((عايزني أحارب))...بقلم: د/ عمر عبد الجواد عبد العزيز

و انت قاعد تتاوب
تنام علي حرير
و انا أغرق
في بير
و بلدي تصير
حقل تجارب ؟؟
لو للعروبة
لسه فاكر
و للتاريخ
و الجغرافيا مذاكر
أنا مش ناكر
ان قوتنا في اتحادنا
مع أشقاء و أقارب ….
أنا و بلدي. نتعاتب
و انت للعدو تصاحب
و من أموالك ساحب
و في إعمار غزة
ألاقيك هارب ….
أنا و بلدي
شربنا من المُر كتير
من حرب
و كرب. و تحرير
و انت مشغول بتدمير
العروبة بتأجير
ثعابين و عقارب ….
ٕٕالهنا واحد
و دمنا واحد
و مصيرنا واحد
ليه كل واحد منا
و اخد له قارب ؟؟
يا أخي
اتكسف علي دمك
أنا همي من همك
لو أمر غزة يهمك
إيدي في إيدك
من المشارق للمغارب .
★★★★★★★★★★