الفاضى.. يرفع قضية

أعزائى المواطنين.. كل عام وأنتم بخير وبصحة وسعادة، ويارب رمضان المقبل يأتى وكل منكم قد حقق ما يريد له ولأحبابه.. وبعد.. لأننى مستعجلة جداً.. رايحة أرفع قضية.. صحيح لسه ماحددتش هارفعها ضد مين وعشان إيه، لكن اشمعنى أنا يعنى ما البلد كله ناس عمالة ترفع قضايا وأنا ما أحبش أشذ عن المجموع، والظاهر إن رواج الدراما الهائل صحبه رواج للمحامين وفراغ لدى المحاكم والقضاة مع إنى أعرف كما يعرف الجميع أن القضاء مش ملاحق على البلاوى المتلتلة، لكن الظاهر أن مسلسلات رمضان عملوا لها شهرين فاضيين فى المحاكم..
أول حاجة القضية اللى اترفعت قبل المسلسلات ما تبدأ ومن خلال الإعلانات فقط ضد التليفزيون واللى شغالين فيه بأن الأعمال كلها فجور وعرى وقلة حياء وكمان فى رمضان وبعد بداية رمضان.. خدوا عندكم بقى.. قضية ضد غادة عبدالرازق تتهمها بتعدد الأزواج فى مسلسل «زهرة وأزواجها الخمسة» وهذا غير جائز شرعاً ولا عرفاً ولا قانوناً وشكلها كده رايحة فى داهية يا عينى اللى بعدها.. غادة عبدالرازق برضه متهمة من ممرضات إسكندرية وقدموا كمان بلاغ للنائب العام لأنها تشوه صورة الممرضات عشان فى المسلسل أخدت رشوة!!
وطبعاً من حقهم لأننا فى مصر وبعد هذا العمر الطويل وبعد خبرتنا فى كل أنواع مستشفيات مصر سواء بالعمل أو بالمرض عمرنا.. شوفوا عمرنا ما شفنا ممرضة واحدة أخدت رشوة.. أو بقشيش وهذا مثل كل فئات الشعب خاصة الكبار منهم وحتى موظفين - سورى - قصدى نواب المجلس الموقر عمر ما حد سمع عن حد عمل كده خالص أبداً، ولذلك فإن عدم أخذ الرشاوى وقيام المواطن بعمله على أكمل وجه من خلال شيستيم محترم محبوط هو الذى وصلنا والحمد لله إلى ما نحن فيه من حياة حلوة وجميلة زى ما حضراتكم كلكم شايفين ومتمتعين.
البلاغ الثانى قصدى القضية الثانية ضد «يسرا» ليه.. عشان هى بتمثل طبيبة شرعية وطبيعى أنها تدخل فى قضايا متعددة.. لكن فيه قضية بتاعة ناس معينين لسنت عليهم يسرا وجابت سيرة قضيتهم بالذات وغالباً أن المنتج والعاملين والممثلين والممثلات عملوا المسلسل ده عشان يضايقوا الناس دول ويجيبوا سيرة قضية قتل خاصة بأحد أبنائهم لأنها الوحيدة فى قضايا القتل التى حصلت فى بر مصر.. بعد كده الدكتور أستاذنا الجليل د. حمدى السيد رفع قضايا على كل الدراما بقى، بأنها تروج للتدخين وأنا وقعت كده فى حيص بيص.. ومش عارفة أعمل إيه فى مسلسل «محمد على» ما هو كان على أيامه بيدخنوا شيشة عادى وبرضه مش عاوزة أزعل أستاذنا الجميل..
طيب أعمل إيه أطلع محمد على بيشرب بيبسى دايت ولا إيه؟ أما القضايا التى بالزوفة فهى التى رفعت وسترفع على مسلسل «شيخ العرب همام».. لأن نسل الهمامية والهوارة شايفين إنه يسىء لشيخهم الذى يعرفونه جيداً شكلاً وموضوعاً ويعرفون عاداته وأكله وشربه وكان بيستحمى كام مرة وبيتكلم إزاى رغم إنه مات منذ 241 سنة، وقالوا عيب إن نسوان الهوارة تطلع عريانة فى المسلسل، وكمان عيب إن الشيخ يوسف يقول لصالحة «فلينى» لأنه ماكنش مقمّل..
عيب فعلاً مع إن كلمة «فلّينى» عند الصعايدة معناها زمان كان «ادعكيلى راسى» أى اعملى لى مساج والغريب أن الغيرة الفظيعة غير المنطقية، بحجة أن نسل الهوارة هو هو الشيخ همام قد أنستهم أن ريا وسكينة هما هما كمان مثلهم مثل الكثيرين من الهمامية القضاة والمستشارين والوزراء والأطباء ومافيش حد كده يتولد من نسل قبيلة كانت قوية منذ زمن سحيق ليكون نسخة «زيروكس» من شيخ العرب ملك الصعيد.. فاضل قضية واحدة مستنياها من السيد الوزير على المصيلحى ضد شركة (فانتا)، لأنها بتلسن عليه جامد قوى فى الإعلان الجديد بتاع «فانتالوب» وبيقولوا هايلبسها مصيلحى ياللا يا عم ادينى وعيتك على حاجة حلوة تتسلى بيها فى رمضان وكل عام وأنتم بخير