الشرنوبي يكشف حقيقة انفصاله عن خطيبته سارة الطبّاخ (تفاصيل)

سادت حالة من الجدل في الفترة الأخيرة، على مواقع التواصل الاجتماعي، حول انفصال المطرب الشاب محمد الشرنوبي، عن خطيبته المنتجة سارة الطباخ، وذلك بعد أن لاحظ رواد السوشيال ميديا إلغاء متابعة خطيبها من على حسابها الشخصي على تطبيق «إنستجرام»، لذا قرر الشرنوبي الرد على تلك الشائعات على صفحته الرسمية، على موقع التواصل الاجتماعي،«فيس بوك»، إذ قال: «بقالي فترة عليا هجوم شخصي غير مبرر وكلام كتير له علاقة بحياتي الشخصية».
وأضاف: «في سبتمبر 2017، بعد مسلسل (لا تطفئ الشمس) وحلقات (صاحبة السعادة)، وحفلة الموسيقار الكبير عمر خيرت، وأغنية (مين فينا) مع النجمة الكبيرة أصالة، وبعد ما كنت لسّه ماضي مسلسل (كأنه امبارح) وفيلم (الممر)، جالي شغل مع شركة كبيرة عشان انزلّها بوست على انستجرام عندي، واللي كانت ماسكة الحملة دي واحدة اسمها سارة الطباخ، نشأت علاقة صداقة لطيفة وكانت بتقنعني إني أحترف الغناء، في فترة كنت عاوز أركز في التمثيل أكتر».
وأكد الشرنوبي: «سارة كانت إنسانة جميلة وجدعة جدًا، الموضوع بعد كده اتطور من صداقة لعلاقة حب، وبقى فيه ما بينا ثقة واحترام بس دي كانت بداية مشاكل قوية جدًا حصلتلي في حياتي، أهمها عدم رضا أبويا عن العلاقة دي بسبب إن فرق السن بيني وبينها 15 سنة، وده كان السبب الرئيسي إن أبويا مكانش موجود في فيديو قراية الفاتحة اللي معظم الناس شافته».
وقال: «بالمناسبة الڤيديو ده اتصور يوم (5 إبريل 2018)، يعني من سنة و3 شهور تقريبًا، وفضل أبويا زعلان مني فترة وما تصالحناش غير لما حضرلي أول حفلة أعملها في حياتي وده كان السبب في إني لما قدمته عيطت ونزلت من على المسرح.».
وأضاف:«اقتنعت برأيها إنى أمثل وأغني في نفس الوقت، بعدها فوجئت بيها بتقدملي عقد احتكار مدته 10 سنين والشرط الجزائي اللي في العقد 600 ألف دولار وماليش حق امضاء أي عمل سواء تمثيل أو غناء.. وللأسف دي غلطتي.. أنا كنت متخيل إن شروط العقد ده؛ الشروط المتعارف عليها، ولما خفت وقلقت من الشروط دي شوية كانت سارة بتقنعني إن دي مجرد شكليات وإن كل حاجة هاتتم بالتراضي».
وتابع: «قالتلي بالحرف (اي وقت هاتيجي تقولي فيه ان العقد ده مش مريحك هديلك العقد، عمري ما هغصبك على حاجة)، وبسبب ثقتي فيها وحبي ليها وافقت على كل ده ووافقت كمان اني امضي العقد ده رغم انه كان معمول بتاريخ قبله بحوالي 10 شهور (بتاريخ اليوم اللي قابلتها فيه تقريبًا)، من بعد ما مضيت العقد وبعد ما قريت الفاتحة اللي وقفت قدام كل الناس فيها، لقيت طريقة تعامل مختلفة تماماً وتوتر بدون أسباب بيحصل بيني وبينها».
واستكمل حديثه قائلاً: «فسخت الخطوبة شهر يوليو 2018 يعني بعد 3 شهور بالظبط من قراية الفاتحة وماكناش لسه ساعتها اشتغلنا على الألبوم، وقلتلها اني مش حابب اكمل شغل خلينا أصحاب أحسن، وكان فيه محاولات معايا من ناس كتير مشتركة ما بيننا عشان يصلحوا الموضوع لأكتر من شهر، ووافقت إننا ندي نفسنا فرصه تانية كتجربة عشان كان عندي مشاكل كتير في طريقة التعامل».
وأردف: «رجعنا وكانت الحياة كويسة في الأول ورجعنا نشتغل تاني وبعد فترة بدأت المشاكل ترجع تاني وبشكل اسخف واتسببت في مشاكل كبيرة بيني وبين أهلي وأصحابي القريبين وحتى أي حد في الوسط بقى بيتجنبني أو بيتجنب التعامل معايا لمجرد إن هي اللي ماسكة شغلي عشان طريقتها مكانتش الذ حاجة خالص.. وبدأت تحاول تتحكم في كل حياتي وعلاقتي بكل اللي حواليا..».
واختتم حديثه، قائلاً: «ابتدا يبقى فيه استخدام لفكرة العقد بشكل واضح والمشاكل بقت شخصية ومهنية.. ولما مارضتش أكمل في علاقة أنا حاسس إنها مابقتش مناسبة ليا ولا أنا ولا الطرف التاني، ابتدا يبقى فيه أساليب تانية للضغط.. آخرها كان فيديو الخطوبة اللي نزل وإحنا اصلاً مش مع بعض.. ولإني عمري ماكنت حابب إن حياتي الشخصية تبقى مجال للكلام ولأن فعلاً الخطوبة دي حصلت في يوم من الأيام ولإني عمري ما هجرحها أو أحرجها، ماعلقتش خالص على وعد منها إننا ننزل بعد فترة إن الخطوبة اتفسخت لأن إحنا فعلاً دلوقتي مش مخطوبين».