مخرج «البحث عن منفذ لخروج السيد رامبو»: «جاتلي الفكرة من حادث كلب الأهرام» (فيديو)

تحدث خالد منصور، مخرج فيلم «البحث عن منفذ لخروج السيد رامبو»، عن كواليس المشاركة في العمل الذي بدأ عرضه في السينمات اليوم الأربعاء، وأوضح أنه استوحى فكرة الفيلم من حادثة شهيرة حدثت في مصر منذ فترة طويلة، ومعروفة إعلاميًا ب«حادثة كلب الأهرام».
خالد منصور: جاتلي فكرة الفيلم من حادثة كلب الأهرام
قال خالد منصور في تصريحات خاصة ل«المصري اليوم»: «في الأول خالص كانت فكرة وكنت بشوف صورة في دماغي، لولد في أواخر العشرينات قاعد بليل لوحده في الشارع مع الكلب بتاعه والجو ساقعة، ومكنتش عارف الصورة دي كانت جيالي منين، بعدها شوفت حادثة مشهورة حصلت في مصر من فترة كبيرة اسمها حادثة كلب الأهرام، كان مجموعة من الشباب في حي شعبي جابوا كلب وربطوه وقتلوه وهو صاحي».
وأضاف: «وقتها الحادثة دي استفزتني وحسيت إني لازم اقف عندها، عشان اعرف الشباب اللي عملوا كده كان ايه دافعهم، وبعد كده قررت ادمج الحادثة دي بالصورة اللي في دماغي وبدأت تأليف الفيلم، والتصوير مع الكلب رامبو كان صعب ولطيف في نفس الوقت، لأنه في الآخر حيوان بيجيله أوقات مبيبقاش قادر يشتغل ويبذل مجهود، عشان كده اضطرينا نجيب كلبين ونبدل ما بينهم، وأنا استمتعت بالتصوير معاهم».
وتابع: «كل طاقم العمل بذل كل اللي يقدر عليه لحد ما طلعنا أفضل منتج، على الرغم من إن كان فيه مشاهد صعبة بس اتعملت، ولما الفيلم شارك في مهرجان فينيسيا دي كانت رسالة للعالم إننا نوصلهم إن السينما المصرية مهمة وعريقة وتقدر تنافس أفلام اجنبية اتكلفت ملايين الدولارات، ودي كانت لحظة مهمة ولكن هدفنا إن الناس تتفرج عل الفيلم وتتبسط، وهو فيلم مش لتصنيق سئ السمعة «مهرجاناتي»، هو فيلم بسيط وأي حد يقدر يفهمه، عصام عمر نجم كبير ومخلص لمهنته وفاهم يعني ايه ممثل وضاف كتير للعمل».
صناع «البحث عن منفذ لخروج السيد رامبو»
فيلم «البحث عن منفذ لخروج السيد رامبو» بطولة عصام عمر في أولى تجاربه السينمائية، ركين سعد، سماء إبراهيم، وأحمد بهاء أحد مؤسسي فرقة شارموفرز الغنائية في تجربته التمثيلية الأولى في عالم السينما، بالإضافة لعدد من الوجوه الشابة وضيوف الشرف، إخراج خالد منصور الذي شارك في التأليف الكاتب والسيناريست محمد الحسيني.
قصة «البحث عن منفذ لخروج السيد رامبو»
تدور أحداث الفيلم حول «حسن» عصام عمر، الشاب الثلاثيني الذي يتورط برفقة كلبه «رامبو» وصديقه الوحيد، في حادث خطير دون ذنب، ليصبح بين ليلة وضحاها مطاردًا من قِبل جاره، الأمر الذي يدفعه للبحث عن طريقة آمنة لإنقاذ نفسه وكلبه من مصير مجهول.
اقرأ ايضًا
موعد انطلاق فيلم «البحث عن منفذ لخروج السيد رامبو» في 29 دور عرض (تفاصيل)