مخرجة فيلم «ريستارت» توجه رسالة شديدة اللهجة ل طارق الشناوي: «إحنا خدامين التريند»

ردت المخرجة سارة وفيق مخرجة فيلم «ريستارت» من بطولة الفنان تامر حسني، على انتقادات الناقد الفني طارق الشناوي، وذلك بطرح الفيلم للمنافسة ضمن أفلام عيد الأضحى المبارك 2025.
وقالت «سارة» عبر «فيسبوك»: «استاذ طارق الشناوي في فرق كبير بين الاهانه وبين النقد، حضرتك بتقول إن مفيش موضوع في الفيلم ودي حاجه ضحكتني جدا لان إحنا بنتكلم عن موضوع الساعة، موضوع العصر، أكبر موضوع بيهمنا ويخصنا حاليا».
«إحنا خدامين التريند»
وأضافت: «كلامك فكرني بمشهد في الفيلم للفنان محمد ثروت وهو بيقول أنا أعمل أي حاجه عشان ابقى تريند (إحنا خدامين الترند) وسمع كلام الچوكر (الفنان باسم سمرة) اللي بيشتغل لأغراض ناس، مبروك يا أستاذ طارق عرفت تبقى تريند من غير ما تنقد الفيلم.. تخبط في القائمين على العمل بعيداً عن العمل نفسه ولا اتكلمت عن إيجابياته ولا سلبياته لا ههاجم أشخاص وبكده هطلع تريند بسرعة».
وتابعت: «ده موضوع الفيلم اللي أنت مافهمتوش أصلا ولا هو جالك على الجرح؟ وعلى فكرة أنا كمان بعرف أعمل تريند وهنطلع تريند أنا وأنت، بس أنا على حق وهمنشنك عشان تظهر بسرعة».
واستطردت في الهجوم: «أنت بتقول أن أغنية المقص عجبتك بس هي مش داخل الفيلم، لا يا أستاذ طارق الأغنية في الفيلم بس شكل اللي بيمليك اتلخبط، ادخل شوف الفيلم اللي أنت مشوفتوش واحكم عليه بنفسك وبلاش الأفكار السطحية اللي بتقولها على كل الأفلام، لأنك لو شوفت ريستارت فعلًا كنت هتعرف أن قصته أهم ما فيه».
وأضافت: «وبعدين حضرتك بتتكلم عن أدوات المخرج والمؤلف ولم تستخدم أدواتك كناقد فني ياريتك قولت حاجة نستفيد بيها بدل ما أنت طالع ترمي إفيهات وإفيهات وحشه كمان».
واختتمت: «الرقم اللي متحقق جوه مصر وبرا مش مجاملة يا أستاذ طارق ده الجمهور الحقيقي اللي بنخاطبه دول مش ولاد أختي مثلًا، الفيلم لسه نازل وداخل على 50 مليون داخل مصر فقط ودا نجاح مفرح كل صناعه الحمد لله، على العموم دي كلمتك ورأيك والجمهور قال كلمته برضو».
طارق الشناوي يعلق على أفلام عيد 2025
وفي وقت سابق تحدث الناقد الفني طارق الشناوي عن فيلم «ريستارت» من بطولة الفنان تامر حسني، والذي يُعرض ضمن الأفلام المنافسة في شباك التذاكر خلال موسم عيد الأضحى.
وقال الشناوي في تصريحاته ل«المصري اليوم» عن العمل: «لكن الفيلم من وجهة نظري ليس ضمن الأعمال التي توضع في مقدمة الأعمال الجماهيرية التي قدمها تامر حسني، إذ أن العمل سوف يلقى جماهيرية».
وتابع: «لكن المواقف والإيفيهات الموجودة فيه على سبيل الضحك لا اعتقد أنها سوف تظل مضحكة حتى بعد العيد، وأجمل ما في الفيلم هو أغنية»المقص«بالرغم من أنها مجرد أغنية ترويجية للفيلم إلا أنها أفضل جزء موجودة بالعمل».
وعن وجود فيلمين جديدين يتنافسان في شباك التذاكر، تابع: «فكرة وجود فيلمين فقط في العيد يتنافسان هو اتفاق بين شركات الإنتاج والتوزيع بشكل يناسب مصالح الضلعين».
إيرادات فيلم ريستارت في ثالث يوم عرض
نجح فيلم «ريستارت»، بطولة الفنان تامر حسني، في تحقيق إيرادات قوية ثالث أيام عيد الأضحى، أمس الأحد، وجنى قرابة 9 مليون و170 ألف جنيه، مقابل بيع قرابة 75.7 ألف تذكرة في 24 ساعة، ليقفز فيلم ريستارت بإجمالي إيراداته في 12 يوم عرض إلى 42 مليونا و729 ألف جنيه.
أبطال فيلم ريستارت
يُشارك تامر حسني في بطولة الفيلم هنا الزاهد، ويضم الفيلم عددا من الفنانين، منهم باسم سمرة، محمد ثروت، عصام السقا، ميمي جمال، رانيا منصور، وضيوف الشرف إلهام شاهين، محمد رجب، شيماء سيف، وأحمد حسام ميدو، والفيلم من تأليف أيمن بهجت قمر، وإخراج سارة وفيق.
أحداث فيلم ريستارت
وتدور أحداث الفيلم في إطار كوميدي اجتماعي، حيث يلعب تامر حسني دور «محمد»، فني هواتف بسيط، يحلم بالزواج من «عفاف»، مؤثرة على وسائل التواصل الاجتماعي، لكن عندما يقف المال عائقًا في طريقهما، يتعاونان مع عائلتهما الساعية للشهرة عبر الإنترنت، ما يؤدي إلى مواقف كوميدية ساخرة.