شوبير يكشف عن قرار اتحاد الكرة المنتظر في أزمة ثنائي الزمالك مع المصري

كشف الإعلامي أحمد شوبير حارس مرمى الأهلي ومنتخب مصر السابق عن القرار المنتظر من اتحاد الكرة في أزمة نادي الزمالك مع نظيره المصري البورسعيدي بخصوص ثنائي الفريق الكروي الأول بالقلعة البيضاء أحمد أيمن منصور وأحمد عيد.
وحدد اتحاد الكرة جلسة حاسمة يوم الأربعاء المقبل للحكم في المشكلة بين الزمالك والمصري بخصوص اللاعبين.
وقال أحمد شوبير في تصريحات إذاعية اليوم الاثنين: «هقول كلام مهم جدا في موضوع أحمد أيمن منصور وأحمد عيد عشان هما ما اتقيدوش في الزمالك وراحوا المصري ولم يقيدوا في المصري بعد ما اتحاد الكرة رفض يقيدهم بسبب شكوى نادي الزمالك ضد اللاعبين».
وتابع شوبير: «في جلسة بعد بكره زي ما حدد اتحاد الكرة يوم الاربعاء عشان يشوف الدنيا ماشية ازاي، وأنا سألت مصادر في الناديين عشان أعرف الدنيا أيه، ففي الزمالك عايزين فلوس ويحلوا الموضوع بس النادي المصري مش عايز يدفع وبيقول تعاقدت مع لاعبين (فري) في انتقال حر ولن ادفع أي شيء».
وأوضح شوبير: «الخلاصة المصري هيحضر يوم الأربعاء في حضور خبير لوائح، وأنا هقول لكم نتيجة الجلسة من دلوقتي قبلها بيومين، لو اتحاد الكرة اقروا عقوبة الإيقاف على الثنائي هيكون إيقاف 6 شهور وغرامة مالية قد لا تكون متساوية على اللاعبين لصالح نادي الزمالك، لكن لو اخطروا الاتحاد الدولي لكرة القدم»الفيفا«هيكون الايقاف محلي ودولي وبالتالي أحمد عيد لن يشارك مع المنتخب المصري في أوليمبياد باريس».
وفجر شوبير مفاجأة مضيفًا: «بس فيه حاجة مهمة جداً الغرامة في الحالة دي لو وصل الموضوع للفيفا هتكون لاتحاد الكرة وليس لنادي الزمالك».