مشادات ساخنة على الهواء.. طارق الخولي: أحمد عز «حرامي»

قال الناشط السياسي، طارق الخولي، إنه تلقى رسالة من أحد ضباط الشرطة عقب فتح السجون أثناء ثورة 25 يناير، أكد له فيها أن اللواء عدلي فايد، مساعد الوزير لقطاع الأمن العام الأسبق، هو من أمر بفتح السجون وتهريب المساجين.
وأضاف «الخولي»، خلال حواره مع الإعلامي وائل الإبراشي، مقدم برنامج «العاشرة مساءً»، على شاشة «دريم2»، مساء أمس الأحد، أن الشعب المصري لن يسمح بعودة النظام الأسبق ورجاله، لأنهم سر الفساد الذي عانت منه مصر على مدى 30 عاما.
وتابع: «أحمد عز بيعمل اجتماعات عشان يخطط لمشروعاته الجديدة، دا مجنون بقى إحنا بعد ما طلع عين أبونا عشان نشيل النظام ده، الحرامية يرجعوا كدا تاني في يوم وليلة، عز دا شيخ منصر وحرامي ومتربي على حجر مبارك».
وأضاف إن ثورة الخامس والعشرين من يناير لم يكن لها أحزاب تمثلها أو رموز سياسية تعبر عنها، مؤكدًا أنها ليست السبب في كل الأخطاء والكوارث التي حدثت في مصر خلال الثلاث سنوات الماضية، مشيرا إلى أن إسرائيل فرحت بحكم براءة الرئيس الأسبق محمد حسني مبارك.
وتابع «الخولي»، أن أنصار الرئيس الأسبق محمد حسني مبارك يحاولون تشويه ثورة يناير، وإقناع الشعب المصري أنها سبب الخراب والبلاء الذي عشناه خلال الفترة الماضية، متسائلا، «لو كانت ثورة يناير مؤامرة أزاي الجيش إنحاز لها ودعمها؟».
وأكد الناشط السياسي، أن القاضي حكم في قضية القرن على حسب الأوراق المقدمة إليه، وبالتالي فبراءته إجرائية وليست جنائية، مشيرًا إلى أن «مبارك» لم يحاكم بتهمة قتل المتظاهرين، مؤكدًا أن شباب الثورة لن ينسوا فترة حكمه.
ووقعت مشادة كلامية على الهواء بين الخولي والفنان تامر عبد المنعم، حول براءة الرئيس الأسبق حسني مبارك من قضايا الفساد المنسوبة إليه.
وقال عبد المنعم، "مبارك مش راجل فاسد، كفاية أنه حكم البلد 30 سنة ومدخلناش في حرب، إنتوا بتسألوه عن عبارة السلام 98 والسرطان، هو ماله هو ومال العبارة، هيعمل لها إيه، الثورة دي بقى ثورة فلوس، مكنش ليها مطالب".
ورد الخولي منفعلا،" أنت من عيلة مرتاحة وباقي الناس غلابة مش لاقين علاج ولا أكل، مبارك هو سبب كل الفساد اللي مصر عيشاه، المسئولين عن العبارة سافروا برا في عهده، أزاي يسيبه يهرب، سابه عشان هو كان تبع زكريا عزمي".
ورد الفنان تامر عبد المنعم، «مبارك مش السبب في كل حاجة بتحصل، أنتوا بتحاولوا تثيروا غضب الناس الفقرا عشان يتعاطفوا معاكوا، إحنا زهقنا من الأسطوانة دي، غيروها بقى».
واستكمل حديثه قائلًا: «اللي عنده سرطان يروح يتعالج منه، هو مبارك اللي جابلنا السرطان لحد بيوتنا، ولسه بنقول العبارة، هو مبارك ماله ومال العبارة، متقولوش بقى إن مبارك هو اللى جابلكوا المرض وهو اللي موتكوا».
وتابع الفنان تامر عبد المنعم، أن ما حدث في يناير ليس ثورة ولكنه تجمع شعبي لأن رموز نظام مبارك لم يهربوا كما فعل أعضاء الجماعة الإرهابية، لافتًا إلى أن نظام مبارك لن يعود مرة أخرى على الرغم من أن رجال النظام الأسبق وعلى رأسهم أحمد عز لديهم خبرة كبيرة بالحكم والبرلمان.
وأضاف، أنه تعرض للسباب بالأم بسبب الصور التي جمعته بجمال وعلاء مبارك بعد البراءة، مؤكدًا أنه غير نادم على تأييده للرئيس الأسبق حسني مبارك وفخور بالتصوير معه.
وتابع: "حسني مبارك مشي من الحكم بمزاجه، وفكر في مصلحة البلد، لما الناس قالوله إمشي مشي على طول".
كما وقعت مشادة كلامية أخرى على الهواء بين الفنانة عفاف شعيب والناشط السياسي طارق الخولي، بسبب اعتراض الأخير، على حكم براءة الرئيس الأسبق حسني مبارك.
وقالت عفاف شعيب، خلال مداخلة هاتفية، «الأخ بتاع 6 أبريل دا واحد من المتآمرين على البلد، اعرف أنت بتتكلم عن مين، أنتوا شوية عيال عايزين تحكموا البلد، واتعلم لما تتكلم مع الأكبر منك تتكلم بأدب، ما تقعدوا في بيتكوا عشان البلد تمشي، الناس مش عارفة تأكل عيش، القضاء قال كلمته وقال كل حيثياته".
ووجهت حديثها للإعلامي وائل الإبراشي قائلة "أنا زعلانة منك يا وائل بجد عشان أنت بتستضيف ناس مش كويسة، محدش يهين الجيش ولا حسني مبارك اللي حكمنا 30 سنة، اللي ملوش خير في حسني مبارك ملوش خير في اللي جاي، لما تجيب ضيوف جيب ضيوف محترمين".
ورد الخولي قائلا،" أنا مش تبع 6 أبريل ومش اسمي بتاع، ومش هسمح لحد يهني أو يشتمني، الدخلة بتاعتك دي مش كويسة".