وجه أحمد حسام «ميدو»، نجم الزمالك السابق رسائل نارية إلى مصطفى شلبي، جناح الفريق الأول لكرة القدم بنادي الزمالك، بسبب احتفاله المثير بالهدف الذي أحرزه في مباراة دريمز الغاني. وتمكن نادي الزمالك من الفوز على نظيره دريمز الغاني، بنتيجة 3-0، في المباراة التي اقيمت بينهما مساء الأحد، ضمن منافسات إياب نصف نهائي كأس الكونفدرالية. وسجل مصطفى شلبي هدف الزمالك الثالث، في الدقيقة 59، وأثناء احتفاله قام بخلع قميصه وذهب للجماهير وأشار بيده بحركة خارجة. وقال ميدو في تصريحات تلفزيونية عبر فضائية «المحور»،: «مصطفى شلبي، أحرز هدف الزمالك الثالث، الماتش خلصان الزمالك حط نتيجته في جيبه، مصطفي، بعد ما أحرز الهدف راح للجمهور وشارر بالصمت وشاور بحركة تانية على صدره» وأضاف: «أنت بتوجه رسالة لمين؟ انتوا مين فهمكم أن مستواكم دلوقتي يخليكم تفتكروا إن أنا أكبر من أي حد وإن أنا أقدر أعمل أي حاجة، مين وصلكم الأفكار دي». وتابع: «مصطفى شلبي، إيه الداعي إن أنت تحط نفسك في جملة مفيدة وتخلي شكلك وحش قدام الناس كلها». وأكمل: «إيه إللي أنت عملته في الزمالك يخليك واصل لمرحلة إنك فوق الانتقاد، أنا تفسيري الوحيد، اللي عمله مصطفى شلبي، إن هو بيوجه رسالة للجمهور إللي انتقده بشدة بعد مباراة الذهاب وبعد إصاباته المتكررة» وزاد: «أنا أفهم إن في نجم كبير بيقدم للنادي حاجة كبيرة جدًا وبقاله سنين وكتب تاريخ أنه يصل لمرحلة يلعب بأتيتيود كانتونا وروي كوستا وتوتي، اللي هو (أنا أعلى منكم كلكم)». وأردف: «بكل صراحة في لعيبة عايشين في وهم أفكار إللي حواليهم فبيفضلوا جوه الدايرة اللي بنوها حوالين نفسهم، نجوم كبار تحديدًا في الفن والرياضة بيقعوا في مطب الانسياق وراء الدايرة المحيطة بيهم»، مضيفًا: «دايمًا اسمع الناس اللي مجالك وبتنتقدك ومتاخدش كلامهم انه مهاجمة وتقبل الانتقاد». وأتم: «الزمالك لازم يراجع مصطفى شلبي، على الحركة إللي عملها بعد إحرازه الهدف الثالث في دريمز».
