ع الهوا مع العقيد.. شعر

ع الهوا مع العقيد.. شعر
من توك توك تحت الشمسية
وعبايا من فوقها طاقية
الطاغي حيهذي وحيرطن
ويهدد ويلت ويعجن
عايزين أيه من حاكم عربي
ضارب قرش حشيش ومسلطن
...
مجنون أيه ؟
أحنا المجانين
عشنا حياتنا ومش فاهمين
إن بلادنا عزب أهاليهم
أصحابها واحنا الوافدين
....
راح اسيبكم ونعيش في الخطبة
ونتقابل بعديها اكيد
.....................
باهي نجعمص واسمعوا القائد
أنا مجد أفريقيا
أسيا وأمريكا
أسمي معمر مين يكدبني
عمرت راسي وجيوبي
رسمت مزيكا
وزرعت مكرونة حصدتها ويكا
بامية واقمع مخي فابريكا
ع الزيرو زي الجزمة ياجرزان
عاجباني جداً صورتي في الجرنان
أحدف شمال احدف يمين مالكوا ؟
حاطين عيالكوا ف طريقي
وتلوموني ليه ؟
وانا ذنبي أيه ماتلوموا إهمالكوا
لو كنت ريس كنت حاتنحي
أحا بقي من جهلكوا أحا
أيش جاب لجاب يابقر
ليبيا ماهش تونس
ولا مصر تشبهلنا ياخلق بقدونس
ريقي نشف ياغجر ماحد جاب ميا
ونفسي اخبط أيدي واجعاني
كتابي أخضر
وأسود قلبي مايهمش
في حاجة حمرا وانتوا عارفينها
حارفع قضية علي ابراهيم عيسي
فاصل وحنواصل
......
قولنا وعيدنا المرآة تترشح
ذكراً تكون والا تكون أنثي
أيه الغريبة ف كدا ؟
ودي برضه آخرتها ؟
غوروا في داهية وانا
والله مانا غاير
فاتوا اربعين
باقي اربعين لسة
ازاي تثوروا ياخلق ع الثاير
أدب الحوار ماعرفوش
ولا عمري مارسته
كان فيه حمار مهبوش
وانا اللي سايسته
إخوات رضاعة ياخلق م الآخر
دايماً مسافر وابن مجنونة
ملعونة كلمة حوار دايماً تعصَبني
أيه اللي يغصبني اشارك حد ف ميراثي ؟
انا البليغ المفوه مين يترجمني
غلبوا الأطبة ماحد عالجني
زحفي المقدس كان علي بطني
وانا وخيالي ف هلوسة وقتي
صراصير وبانجو وتانجو ظَبَطني
مش لاقي رجلي وعقلي في الجزمة
ماتضيعوش وقتي انا عندي تشريفة
بدماغ خفيفة نضيفة
بيضا ع الآخر
فاصل وحنواصل
..............
بنتي فريق معتبر لاتشيلسي ولا روما
معلومة بين الإعلانات حصري
واسأل أسامة الشيخ وأعوانه
عاملين عزومة ف طرة
غديوة بالمصري
مين اللي عانه وعانوا الخلق من بعده
ماصدقش وعده
والا تلكيكة
حافصل شوية
حطوا مزيكا
أشحن وأرجعلكوا نحكي عن الحاصل
أبداً مفيش فاصل
أنا مش مُغني عشان أطرب واسمعكوا
دي خطبة عالية استنوا للآخر
صارف عليها دماغين من برملين كُلةَ
ياشلة مندسة لسة الحلو جايلكوا
مين اللي قال أتنحي واتتاخر
مفيش بواخر من هنا لجدة
حاسأل مبارك فين واردلكوا
يتهد حيلكوا ياشلة مرتدة
الإعلانات كلموني
دقيقة ونكمل
فاصل وحنواصل
............
مليار لحمدي فاهمني ومذاكر
قال عني واد عبقري
آدي اللي فاهمني
لو شعب ليبيا كدا والله أتنحي
لكن بقي قسمتي
عاقل حكم مجانين
قالها الغريب واللي مني
شايفني قال مجنون
شوف لا كرامة لنبي
كمل ياواد عابدين
وليك هدية بسيطة
ميكرفون طبعاً
أخطب بدالي الميا زانجاني
ألهي ماتترمي ياحمدي علي زنجة
والله ياناس الثورة خنقتنا
خربتوا بيتنا ف مصر و ف تونس
عباس دا واد ثورجي زيك وانا منصور
بإذن ربي علي الشعب اللي رافضني
وانا لو عميل طب مين يقبضني
مين أغني مني قول ياعم احمد
نهبت شعبي ومين يحاسبني
سيبك وسيبني من الثورة ومن ناسها
مين للزعامة ونس
مين غيري حراسها ؟
حسني فقير ياجدع واحنا اللي شايلينه
وملياراته يادوبك فكة ف إيدينا
طب بعد أذنك ناولني ورقة مكتوبة
الخطبة خلصت وقرب ينتهي طوبة
آمشير طلع ع الكراسي
قلقها زلزلها
الكرسي فين ياولد
مين من هنا شاله ؟
مش معجزة ولا زفت ياتومة
أنا الحكومة
وسيف والسَاعدي وعيشة
العيشة مرة بدون الكرسي ياحاتم
حاموت عليه
وماضي عقده انا وخاتم
ماعرفش افك الخط
حتلومني
طب عملوا أيه الدكاترة
مين يجاوبني
أد ابني برضه ولسة الخبرة معدومة
كنت ف حضانة وباحكم شعب في الجامعة
الدنيا سامعة وشاهدة اشهد ياابو لمعة
لمع ودانك بقي واستني حنواصل
فاصل وحنواصل
.............
