الجمهور ل شيرين عبد الوهاب بعد حلاقة شعرها: إنتى قمر فى كل حالاتك

أعرب المئات من المغردين عبر منصة تويتر، عن تضامنهم من النجمة شيرين عبد الوهاب، بعد ظهورها خلال حفلها الغنائى فى أبو ظبى بدولة الإمارات العربية الشقيقة، وقد قصت شعرها بالكامل، ودشنوا لها العديد من الهاشتاج التى سيطرت على قائمة الترند فى مصر والوطن العربى، منها (شيرين فى ابوظبي) و(شيرين).
وتنوعت تغريدات المدونين من خلال الهاشتاج، حيث قال أنس: "والله العظيم قمر وهفضل أحبك طول العمر، ويا رب الضحكة ما تفارق وشك بس خليكى قوية جدا، لا تخافى من أى حد خافى بس من رب العالمين، خليكى فاكرة كلمة انتى شيرين عبد الوهاب يعنى مش أى حد"، وقالت علا عمر: "قمر فى كل الأوقات وحلاوة شيرين فى روحها وتلقائيتها، بكرة تشوفوا اللى شيرين عملته والقصة دى هتطلع موضة اد ايه ومع كام بنت وست، استنوا السنة الجديدة وابقوا افتكروا إن انا قلت شيرين عملت trend وموضة جديدة، ده أنا عاوزة أعمل القصة دى بجد".
وقال جبريل: "كلنا شيرين وكلنا بنحبك وكلنا بندعمك وواقفين بضهرك، وإن شاء لله ترجعيلنا أقوى وأقوى وأقوى، ضلى أتذكريها دوماً، انتِ عندك شعب وأهل وعائلة وراكِ مش بس جمهور، بنحبك وناطرينك أقوى مثل ما عودتينا".
وكانت النجمة شيرين عبد الوهاب عبرت عن سعادتها بإحياء حفلها الغنائى فى أبو ظبى بالإمارات، وتواجدها وسط الجمهور، بعد أزمة طلاقها من الفنان حسام حبيب، طالبة من الجمهور أن يتقبلها بشكلها الجديد بعد تخليها عن شعرها وحلاقته بالكامل.
وقالت شيرين، فى مقطع فيديو من الحفل، انتشر عبر منصات السوشيال ميديا: "مبسوطة إنى معاكم.. ويارب تقبلونى بالشكل ده، بس انتوا عارفين.. أنا كده فوقت"، وسط تفاعل كبير من جمهور الحفل، الذى هتف قائلا: "بنحبك يا شيرين".