أكد الرئيس عبدالفتاح السيسي أن ما تم إنفاقه خلال 6 سنوات على المشروعات في محافظة القاهرة وهو ما يقرب من 280 مليار جنيه يأتي لتحسين حياة المواطنين في القاهرة. وقال السيسي -تعقيبا على كلمة محافظ القاهرة خالد عبدالعال خلال افتتاح عدد من المشروعات القومية اليوم الأحد: «أريد أن تقارنوا ما تم إنفاقه بأن نأخذ قرارًا بإنشاء عاصمة من 30 سنة وتم وضع هذه الاستثمارات التي ستتوفر من محافظة القاهرة أو جزء كبير منها في هذه المدن.. إنت بتتكلم في 280 مليار جنيه في 6 سنوات، أي ما يقرب من 50 مليار جنيه في العام». وأضاف: «أنا بقول الكلام ده عشان دائما حالة الفهم والوعي هي التحدى اللي محتاجين دائما نخلى بالنا منه، وإن إحنا كمصريين محتاجين دائما أن نعرف جيدا، لأنه عندما اتخذنا قرار بناء المدن الجديدة، فيه ناس كتير قالت بتعملوا الكلام ده ليه، وكأنه أمر مش مطلوب وهو ناسي إن أنا بصرف داخل القاهرة لتحسين حياة المواطنين بها»، ومعقبا على حديث محافظ القاهرة بإنفاق 33 مليار جنيه في مشروعات بشرق القاهرة، وهي عبارة عن إنشاء كبارٍ وشق طرق، وهو مبلغ ضخم جدا، قائلا «إن هذا المبلغ لو تم صرفه على إنشاء حي والشقة بداخله تتكلف مليون جنيه، سننشئ 33 ألف وحدة، ولكن نحن لم نزد الشقق، بل حاولنا تحسين حياة المواطنين». وتابع: «الرسالة اللي ممكن نقولها، خلى بالك لازم الدولة تفكر وكمان شعبها يحترم فكرها ويدعمه، ميقولش حد إنتوا بتعملوا الكلام ده ليه». وتساءل الرئيس: «ما هي البدائل؟ هل أنشئ كباري فوق الكباري وأزيل مباني وأنشئ طرق، أم أوقف السعة التي وصلنا لها». وأشار السيسي إلى أنه تم إيقاف أعمال البناء سواء للرخص القائمة بالفعل أو الرخص التي تصدر، موضحا أن ذلك جاء بسبب أن القاهرة وعدة محافظات لابد من مراجعة الكثافة المتواجدة لكي يستطيع المواطنون العيش بشكل مناسب. وتابع السيسي: «أنا بقول الكلام ده للتأكيد على ما قاله رئيس الوزراء الدكتور مصطفى مدبولي، توجد أماكن في القاهرة لن يصدر لها ترخيص تاني مرة أخرى، وحتى الأماكن التي سيصدر لها ترخيص؛ لو كانت الاشتراطات الخاصة بالمباني كانت تقول 7 أدوار سيكون دورين فقط». وقال: «إن ذلك القرار متأخر 20 سنة.. أنا بحلف بالله العظيم، ما كنش حد أبدا طلع ترخيص أكثر من 3 أو 4 أدوار طوال ال 20- 30 سنة الماضية، والجراجات وندي رخصة تطلع بجراج وبعد ما تطلع العمارة وتسكن الجراج مش مستخدم، الكلام ده مش هيكون تاني». وقال الرئيس السيسي، تعقيبا على كلمة محافظ القاهرة: «الجراج اللي مش هيشتغل هنخده وهنطلع قرارات نزع ملكية لكل الجراجات غير المستخدمة، نأخذها ونعطيها لناس تشغلها عشان تستوعب العربيات على الأقل في الوضع اللي إحنا فيه». وأضاف: «إحنا لما جينا نعمل مدن جديدة والناس كلها قالتلك إنت هتعمل مشروع يتكلف المليارات، طب أنا بدفع 50 مليار جنيه عشان أحسن القاهرة كل سنة، أيوه طبعا في مشاريع زي المدارس، وكنت هعملها هناك برضه، مدرسة وصرف صحي، كل ده هيتعمل في المدينة الجديدة يعني، لكن هتستوعب النمو اللي إحنا ماشيين فيه، هذه هي النقطة». وتابع قائلًا: «النقطة الثانية اللي بأكد عليها إننا لما وقفنا التراخيص والمباني اللي بتتبني وقولنا نوقف الموضوع ده أمن قومي ومصلحة وطنية، طيب إحنا متكلمناش فيها قبل كده كنا بناخد الناس بالراحة، حتى يستوعبوا إن في خطر حقيقي علينا، طيب ممكن نعطي تراخيص في أماكن.. أيوه ممكن، طيب هتبقى زي الأول؟.. لا، وأنا في الموضوع ده أرجو أن محدش يزعل.. أنا دماغي فيه أوي مع الرخصة اللي لازم أعملها أحكام وكأنه عقد ما بين الدولة وما بين القائم على تنفيذ منشأة، عشان تتعمل طبقا للمواصفات اللي إحنا اتفقنا مع بعضنا، ومع المواطن اللي عايز يبني على إننا هنعمل المنشأة كده، لكن ميقوليش أنا هعملها كده وبعد ما يأخذ الترخيص مني يعملها زي ما هو عايز، مينفعش» . وأردف: «إيقاف الرخص الهدف منها مكنش أبدا ضد الناس.. طيب محدش توقف وقال الزحمة دي هنعمل فيها إيه؟ ولا إحنا قاعدين ننتقد الزحمة وننتقد أن الدولة مش عارفة تعمل حاجة، ولما نييجي ناخذ إجراء الناس تقولك إيه طيب مصالح الناس». واستطرد: «طيب في اسكندرية حد يعمل 88 مخالفة، حد يعمل 60 مخالفة، حد يبني 23 عمارة بارتفاع 20 دور على أرض ليست ملكه، هي فين الدولة دي، لا، احنا كلنا موجودين، المحافظة موجودة ووزارة الدخلية موجودة، والقوات المسلحة موجودة والمواطن موجود، ده حقك، حقك محدش يغتصب أرض بلدك ويغتني منها وانت قاعد تتفرج عليه.. لا لا.. الكلام ده مش هيحصل وأنا حبيت أقوله هنا عشان أكد على المؤكد، احنا دولة وهنبقى دولة مظبوط ولن نسمح أبدا للناس الموجودة في البلد، فئة قليلة جدا عشان بس أكون منصف ولا أظلم أهل بلدي، أخدتها المكاسب وهتدفع كويس عشان تحل المسألة معايا، هتدفع كويس عشان أقدر أصلح اللي انت عملته، عشان أعوضه، مش عشان أنا متغاظ من حاجة، هاخد مظبوط عشان أصلح مظبوط عشان تكون دولة مظبوطة زي اللي احنا بنشوفه ونفتتح هنا دلوقتي، ولن يكون أي حاجة كده شارع عرضه مترين ومتر ونصف، لو حصلت حريقة في العمارة اللي ارتفاعها 10 أو 12 دور مش هنبقى عارفين نعمل حاجة.. لا لا.. والناس متطلعش صحة كويسة، احنا كده بنهد بلدنا، ده مش هيحصل» . ووجه الرئيس عبدالفتاح السيسي تساؤلًا لوزير الإسكان الدكتور عاصم الجزار، خلال كلمة محافظ القاهرة حول موعد انتهاء تطوير منطقة سور مجرى العيون «المدابغ»، وأجاب الجزار قائلًا: «احنا ابتدينا نشتغل في المرحلة الأولى (15 فدانا) ولكن عقب التوجيهات، نعمل الآن في 95 فدانا بالكامل وفي خلال 3 سنوات سننتهي من ذلك». فيما رد الرئيس السيسي قائلًا: «لا.. احنا هنفتتح ده مع العاصمة .. أنت شغال بقالك سنة و3 شهور فاضل أمامك سنة و7 شهور.. يعني في شهر 11 العام المقبل نكون انتهينا»..«إحنا عايزين نقول للناس إننا لما نقلناهم من هنا وقمنا بأعمال الإزالة، إن إحنا مكناش بنعمل كده ضغينة، وإن فيه ناس هتسكن وتعيش هنا». وأوضح الجزار أن المواطنين الذين تم نقلهم من هنا تم نقلهم في 1008 وحدات سكنية في مدينة بدر. ووجه الرئيس عبدالفتاح السيسي تساؤلًا لوزير الإسكان الدكتور عاصم الجزار، تعقيبا على كلمة محافظ القاهرة، حول موعد انتهاء تطوير منطقة (ماسبيرو)، قائلًا: «مقدرش أقولك العام المقبل.. صعب». وأجاب الجزار قائلًا: «إنه في يونيو 2021 سيكون السكن البديل للناس اللي هترجع في المنطقة هيكون جاهز، وعقب توجيهات الرئيس السيسي ابتدينا في إنشاء 3 أبراج حاليا لاستكمال مرحلة السكن البديل للمجموعة على كورنيش النيل وفي خلال الشهر المقبل سنبدأ في إنشاء 3 أبراج أخرى»، مشيرا إلى أن حجم الإنشاءات في المشروع كبير وأن المدة المحددة للانتهاء هي 3 سنوات. وقال الرئيس السيسي: «3 سنوات مش كتير وياريت.. أنا بقول الكلام ده ليه.. إحنا عايزين في إطار أن إحنا نوفر فرص عمل أكتر للناس، وأكتر حاجة ممكن تشغل الناس هي الأشغال ديه»، مضيفًا: «وأنا بقول الكلام ده لكل اللي بيسمعني، لما اتقال أن إحنا وقفنا البناء الكام شهر دول إن فيه ناس مش هتلاقى شغل، لا، أنا كنت لسه هقول في إسكندرية بنتكلم في 60 ألف وحدة هنعملهم خلال العامين المقبلين». وتابع: «النهارده أنا محتاج أن كل المناطق التي يتم البناء فيها نزود حجم العمل فيها بما فيها المدن ال20 الجديدة، نزيد من حجم الإنشاءات المتواجدة فيها، بحيث إننا لو كنا هنعملها كمان سنة أو اثنين، نفتتح المرحلة ديه ونبدأ فيها بالتوازي مع ما نحن فيه لتوفير فرص عمل أخرى». ومن جانبه، قال الجزار: «إن معدل إنفاق هيئة المجتمعات العمرانية الجديدة كان 6 مليارات جنيه في الشهر، والآن نعمل بمعدل إنفاق 12 مليار جنيه في الشهر، وذلك تنفيذا لتوجيهات السيسي في فتح فرص عمل جديدة وتعجيل البرامج الزمنية للمشروعات».
