بعد القبض على تيكتوكرز.. محمد هنيدي يعلق: «إللي بيشتم أهله بيكسب أكتر من الشقيان»

علق الفنان محمد هنيدي، على أخبار القبض على عدد من البلوجرز، بعد تقدم بعض المحاميين باتهامهم بنشر محتوى منافي للآداب، والذوق العام، واستخدام ألفاظ خارجة في فيديوهاتهم.
تعليق محمد هنيدي على القبض على البلوجرز
وكتب محمد هنيدي عبر خاصية التعليقات على مقطع فيديو نشره الإعلامي محمود سعد لمناقشة أزمة التيكتوكرز؛ قائلًا: «حبيبي محمود، المشكلة مش الذوق العام ولا فكرة تدخل الدولة، المشكلة أعمق بكتير، وهي إن نوع معين من المحتوى الشعبوي، اللي فيه حوار شعبي، شوية شتيمة، شوية إيحاءات جنسية، بقى بيعجب شرائح كبيرة جدًا من الناس».
وأضاف: «بصراحة، حتى إحنا ممكن نوقف ونتفرج كفضول؟ الناس دي بقت مصدر جذب أكتر من السينما والتلفزيون، ومع كل لايك ومشاهدة، بيطلع ناس تانية تسيب شغلها وتقول: أنا كمان هعمل ده، في الأول بيبدأ لايف بسيط، ومع الوقت – ومع قلة الفلوس – الناس دي تبدأ تزوّد في الانحدار علشان تجيب مشاهدات، والكارثة؟ الجمهور موجود.
واستكمل هنيدي: «تيك توك بقت المنصة الأولى في الشرق الأوسط ومصر، لو نزلت مول البستان أو مول أركان، هتلاقي 70٪ من الناس عارفين التيكتوكرز واحد واحد، بقى عندنا نجوم بيعملوا إعلانات، وبيتكرموا، وبيتصوروا في كل مهرجان، النتيجة؟ العقل الجمعي للمجتمع بيتغيّر، والجيل الجديد بقى شايف إن ده هوالصح، وده هو النجاح، وناس كتير، رغم إنها مش قادرة تعمل زيه، لكن بتحس بإحباط».
واختتم: «واحد بيشقى 12 ساعة، والتاني بيشتم أهله وبيقول لفظ خارج ويكسب أكتر منه ب 10 مرات، أنا مش مع المنع، بس صعب ننفي إن في خلل كبير، خلل بيمسّ العقول، والوعي، وشكل المجتمع نفسه، التأثير حقيقي، وخطر جدًا على أجيال كاملة».
ومن جانبه أشاد الإعلامي محمود سعد برأي الفنان محمد هنيدي؛ قائلًأ: «النهاردة كنا عاملين لايف على قضية التيكتوكرز واللي بيحصل مؤخرا.. وده رأي معتبر جدا جدا لصديقي العزيز محمد هنيدي كتبه تعليقا على الموضوع واحب اشاركه معاكم».
الحالة الصحية ل أنغام
يذكر أن الإعلامي محمود سعد، طمأن جمهور الفنانة أنغام على حالتها، مؤكدًا أنها تمر بألم شديد لكنها ليست في خطر.
وقال محمود سعد في فيديو بثه عبر حسابه الرسمي على «فيسبوك»: «كان بينا اتصال النهاردة أنا وأنغام، وأنا متابع معاها ومع ابنها عمر، هو بيطمني عليها، بس هي تعبانة، فيه ألم جامد، بتمر بتعب جامد لأن فيه مشاكل، إن شاء الله بعد 3 أو 4 أيام نقدر نشوف».
وأضاف: «ادعوا لها لأنها بتمر بألم عنيف، لكن مفيش حاجة خطر، وهي كويسة، محتاجة دعاء علشان الألم الشديد اللي بتمر بيه».
وأشار سعد إلى أن أنغام تتلقى الرعاية داخل المستشفى، ومن المتوقع أن تظل هناك حتى نهاية الأسبوع.
اقرأ أيضًا:
«بتمر بألم عنيف».. محمود سعد يكشف تطورات حالة أنغام الصحية (فيديو)
يوسف الحسيني: «يعني إيه واد مالوش تلاتة لازمة يدخل في حسابه 14 مليون في لايف التيك توك»