ربما يزيد العجز في الموازنة لانه محتاج الدولة تدخل لتمويل مشاريع اكثر فدي الجوانب اللي ممكن تقول.. محمد صلاح: اه بس دا نتاج ازمة المالية العالمية احنا عاوزين حاجة للراجل بتاع كيلو السكر ابو 5 جنيه او كيلو اللحمة ابو 40 جنيه د/ محمد كمال: انا شايف انه مقارنة بالسنة الي فاتت فيما يتعلق للاسعار وانا عارف ان الواحد ممكن يتعرض لهجوم في هذه المسالة موضوع الاسعار مكانش بحدة السنة اللي فاتت ودا راجع لانخفاض الاسعار العالمية لعدد من لسلع اللي بيستهلكها المواطن المصري ودا حقيقة انعكس في استطلاع اخير للراي العام قمنا بيه في الحزب بنسال عن المشكلة الاولى او المشكلة الاساسية اللي بتواجه المواطن المصري اغلبية المواطنين قالوا مشكلة البطالة ..العام الماضي كانت مشكلة الاسعار ..الاسعار السنادي جت نمرة 3 او حاجة بالشكل دا ففيه وضع افضل نسبيا فيما يتعلق بالاسعار لكن اسوا فيما يتعلق بالبطالة بالتاكيد فيه تحدي كبير في موضوع الخدمات كلها يعني خدمات التعليم خدمات الصحة خدمات النقل فدي بالتاكيد ايضا محتاجة جهد اكبر خلال السنوات القادمة اللي عايز اقوله انه احنا عمرنا ما اتكلمنا عن صورة وردية مصر بلد نامية فيها مشاكل كثيرة يجب ان نعترف بالواقع لان انت داخل على اختبار انتخابي يعني المبالغة البعض هياخذها على انها نوع من انواع الخداع فمن المهم انك تقول والله دا الواقع انجزنا كذا لكن فاضل تحديات كذا هنتعامل مع هذه التحديات بالشكل التالي واعتقد دا اللي بنحاول نعمله في المؤتمر وان شاء الله النهج دا هيستمر بعد المؤتمر محمد صلاح: يوم الاتنين الجاي نهاية المؤتمر السادس السنوي للحزب الوطني هنشوف نتايج المؤتمر الي ربما تطرح تحديات حتى مؤتمر السنة الجاية قال الد محمد كمال امين التثقيف والتدريب في الحزب الوطني كلامه معانا النهاردة حول مؤتمر الحزب الوطني قال كلامه كان كلام جميل كلام معقول اكيد كان كلام مسئول خلص الكلام ...... سلام نلتقي في الحلقة المقبلة
