مرشح والعياذ بالله

فى جنازة الأميرة «فريال»، يرحمها الله، كان الحاضرون ينادون أخاها «أحمد فؤاد‎» بعبارة جلالة الملك «فؤاد الثانى» ونسى هؤلاء أن لقب (الثانى) نحس على صاحبه لم‎ يُنقذ منه إلا «لويس» فرنسا، فنيقولا الثانى كان آخر قياصرة روسيا، و«غليوم الثانى‎» كان آخر ملوك ألمانيا، و«عبدالحميد الثانى» كان آخر سلاطين العثمانيين، و«فؤاد‎ الثانى» هو آخر ملوك مصر،‎
لذلك ليس عندنا فى مصر رجل ثان لكن عندنا فيلم اسمه ‏(الرجل الثانى) وسوء حظى‎ سببه أننى الرجل الثانى فى الأسرة بعد زوجتى التى تجرأت منذ أيام وقلت لها (إحنا كل‎ أسبوع نزور أمك ونجيب لها «موز»، امتى بقى نزورها ونقرالها الفاتحة) فغضبت وكسرت لى‎ الأتوبيس وتجمع الجيران فى شقتى يحملون علم مصر‎..
وقالت لى جارتنا «فوزية» الناظرة (اسمع يا حاج كله إلا الأم لأن الأم «مدرسة‎» نظيفة متطورة ومنتجة) فاستفسر منها عم «مدبولى» فقالت (مدارس اللغات تنتج المربى‎ ومدارس الحكومة تنتج المخلل) {ملحوظة اعتراضية: نحن نستورد آلات إلكترونية دقيقة من‎ إنتاج مدارس ألمانيا} وقالت لى «فاطمة» الداية - التى قبضوا على زوجها بتهمة الشروع‎ فى الترشح - (إنت عامل زى جوزى كل شوية عامل مشاكل معايا والآخر حلف لازم يرشح نفسه‎ علشان يخلص منى ومن حياته‎)
فسألتها «فوزية» (يا حول الله يا رب ما حدش يا اختى حاول يمنعه) فردت فاطمة‎ (‎أصله جاله اكتئاب مزمن والدكتور قال لنا اوعوا تسيبوه لوحده لأنه ممكن يرشح نفسه‎ فى أى وقت وفعلاً خلانا نايمين ورشح بعيد عنك نفسه) فقال عم «مدبولى» (خلاص ما‎ تجوزش عليه إلا الرحمة.. لكن عياله عاملين إيه؟) ردت «فاطمة» (مفلوقين من العياط‎ وعايزين يرشحوا نفسهم وراه).. فطلبت منهم بأدب أن ينصرفوا ويمشوا قبل أن يبايعونى‎ ويخربوا بيتى فقالت «فوزية» الناظرة (نمشى إزاى دلوقتى مش لما يضرب الجرس‎).‎
galal_amer@hotmail.com