تابع ياشعبي وقول وشاركني
في الخطبة بس
وسيبلي الكرسي والتوك توك
هاتلك كوفية وتعالي الميكرفون عندي
وانا أد وعدي وعمري ماوفيت
يكفاني صابر علي الشعب اللي تاعبني
والله يابني الزعامة غلب ومناهدة
آخرتها جدة
في فندق والكفيل بيذل
إزاي يضل الزمن ويهين في حكامه
ماتقولش قسمة وقدر لا ركعت ولا صليت
يعني بصراحة كدا
لا فيه خشي ولا دين
أنا مش معلم ولا
انا منتخب ساجدين
اللي بيفهم يريح وانت فاهمني
حانجز والخص مش باحب ألت
محتاج لبنت صبية دلوعة
تكون دماغها زي ملسوعة
تهرشلي ضهري
بس مخي تمام
مهروش ياهاشم راسي واجعاني
الصنف مضروب أوي
كلملنا هاني
الشرطة غايبة وقل الصنف مش لاقي
كان فيه بواقي ف جاكتة
الست غسلتها
حتة يادوبك نعملوا سيجارتين
طب لو قريب تعالي وهاتلي تعميرة
العين بصيرة وضروري الخطبة حتطول
نسيت اقولك ياهاشم
هات معاك بفرة
...
حبة شباب مدرسة
ضاربين حبوب هلوسة
بيطالبوا بالتغيير
طب يسألوا الجماهير
زغزغني مش راح اغير
لا باحس ولا فاهم
بيقولوا جاهل عليا
ومين بقي عارف
السحلفة بتطير
الدور بقي ع الأسد
ماتحلوا عن عرشي
ودقوا مارشي جنازة ظباطي
طول عمري واطي ونازل في البشر تقتيل
وقتيل زعامة من وانا عيل
لا انعس ولا آأيل
الشعب يمشي وانا قاعد حاجيب غيره
يتهد حيله اللي هيج ثورة ع الحكام
ممكن شوية أنام وارجعلكوا تاني ؟
ماتردوا يابواسل
فاصل وحنواصل
...............
خلاص بقيت مسخرة حوشوا ابراهيم عني
كات غلطة مني
وذلة من لسان فضاح
أنا قلت عبفتاح ماقصدش والله
مش قصدي ابوك ياجدع أفهم وريحني
أقصد رفيقي في زحف الثورة مش أكتر
أشطر من اللي خلفوك
فاهم
واكبر من الشعر اللي فاكرة لبانة بتطرقع
طب هاتوا برقع أداري الخيبة عن عينكوا
ماتصدقوا تشمتوا ياخلق في كبيركوا
أنا مش مبارك
ولا نجله ولا دياولوا
مهما تحاولوا مانيش ماشي وحاتخانق
خشوا الخنادق بقي ل اضربكوا بالنووي
سايبني ليه ياغجر أرطن وانا فاصل
والله ماحاواصل غير لما انام ساعتين
وأريح الجتة
الكيف مناولة
أرمي ياجدع حتة
تكفي اصطباحة بمية وحافاصل
فاصل وحنواصل
..............
هيثم دخل بالامؤاخذة
غطي الفخذةإسدال علي المجتمع
أفرح يابن لادن
الناس معادن وانا
في المحنة والأزمة
تقولش جزمة قديمة ومعدني مغشوش
حلق وحوش الشباب عمره ماحيهادن
مكتوبلنا ماننامش ولا نرتاح
يادي الرياح اللي هلت بدري في يناير
واتجمعت زي القضا مستعجلة وهايجة
في كل شارع ثورة و ف زنجة
طب حد يزغدني يمكن غفلة ولا كابوس
وفين قابوس نايم سايبني
آهين وآه يازمن للندل تحوجني
أمسك دا واد م الجزيرة صحافجي ومراسل
ومش حاواصل قبل ماتطحنوا راسه
واشوف خلاص بعيني وبعدها نحكي
أتحدي أجدع مترجم بلة علي طينة
شعبي رهينة مافوتها
ومين ينجيها
فيه ناس وجيهة وهارشة الفكرة م الأول
كان نفسي أتحول واكون أنثي وأتحنطر
لكن أمينة باعتني وسيقتني ع الكورنيش
يادي الليالي في قصر النيل علي الكورنيش
والله ياهيثم يابني مالناش عيش
والجيش خدعني وباعني رخيص وأستاهل
فاكرين ياناس الخلع بالساهل
حاشعلها ثورة عليكوا
ثورة علي ثورة
...............
خلص الخطاب التاريخي للعقيد فلة
عايزين محلل نفسي ياشلة
بيشم كُلة والا مستهبل
....
وحياة جدودي وأبائي
لو كنت منتج سينمائي
ل امضي مع القائد فوراً
من حينه
ولعمري الباقي
لاتقولي ليمبي ولا بوحة
ولا قرد مجنون ولا شوحة
قذافي نجم مفيش زيه
سيما ومسخرة مفتوحة
قذقذ توعدنا وأعلن
والله كدبت عيوني
ماعرفش دا واقع فعلاً
والا مسلسل كرتوني
................
إبراهيم عبد الفتاح