مي حلمي عن مساوئ الخيانة بعد طلاقها من «رشاد»: «لما تكتشفي شرديله»

كررت الإعلامية مي حلمي، تعرضها للإيذاء النفسي بعد طلاقها، فيما نوهت إلى مساوئ الخيانة في حياة المرأة، منذ ساعات، وهو ما تسبب في ربط جمهورها بين طلاقها من الفنان محمد رشاد وتعرضّها إلى الخيانة، تلك الإشارات التي أوضحتها «حلمي» بعد صمتها أشهر واكتشافها أنها مُتهمة بكونها سبب الطلاق من «رشاد» لكبريائها.
وقالت «حلمي» عبر خاصية «الستوري» ب«انستجرام»: «نصيحة مني يا بنات، الطبيعي لما تكتشفي خيانة اللي قدامك شرديله كده كده مش هيطلعك بجناحات وبتطيري»، وفتحت المجال للمتابعات من أجل مُشاركتها بآرائهن حول الخيانة، لذا قالت إحدى المتابعات: «الرجل اللي بجد عُمره ما يخون واحدة وثقت فيه ويوجع قلبها، وهو اللي يبقى سند وضهر وأمان».وترد «حلمي» على المتابعة: «كلهم مصطفى أبوحجر».
يذكر أن «حلمي»، قالت منذ يومين: «أخر سنتين من عمري حاسه أن حياتي سداح مداح من أقرب الناس في حياتي، مي في المستشفى مي فرحها باظ ومي حصل طلاق، دايما ماكنتش المعلومات طالعة مني، أنا كنت عارفة أن الميديا كده لكن ماتخيلتش أن الموضوع واسع كده في الكلام على الناس».
وتابعت: «تجربة الطلاق مريرة جدًا خصوصًا لما كل حاجه في الطلاق تتحسب عليك أنت، ويبقى أنت السبب فيها، ولو نرجع للفيديو اللي كنت بدعم فيه بيتي وبقف في ظهر شريك حياتي (محمد رشاد) اتاخد ضدي، وبقول للبنات تجربة الطلاق والخيانة والغدر هي تجربة صعبة، تجربة على الست صعبة عمومًا لأنها بتفقد الثقة والأمان في اللي حواليها، وأنك يبقى معاكي فلوس وتبني بيت وشخصية وتبني ثقة بنفسك تاني من أول وجديد وكمان نظرة المجتمع ليكي وتحسي أنك صيدة من الناس كلها».
واستكملت: «أنا حاسة أني عايزه أتكلم يمكن العيب مش عندي ويمكن العيب من الطرف الثاني، محتاجه أطلع الكلام، وهتكلم عن حاجات مظلومة فيها مش عن حاجات خاصة، محتاجه أحكي عن التجربة المريرة اللي مريت بها، قد إيه صعب أني أبص في عين أهلي وصحابي ويبقى ماعيش معايا ربع جنيه في جيبي بعد الطلاق، شايفين أني أحكي ولا لأ؟».
واستطردت حول مشاعر الوجع التي مرّت بها بعد الطلاق: «كانت بتوجعني كلمة أتخلت عن زوجها في الظروف الصعبة ومافيش ظروف أصلا ودا اللي اكتشفته (وهي مشاكل مرّ بها طليقها مع شركة للإنتاج على حد قولها) بمشي في الشارع يقولوا عليا هي تنكة هي اللي خلته يسيبها وكتر خير الدنيا أني مكمله وموقعتش، صحابي القريبين بقولوا ليّا إزاي صورتك طالعة أنك أنتِ اللي قاسية كده، سنتين الواحد على قلبه حجر وماتكلمش، هي فيه عروسة هتسيب فرحها وتمشي إزاي؟».
وقدّمت نصيحتها للمطلقات: «أنتِ قوية وهتعيشي لنفسك وغيرك بعد الطلاق وهتحبي تاني وثالث ورابع».
في المقابل، رد طليقها رشاد على كلماتها خلال «ستوري» ب«انستجرام» قائلًا: «طبعًا أنا لغاية دلوقتي ساكت وكافي خيري شري ومابجبش سيرة حد لا بالحلو ولا بالوحش، لأن تربيتي تمنعني أني أتكلم عن أي حد مر في حياتي لا بالحلو ولا الوحش، وسواء كان كويس أو وحش، كل تجربة عدت عليا الحمدلله اتعلمت منها ومافتحتش عنها كلام، والناس بتعرف تميز مين الحلو والوحش أو مين اللي بيمثل ومين بيتعامل بطبيعته وتربيته».
وتابع: «بس الأصول اللي اتربيت عليها ماتمنعنيش من الرد لما حد يسّوأ سمعتي ويتكلم بشكل وحش، وأنا احترمت حاجات كتير وسكت وأنا ماكنتش هرد بس الناس بتبعتلي ليه ساكت ومابتتكلمش، أنا ساكت لأن دا اللي أتربيت عليه، وهفضل ساكت لحد لما أشوف الحد اللي عايز يغلطني دا هيوصل لحد فين، وربنا يسترنا ويستركم». فيما أضاف عبارة: «إن الله حليم ستار وإذا بليتم فأستتروا والسكوت مش ضعف ولكن أتقي شر الحليم إذا غضب».
وكان الثنائي انفصلا منذ حوالي 4 أشهر في صمت وبشكل مُفاجي، بعد فترة قصيرة من ظهور «حلمي» في فيديو وتدافع عن «رشاد» بسب خلاف وقع مع إحدى شركات الإنتاج، ويطالبون الفنان بدفع مبالغ طائلة وتحجيم أي نشاط فني، والتي لفتت إلى أنها بعد الظهور في الفيديو تعرضت للانتقادات، واُعتبر تدخلها لم يكن جيدًا لصورتها و«رشاد».