استكملت نيابة وسط القاهرة الكلية التحقيقات في مقتل الخواجة حسني الخناجري، جواهرجي بولاق ابو العلا، في القضية رقم 514 لسنة 2024 إداري بولاق أبو العلا، حيث استمعت لأقوال المتهمه فادية م شقيقة المتهم بإنهاء حياة الجواهري. وقالت فادية محمد 45 سنة- ربة منزل، خلال التحقيقات، أمي ماتت من 35 سنة وانا عندي عشر سنين واحنا ست أخوات وأبويا اتجوز بعد ما أمي ماتت بشهر أو شهرين وانا أكبر واحدة فيهم، وقعدت من المدرسة كنت بربيهم وأراعيهم وأخويا محمد حسن كان في سنة رابعة ابتدائي لحد ما كبروا وانا اتجوزت سنة 1994 وما سبتهمش واخويا ساب المدرسة واشتغل مع أبويا، وفضل شغال لحد ما اتجوز بنت عمه وبعدها خلعته واتجوز طليقته بعد وفاة بابا. وتابعت شقيقة قاتل جواهرجي بولاق أبو العلا، من ساعة ما أبويا مات ابتدت المشاكل، وابتدي ساعتها يخش في مشاكل بسبب انه مش قادر على الالتزامات المادية وكان ينفق على شغل وما يكملش وابتدي يخش في مواضيع أنه يمضي على إيصالات أمانة ويبيع ممتلكات ابوه اللي هو ورثة وفضل عايش معايا من سنة 2021 ولما ميكونش معاه فلوس بساعده وكدة كدة بياكل ويشرب معانا ولو عايز سجائر بجيبله وهو لما ساعات بيبقي معاه فلوس بيدينا بس نقطة التحول في حياته لما مي سابته وطلبت الطلاق، وبعدها حالته النفسية بقت وحشة. وأضافت شقيقة المتهم خلال التحقيقات، يوم 27 فبراير محمد جالى البيت لقيته بيقولي أنا مسافر حضريلي هدومى عشان عندى شغل في حتة في الصعيد ولقيته بيتكلم في التليفون وعرفت ساعتها انه بيكلم حسن صاحبه وسمعته بيقول خلاص انا هقابلك في شارع ناهية، وبعد كده اداني دبلة وخاتم وقالي انا عايزك تبيعي الحاجات دي عشان نلحق نمشي وفعلًا سلمني دبلة وخاتم ونزلت عند مدحت بتاع الدهب وقولتله انا عايزة ابيع الدبلة والخاتم وقال ملهومش فاتورة قولتله لا ده واحد لسة متجوز عاوز يبيعها في شغل. ساعتها مدحت قالي بلاش نبيع دلوقتى عشان الذهب نزل قولتله لا انا عاوزة ابيعهم عشان هو محتاجه في شغل وبالفعل خدهم تمنهم واداني مبلغ مالي عشرين ألف جنيه، ورجعت البيت وديت الفلوس لمحمد واداني الف ونص وقالي انا مسافر ولو عوزتي حاجة هبعتلك قولي بس لحسن وانا هبعتلك وانا أن شاء الله قبل رمضان هبعتلك فلوس تجيبي حاجات للبيت وبعد كدة راح واخد بعضه ونزل وما شوفتهوش تاني لحد يوم الثلاثاء بليل لقيته جالي وخبط عليا البيت فقولتله انت ما سافرتش قالي انا سافرت أسوان ورجعت في نفس اليوم وهمشي تاني ودخل نام لحد ما اتقبض علينا.
